ຄອສພ ສຸມໃສ່ປັບປຸງ-ກໍ່ສ້າງພັກ ຍົກສູງບົດບາດ ແລະ ຄວາມສາມາດນໍາພາທີ່ເຂັ້ມແຂງຂອງພັກໃນໄລຍະໃໝ່

ໂດຍສະເພາະວຽກງານກໍ່ສ້າງພັກ ໄດ້ເອົາໃຈໃສ່ນໍາພາ-ຊີ້ນໍາວຽກງານປັບປຸງ ແລະ ກໍ່ສ້າງພັກ ເປັນຂອດຕັດສິນໃຫ້ການຈັດຕັ້ງປະຕິບັດແນວທາງແຜນນະໂຍບາຍຂອງພັກໃນແຕ່ລະໄລຍະ. ໃນໄລຍະ 5 ປີຜ່ານມາ ໄດ້ສຸມໃສ່ປັບປຸງ-ກໍ່ສ້າງພັກທັງ 4 ດ້ານໄປພ້ອມໆກັນ ເພື່ອຍົກສູງບົດບາດ ແລະ ຄວາມສາມາດໃນການນໍາພາທີ່ເຂັ້ມແຂງຂອງພັກໃນໄລຍະໃໝ່ເຂັ້ມແຂງຂຶ້ນ; ຈັດຕັ້ງເຊື່ອມຊຶມເອກະສານມະຕິ-ຄໍາສັ່ງຕ່າງໆຂອງພັກ-ລັດ ເປັນວຽກງານສໍາຄັນ ແລະ ເຮັດຢ່າງຕໍ່ເນື່ອງ ທັງທາງກວ້າງ ແລະ ເລິກ ດ້ວຍຫຼາຍຮູບການ ແລະ ວິທີການ ເປັນຕົ້ນການຈັດຕັ້ງຄົ້ນຄວ້າ, ເຊື່ອມຊຶມ ເພື່ອກຳແໜ້ນ ແລະ ປະຕິບັດກົດລະບຽບຂອງພັກ ສະໄໝທີ XI, ມະຕິກອງປະຊຸມໃຫຍ່ ຄັ້ງທີ XI ຂອງພັກ ແລະ ບັນດາມະຕິກອງປະຊຸມຄົບຄະນະບໍລິຫານງານສູນກາງພັກ ສະໄໝທີ XI. ຄຽງຄູ່ກັນນັ້ນ, ໄດ້ຈັດຕັ້ງປະຕິບັດມະຕິກອງປະຊຸມໃຫຍ່ ຂອງອົງຄະນະພັກ ຄອສພ ຄັ້ງທີ V ຢ່າງກວ້າງຂວາງ, ໄດ້ຮັບການຜັນຂະຫຍາຍເຂົ້າສູ່ລວງເລິກ, ແຂງແຮງ ແລະ ຮອບດ້ານ ເຮັດໃຫ້ສະມາຊິກພັກ, ພະນັກງານ-ລັດຖະກອນ ທົ່ວອົງຄະນະພັກມີຄວາມຮັບຮູ້, ເຂົ້າໃຈ, ເຊື່ອໝັ້ນ ແລະ ເອກະພາບກັນສູງຕໍ່ແນວທາງແຜນນະໂຍບາຍຂອງພັກ ກໍຄືທິດທາງໜ້າທີ່ ຂອງຄະນະບໍລິຫານງານພັກວາງອອກໃນແຕ່ລະໄລຍະຢ່າງເລິກເຊິ່ງ, ນໍາໄປຈັດຕັ້ງຜັນຂະຫຍາຍເຂົ້າໃນວຽກງານຢ່າງປະດິດສ້າງ ແລະ ມີຜົນສໍາເລັດ; ເອົາໃຈໃສ່ປັບປຸງ-ກໍ່ສ້າງພັກທາງດ້ານການຈັດຕັ້ງໄດ້ຍູ້ແຮງການປະຕິບັດແນວທາງການຈັດຕັ້ງຂອງພັກ ໂດຍຢຶດໝັ້ນກົດລະບຽບພັກ ຊຶ່ງໄດ້ເຮັດໃຫ້ກົງຈັກການຈັດຕັ້ງພັກ, ໜ່ວຍພັກ, ມີຄວາມປອດໃສ, ເຂັ້ມແຂງ, ໜັກແໜ້ນຂຶ້ນເລື້ອຍໆ, ການຈັດຕັ້ງພັກໄດ້ເຕີບໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບເທື່ອລະກ້າວ.
