 |
ທ່ານ ວາລະສິນ ດາລາພອນ ກ່າວເປີດກອງປະຊຸມວ່າ: ກອງປະຊຸມຄັ້ງນີ້, ເປັນການສ້າງຂະບວນການຕ້ອນຮັບວັນສຳຄັນປະຫວັດສາດຂອງຊາດ ແລະ ການຕ້ອນຮັບກອງປະຊຸມໃຫຍ່ ຜູ້ແທນອົງຄະນະພັກທະນາຄານແຫ່ງ ສປປ ລາວ ຄັ້ງທີ V ທີ່ຈະຈັດຂຶ້ນໃນໄວໆນີ້. ທັງເປັນການຊົມເຊີຍວັນສ້າງຕັ້ງ ທະນາຄານແຫ່ງ ສປປ ລາວ (ວັນທີ່ 7 ຕຸລາ) ຄົບຮອບ 57 ປີ ແລະ ຜົນສຳເລັດຂອງກອງປະຊຸມໃຫຍ່ ຜູ້ແທນອົງຄະນະພັກແຂວງຫຼວງພະບາງ ຄັ້ງທີ IX. ທັງເປັນຂະບວນການເຜີຍແຜ່ຂໍ້ມູນຂ່າວສານ ທີ່ກ່ຽວຂ້ອງກັບຕົວຊີ້ວັດ ເສດຖະກິດມະຫາພາກ ແລະ ບັນດານະໂຍບາຍ, ເປັນເວທີແລກປ່ຽນຄວາມເຫັນລະຫວ່າງພາກລັດ ແລະ ເອກະຊົນ ກ່ຽວກັບສະພາບຄວາມຫຍຸ້ງຍາກ ດ້ານເສດຖະກິດ-ການເງິນໃນຊຸມປີຜ່ານມາ ແລະ ປະກົດການຫຼອກລວງດ້ານການເງິນ ຜ່ານຊ່ອງທາງອອນລາຍ ໃນແຕ່ລະຮູບແບບ.
ໃນກອງປະຊຸມ, ຜູ້ເຂົ້າຮ່ວມໄດ້ຮັບຟັງການເຜີຍແຜ່ເອກະສານທີ່ສຳຄັນ ເຊັ່ນ: ການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ ສຳລັບການພັດທະນາເສດຖະກິດໃນຍຸກໃໝ່, ຂັ້ນຕອນການເພີ່ມທຶນຈົດທະບຽນ ຂອງສະຖາບັນການເງິນ ທີ່ບໍ່ແມ່ນທະນາຄານ ແລະ ຂັ້ນຕອນ ການປັບປຸງທຶນຮຸນ, ການປັບປຸງໂຄງປະກອບການຈັດຕັ້ງ, ການຍົກຍ້າຍສະຖານທີ່ຕັ້ງ ສຳນັກງານຂອງສະຖາບັນການເງິນ ທີ່ບໍ່ແມ່ນທະນາຄານ. ຈາກນັ້ນ, ຜູ້ເຂົ້າຮ່ວມໄດ້ແລກປ່ຽນຄຳເຫັນ ຕໍ່ຂໍ້ຄົງຄ້າງຂອງການຈັດຕັ້ງປະຕິບັດວຽກງານ ໃນໄລຍະຜ່ານມາ ເພື່ອເຮັດໃຫ້ ການປະຕິບັດວຽກງານໃນຕໍ່ໜ້າ ບັນລຸຜົນສຳເລັດຕາມຈຸດປະສົງ ແລະ ເປົ້າໝາຍທີ່ກຳນົດໄວ້.
(ຂ່າວ: ທະນູສີນ ອິດທິພົນ)
ຄໍາເຫັນ