ໂຄງການຜະລິດກາເຟອິນຊີ ສົ່ງເສີມປະຊາຊົນປູກຝັງທົດແທນການທໍາລາຍປ່າໄມ້

ທ່ານ ບຸນມາພິລາວົງ ຫົວໜ້າຫ້ອງການກະສິກໍາ ແລະ ປ່າໄມ້ເມືອງວຽງພູຄາ ແຂວງຫຼວງນໍ້າທາ ກ່າວໃນວັນມອບ-ຮັບໂຄງການກໍ່ສ້າງໂຮງງານປຸງແຕ່ງກາເຟອິນຊີຢູ່  ບ້ານນ້ຳວາງ ເມືອງວຽງພູຄາ  ແຂວງຫຼວງນໍ້າທາ ໃນຕົ້ນເດືອນມັງກອນ 2024 ນີ້ວ່າ: ໂຄງການກໍ່ສ້າງໂຮງງານປຸງແຕ່ງກາເຟອິນຊີຢູ່ບ້ານນ້ຳວາງ ເມືອງວຽງພູຄາ ແຂວງຫຼວງນ້ຳທາ, ເປັນໂຄງການຊ່ວຍເຫຼືອກ່ຽວກັບການປົກປັກຮັກສາສິ່ງແວດລ້ອມ (SGP) ຂອງອົງການສະຫະປະຊາຊາດ, ພາຍໃຕ້ຂອບການຮ່ວມມືແມ່ນ້ຳຂອງ-ແມ່ນ້ຳຄົງຄາ ຊຶ່ງໃຫ້ທຶນສະໜັບສະໜູນໂດຍລັດຖະບານອິນເດຍ, ເປົ້າໝາຍເພື່ອສ້າງຄອບຄົວຕົວແບບໃນການຈັດສັນອາຊີບຄົງທີ່ ທົດແທນການຖາງປ່າເຮັດໄຮ່ແບບເລື່ອນລອຍ ແລະ ການປູກຝິ່ນ, ພ້ອມທັງປົກປັກຮັກສາ ແລະ ພັດທະນາເສດຖະກິດ-ສັງຄົມ ໃຫ້ມີຄວາມເຂັ້ມແຂງ ໃນທຸກດ້ານ ແລະ ກາຍເປັນບ້ານພັດທະນາ ຂອງເມືອງວຽງພູຄາ ແຂວງຫຼວງນໍ້ທາ ຊຶ່ງສອດຄ່ອງກັບແນວທາງຂອງພັກ ທີ່ໄດ້ຖືເອົາ“ການສ້າງອາຊີບຄົງທີ່ໃຫ້ປະຊາຊົນ ແມ່ນມາດຕະການຍຸດທະສາດ ແລະ ພື້ນຖານຍາວນານຂອງພັກ” ແລະ ແມ່ນຄວາມຮັບຜິດຊອບຕົ້ນຕໍຂອງຄະນະພັກ ແລະ ອົງການປົກຄອງທຸກຂັ້ນ, ການສ້າງສາພັດທະນາເສດຖະກິດຄອບຄົວແມ່ນເລີ່ມຈາກບຸກຄົນ, ຄອບຄົວທີ່ມີຄວາມຕື່ນຕົວທາງດ້ານການເມືອງ, ເຂົ້າໃຈແຈ້ງຕໍ່ແນວທາງການນໍາພາຂອງພັກ, ປະຕິບັດ ແລະ ເຄົາລົບລະບຽບກົດໝາຍຂອງລັດ, ທຳມາຫາກິນ ຖືກຕ້ອງຕາມລະບຽບກົດໝາຍ, ຂະຫຍັນໝັ່ນພຽນ, ປະຍັດມັດທະຍັດສ້າງລາຍຮັບເຂົ້າສູ່ຄອບຄົວ ນັບມື້ນັບເພີ່ມຂຶ້ນເຮັດໃຫ້ຄອບຄົວມີຄວາມອົບອຸ່ນ, ສະມາຊິກພາຍໃນຄອບຄົວມີສຸຂະພາບແຂງແຮງດີ, ມີເງິນ ສົ່ງລູກໃຫ້ໄດ້ຮັບການສຶກສາຮ່ຳຮຽນໃນລະດັບຕ່າງໆ. ຍາມເຈັບເປັນກໍມີເງິນຊື້ຢາປິ່ນປົວ, ປ່ຽນແທນຈາກຄວາມ ອຶດຢາກ ຂາດເຂີນ ກາຍມາເປັນກິນອີ່ມນຸ່ງອຸ່ນ, ກິນແຊບນຸ່ງງາມ, ມີເວລາປະກອບສ່ວນເຂົ້າໃນວຽກ ງານການປົກປັກຮັກສາ ແລະ ພັດທະນາ ບ້ານຂອງຕົນ ກໍຄືເມືອງວຽງພູຄາ ໃຫ້ມີຄວາມຮັ່ງມີເຂັ້ມແຂງຂຶ້ນເລື້ອຍໆ.
