ໃນວັນທີ 8 ກໍລະກົດ 2026 ທີ່ ຄອສພ ວ່າ: ກອງປະຊຸມສື່ມວນຊົນທົ່ວປະເທດຄັ້ງທີ I ແມ່ນມີຄວາມສໍາຄັນທາງປະຫວັດສາດ ເນື່ອງຈາກວ່າໃນໄລຍະຜ່ານມາ ການຈັດຕັ້ງກອງປະຊຸມໃນລັກສະນະນີ້ ແມ່ນບໍ່ທັນໄດ້ຮັບການຈັດຕັ້ງປະຕິບັດ; ແຕ່ກໍໄດ້ມີການຊີ້ນຳຢ່າງໃກ້ຊິດຈາກຄະນະພັກຄະນະນຳ ຂອງອົງການສື່ມວນຊົນຂຶ້ນກັບ. ພາຍຫຼັງໄດ້ໂອນສື່ມວນຊົນມາຂຶ້ນກັບຄະນະໂຄສະນາອົບຮົມສູນກາງພັກ ເຫັນວ່າ ວຽກງານສື່ມວນຊົນມີຄວາມສຳຄັນທີ່ສຸດໃນການເປັນກະບອກສຽງອັນແຫຼມຄົມໃຫ້ແກ່ພັກໃນການໂຄສະນາເຜີຍແຜ່ ແນວທາງ, ແຜນນະໂຍບາຍຂອງພັກ, ລັດ ພ້ອມທັງຕໍ່ສູ້ປົກປ້ອງຕ້ານທັດສະນະຜິດເຂວ, ຕ້ານການບິດເບືອນຂອງຄົນບໍ່ດີ. ໃນຕົ້ນປີ 2026 ນີ້ ກົມການເມືອງສູນກາງພັກຈຶ່ງໄດ້ ອອກມະຕິຕົກລົງ, ເລກທີ 23/ກມສພ, ລົງວັນທີ 24 ກຸມພາ 2026 ວ່າດ້ວຍການແຕ່ງຕັ້ງຄະນະຮັບຜິດຊອບລວມໃນການກະກຽມດຳເນີນກອງປະຊຸມວຽກງານສື່ມວນຊົນທົ່ວປະເທດຄັ້ງທີ I. ຈາກນັ້ນກໍມີຂໍ້ຕົກລົງແບ່ງຄວາມຮັບຜິດຊອບພາຍໃນລວມມີ: 1. ໜ່ວຍງານເນື້ອໃນ, 2.ໜ່ວຍງານໂຄສະນາ-ຂະບວນການ, 3. ໜ່ວຍງານປ້ອງກັນ ແລະ ຮັກສາສຸຂະພາບ, 4. ໜ່ວຍງານປິ່ນອ້ອມ ເປັນຕົ້ນ: ໜ່ວຍງານເສດຖະກິດ, ບຸກຄະລາກອນ ແລະ ບໍລິຫານພິທີການ. ການກະກຽມກອງປະຊຸມສື່ມວນຊົນທົ່ວປະເທດຄັ້ງທີ I ແມ່ນໄດ້ລິເລີ່ມພາຍຫຼັງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XII ຂອງພັກສິ້ນສຸດລົງ.ໃຊ້ເວລາປະມານ 5 ເດືອນ. ມາເຖິງປັດຈຸບັນທັງ 4 ໜ່ວຍງານທີ່ໄດ້ແບ່ງປັນຄວາມຮັບຜິດຊອບແມ່ນມີຄວາມພ້ອມຮອບດ້ານ.
ທ່ານໃຫ້ຮູ້ຕື່ມວ່າ: ເພື່ອແນໃສ່ສ້າງການຫັນປ່ຽນຢ່າງແຂງແຮງ ຮອບດ້ານໃນຂົງເຂດສື່ມວນຊົນ ເປັນຕົ້ນ ກອງປະຊຸມຈະໄດ້ຕີລາຄາຄືນການຈັດຕັ້ງປະຕິບັດບັນດານິຕິກຳ ກໍຄືການປະຕິບັດພາລະບົດບາດຂອງສື່ມວນຊົນ, ກວດກາເບິ່ງໂຄງປະກອບກົງຈັກການຈັດຕັ້ງ, ພະນັກງານເຮັດວຽກງານສື່; ການພັດທະນາພື້ນຖານໂຄງລ່າງ, ວັດຖຸເຕັກນິກ ແລະ ບໍລິຫານການເງິນ ໃຫ້ມີຄວາມເປັນລະບົບ ແລະ ເຂັ້ມແຂງ; ພ້ອມທັງວາງແຜນພັດທະນາວຽກງານສື່ໄປສູ່ຄຸນນະພາບໃໝ່.