ໂຄງປະກອບຂອງຄະນະໜ່ວຍພັກສ່ວນຫຼາຍແມ່ນຖືກຕາມທິດທີ່ກຳນົດໄວ້ໃນການປະຕິບັດລະ ບອບຄວບຕຳແໜ່ງ, ດ້ານແບບແຜນວິທີເຮັດວຽກ, ວິທີນໍາພາ ໄດ້ຮັບການປັບປຸງ ແລະ ມີການຫັນປ່ຽນໃນທາງທີ່ດີຂຶ້ນ. ຄຽງຄູ່ກັນນັ້ນ, ກໍໄດ້ສຸມໃສ່ປັບປຸງກົງຈັກການຈັດຕັ້ງລັດແກ້ໄຂການຊໍ້າຊ້ອນ ແລະ ກ້າວກ່າຍກັນ ຕາມທິດກະທັດຮັດ, ເຂັ້ມແຂງ ແລະ ໜັກແໜ້ນ; ການບຳລຸງກໍ່ສ້າງສະມາຊິກພັກ-ພະນັກງານ ໄດ້ດໍາເນີນໄປຢ່າງຕໍ່ເນື່ອງໂດຍການກໍ່ສ້າງ-ຍົກລະດັບຢູ່ໃນລະບົບໂຮງຮຽນໄລຍະສັ້ນ-ຍາວ ທັງຢູ່ພາຍໃນ-ຕ່າງປະເທດ ແລະ ສ້າງພະນັກງານກັບທີ່ຕິດພັນກັບວຽກງານຕົວຈິງ; ການດໍາເນີນຊີວິດການເມືອງກາງສະໄໝ ແລະ ທ້າຍສະໄໝໃນທົ່ວອົງຄະນະພັກ ຄອສພ ໄດ້ດໍາເນີນໄປດ້ວຍບັນຍາກາດຟົດຟື້ນ ແລະ ມີເນື້ອໃນຄວາມໝາຍເລິກເຊິ່ງ; ການປັບປຸງປົວແປງພາຍໃນພັກໄດ້ເປັນເຄື່ອງມືສໍາຄັນ ເພື່ອຍູ້ແຮງການກໍ່ສ້າງ-ປັບປຸງພັກໃຫ້ປອດໃສ, ເຂັ້ມແຂງ, ໜັກແໜ້ນ; ການຕີລາຄາຄຸນນະພາບຂອງໜ່ວຍພັກ ແລະ ແບ່ງປະເພດສະມາຊິກພັກ ໄດ້ກາຍເປັນມາດຕະການສໍາຄັນໃນການກໍ່ສ້າງພັກ.