ທ່ານຫົວໜ້າຫ້ອງການກະສິກໍາ ແລະ ປ່າໄມ້ເມືອງວຽງພູຄາ ຍັງໃຫ້ຮູ້ຕື່ມວ່າ:  ປະເທດອິນເດຍຍັງໄດ້ສົ່ງເສີມສະໜັບສະໜູນໂຄງການເຫັນຜົນໄວຫຼາຍໆໂຄງການໃນ ສປປ ລາວ ເຊັ່ນ: ການສະໜັບສະໜູນດ້ານສາທາລະນະສຸກ, ການສຶກສາ, ການສ້າງໂຮງງານນ້ຳດື່ມ, ກະສິກຳ ແລະ ອື່ນໆ, ທີ່ໄດ້ເນັ້ນຊ່ວຍເຂດຫ່າງໄກຊອກຫຼີກໃນແຂວງຕ່າງໆຂອງປະເທດລາວ.
ໂຄງການສົ່ງເສີມປູກກາເຟ ອິນຊີ ຢູ່ ບ້ານ ນໍ້າວາງ  ເມືອງວຽງພູຄາ  ແຂວງຫຼວງນໍ້າທາ ກໍແມ່ນໂຄງການໜຶ່ງທີ່ໄດ້ໃຫ້ການຊ່ວຍເຫຼືອໃຫ້ແກ່ ແຂວງຫຼວງນໍ້າທາ ຊຶ່ງໄດ້ຈັດຕັ້ງປະຕິບັດເລີ່ມແຕ່ປີ 2018ເປັນຕົ້ນມາ ຊຶ່ງທາງໂຄງການໄດ້ຮັບທຶນສະໜັບສະໜູນຂອງອົງການສະຫະປະຊາຊາດ ກ່ຽວກັບການປົກປັກຮັກສາສິ່ງແວດລ້ອມ ຈຳນວນ 50.000 ໂດລາ ໂດຍໄດ້ສຸມໃສ່ການປູກກາເຟ, ໄມ້ໃຫ້ໝາກ, ກ້ວຍ, ລ້ຽງແບ້ ແລະ ລ້ຽງເຜິ້ງມາຮອດປີ 2020 ໄດ້ຮັບທຶນຊ່ວຍເຫຼືອຈາກລັດຖະບານຝຣັ່ງ ຈຳນວນ 35.000 ໂດລາ, ໃນການສ້າງຄວາມເຂັ້ມແຂງ ແລະ ການຕະຫຼາດ ໃນການປູກກາເຟ; ໃນປີ 2021 ໄດ້ຮັບທຶນຊ່ວຍເຫຼືອຈາກສະຖານທູດອິນເດຍປະຈຳ ສປປ ລາວ ຈຳນວນ 35.000 ໂດລາ, ທຶນກໍ່ສ້າງໂຮງງານປຸງແຕ່ງກາເຟອິນຊີ ຈົນໄດ້ຮັບຜົນສຳເລັດ. 
ໃນປີ 2024 ນີ້ ໄດ້ຮັບທຶນຈາກລັດຖະບານຝຣັ່ງ ຈຳນວນ 50.000 ໂດລາ ຊຶ່ງຈະໄດ້ສຸມໃສ່ການປູກຝັງ, ລ້ຽງສັດ ຢູ່ເມືອງວຽງພູຄາ ແຂວງຫຼວງນໍ້າທາ, ປັດຈຸບັນມີຄອບຄົວເປົ້າໝາຍໃນການປູກກາເຟອີນຊີ 30 ຄອບຄົວ, ໃນເນື້ອທີ່ 45 ເຮັກຕາ, ລ້ຽງແບ້ 16 ຄອບຄົວ, ນອກຈາກນີ້ ຍັງຈະໄດ້ປູກກ້ວຍ, ປູກໄມ້ໃຫ້ໝາກ ແລະ ໝາກແໜ່ງກວາງຕຸງຈຳນວນໜຶ່ງ.
ຂ່າວ-ພາບ: ສົມພອນ ຂຸນດາວົງ