ນອກຈາກສະຫຼຸບຕີລາຄາການເຄື່ອນໄຫວຂອງສື່ມວນຊົນແລ້ວ, ຍັງຈະໄດ້ຈັດຝຶກອົບຮົມໃຫ້ຖັນແຖວສື່ມວນຊົນ ລວມມີ 3 ບົດ ຂຶ້ນບັນຍາຍຄື: ເພີ່ມທະວີບົດບາດການນໍາພາຂອງພັກຕໍ່ວຽກງານສື່ມວນຊົນ; ຍົກສູງຈັນຍາບັນຂອງສື່ມວນຊົນ ແລະ ການເຊື່ອມຊຶມນິຕິກຳ ແລະ ກົດໝາຍກ່ຽວຂ້ອງກັບວຽກງານສື່ມວນຊົນ. ບົນພື້ນຖານກອງປະຊຸມ ຈະໄດ້ອອກມະຕິຂອງກົມການເມືອງສະບັບໃໝ່ ປ່ຽນແທນມະຕິ ເລກທີ 36/ກມສພ ທີ່ໄດ້ປະກາດໃຊ້ແຕ່ປີ 1993. ເພື່ອສ້າງການຫັນປ່ຽນວຽກງານສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ, ໄດ້ຮັບການພັດທະນາຮອບດ້ານ. ສ້າງໃຫ້ສື່ມວນຊົນປະຕິບັດບົດບາດຄົບ 4 ລັກສະນະຂອງຕົນຄື: ລັກສະນະຕົວຈິງ, ລັກສະນະສຶກສາອົບຮົມ, ລັກສະນະແນະນຳ ແລະ ລັກສະນະຕໍ່ສູ້; ພ້ອມທັງ ປະຕິບັດໃຫ້ເປັນຈິງແນວຄິດຊີ້ນຳຂອງສະຫາຍເລຂາທິການໃຫຍ່ທີ່ວ່າ: ສື່ມວນຊົນແມ່ນຜູ້ທີ່ປາກອອກແສງ, ຜູ້ທີ່ແທງເຖິງໃຈ, ສະດຸ້ງໄວເມື່ອໄດ້ອ່ານ, ຜູ້ກ້າຜ່ານອຸປະສັກ, ຜູ້ມັກຄວາມຈິງ ແລະ ຜູ້ຍິງຖືກຕ້ອງ; ຢາກໃຫ້ສື່ມວນຊົນຖືເອົາແນວຄິດຊີ້ນຳນີ້ໄປປະຕິບັດໃຫ້ເປັນຈິງ.
ໂອກາດດັ່ງກ່າວ ທ່ານຫົວໜ້າຄະນະໂຄສະນາອົບຮົມສູນກາງພັກ ໄດ້ຮຽກຮ້ອງ ມາຍັງສື່ມວນຊົນທົ່ວປະເທດຈົ່ງຮັກສາມູນເຊື້ອໃນອະດີດ, ປັດຈຸບັນ ແລະ ສືບຕໍ່ເສີມຂະຫຍາຍຜົນງານຂອງຕົນໃຫ້ສູງເດັ່ນຂຶ້ນ. ປະຕິບັດບົດບາດເປັນກະບອກສຽງອັນແຫຼມຄົມໃຫ້ພັກ; ປະຕິບັດກົດໝາຍໃຫ້ເຂັ້ມງວດ ແລະ ມີຈັນຍາບັນອາຊີບ. ເພື່ອແນໃສ່ພັດທະນາສື່ມວນຊົນໄປສູ່ຄຸນນະພາບໃໝ່ຢ່າງແຂງແຮງ.
ກອງປະຊຸມວຽກງານສື່ມວນຊົນທົ່ວປະເທດຄັ້ງທີ I ຈະໄດ້ຈັດຂຶ້ນໃນວັນທີ 13 ຫາ 15 ກໍລະກົດ 2026 ທີ່ໃກ້ຈະມາເຖິງນີ້ ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ
ຂ່າວ: ຍຸພິນທອງ
ຄໍາເຫັນ