ໃນປີ 2025, ຄະນະບໍລິຫານງານສູນກາງພັກ ອອກມະຕິວ່າດ້ວຍການປັບປຸງການຈັດຕັ້ງ ສະບັບເລກທີ 03/ຄບສພ, ລົງວັນທີ 12 ມີນາ 2025, ສະພາແຫ່ງຊາດ ໄດ້ຮັບຮອງມະຕິວ່າດ້ວຍການຮັບຮອງເອົາກົງຈັກລັດຖະບານ ສະບັບເລກທີ 05/ສພຊ, ລົງວັນທີ 20 ມີນາ 2025. ໃນນັ້ນ, ໄດ້ໂອນເອົາວຽກງານຖະແຫຼງຂ່າວ ພ້ອມດ້ວຍອາຄານສະຖານທີ່, ພາຫະນະອຸປະກອນຮັບໃຊ້ວຽກງານ ແລະ ຍົກຍ້າຍພະນັກງານ-ລັດຖະກອນຂົງເຂດສື່ມວນຊົນ ຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ( ຖວທ) ມາຂຶ້ນກັບ ຄອສພ ແລະ ໄດ້ປັບປຸງພາລະບົດບາດວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງ ຄອສພ ສະບັບເລກທີ 20/ກມສພ ມາເປັນສະບັບເລກທີ 22/ກມສພ, ລົງວັນທີ 23 ກຸມພາ 2026 ຊຶ່ງປະກອບມີທັງໝົດ 14 ກົມທຽບເທົ່າ. ພ້ອມນັ້ນ, ກໍໄດ້ສັບຊ້ອນຈັດວາງພະນັກງານຂັ້ນຫົວໜ້າກົມ, ຮອງຫົວໜ້າກົມ, ຂັ້ນພະແນກ ແລະ ວິຊາການຈໍານວນໜຶ່ງ ຕາມຄວາມເໝາະສົມ ແລະ ສອດຄ່ອງຕາມນິຕິກຳທີ່ກ່ຽວຂ້ອງກໍານົດໄວ້. ຄຽງຄູ່ກັນນັ້ນ, ການຈັດຕັ້ງພັກ ກໍໄດ້ປັບປຸງໃຫ້ສອດຄ່ອງກັບກົງຈັກການຈັດຕັ້ງລັດ. ພາຍຫຼັງການປັບປຸງກົງຈັກການຈັດຕັ້ງເຫັນວ່າວຽກງານຂອງ ຄອສພ ໄດ້ມີການຂັບເຄື່ອນດີຂຶ້ນ, ບາງບັນຫາຄົງຄ້າງໄດ້ຮັບການປັບປຸງແກ້ໄຂ, ໂດຍສະເພາະບຸກຄະລາກອນຂັ້ນກົມ ແມ່ນໄດ້ຮັບການປັບປຸງ, ສັບຊ້ອນ ແລະ ຈັດວາງຕາມທິດຫັນເປັນໜຸ່ມ ແລະ ໜັກແໜ້ນ, ການກໍ່ສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ແມ່ນໄດ້ມີການປັບປຸງ ແລະ ດໍາເນີນຕາມຂັ້ນຕອນທີ່ກຳນົດໄວ້.
ດ້ານການຈັດຕັ້ງພັກ, ຄະນະບໍລິຫານງານພັກ ໄດ້ຄົ້ນຄວ້າປັບປຸງກົງຈັກການຈັດຕັ້ງພັກ ໄປຕາມການປັບປຸງກົງຈັກການຈັດຕັ້ງລັດ, ປັດຈຸບັນ ຄະນະບໍລິຫານງານພັກ ຄອສພ ຊຸດທີ V ປະກອບມີທັງໝົດ 11 ສະຫາຍ ຍິງ 2 ສະຫາຍ ໄປຮັບໜ້າທີ່ໃໝ່ຢູ່ບ່ອນປະຈໍາການໃໝ່ 2 ສະຫາຍ ຍິງ 1 ສະຫາຍ, ບຳນານ 2 ສະຫາຍ ຍິງ 1 ສະຫາຍ; ມີ 2 ຄະນະພັກຮາກຖານ, ມີ 26 ໜ່ວຍພັກ. ໃນນັ້ນ, ໜ່ວຍພັກບຳນານ 3 ໜ່ວຍພັກ, ມີ 11 ໜ່ວຍພັກຂຶ້ນກັບຄະນະພັກຮາກຖານ, ມີສະມາຊິກພັກທັງໝົດ 543 ສະຫາຍ, ຍິງ 217 ສະຫາຍ (ໃນນັ້ນ, ສະມາຊິກພັກສໍາຮອງ 30 ສະຫາຍ ຍິງ 15 ສະຫາຍ), ສະມາຊິກພັກບຳນານ 119 ສະຫາຍ ຍິງ 37 ສະຫາຍ, ຖ້າທຽບໃສ່ກ່ອນກອງປະຊຸມໃຫຍ່ ຄັ້ງທີ V ໜ່ວຍພັກ ເພີ່ມຂຶ້ນ 15 ໜ່ວຍພັກ.