ໂດຍ: ຕະວິນຍານ
ເນື່ອງໃນໂອກາດວັນສ້າງຕັ້ງພັກປະຊາຊົນປະຕິວັດລາວຄົບຮອບ 69 ປີ (22/3/1955-22/3/2024), ສະຫາຍຈັນສະໝອນ ພົມມະແສງ ຄະນະປະຈໍາພັກແຂວງຫົວໜ້າຄະນະໂຄສະນາ ອົບຮົມແຂວງສາລະວັນໄດ້ສະແດງຄວາມຮູ້ສຶກຜ່ານໜັງສືພິມປະຊາຊົນວ່າ: ວັນທີ 22 ມີນາ 1955 ແມ່ນວັນສ້າງຕັ້ງພັກປະຊາຊົນປະຕິວັດລາວ ຂຶ້ນຢ່າງເປັນທາງການຊຶ່ງແຍກອອກຈາກພັກກອມມູນິດອິນດູຈີນ, ການສ້າງຕັ້ງພັກແມ່ນເຫດການອັນສໍາຄັນທາງປະຫວັດສາດຂອງຊາດ,ແມ່ນໝາກຜົນລວມຍອດຂອງການປະຕິວັດຊາດ-ປະຊາທິປະໄຕ ທີ່ໄດ້ດໍາເນີນມາຫຼາຍສິບປີ ພາຍໃຕ້ການນໍາພາອັນປີຊາສາມາດຂອງພັກເຮົາ, ແມ່ນໄຊຊະນະຂອງກໍາລັງມະຫາສາມັກຄີທົ່ວປວງຊົນ ແລະ ຄວາມເປັນອັນໜຶ່ງອັນດຽວຂອງກອງທັບປະຊາຊົນລາວທີ່ໄດ້ເສີມຂະຫຍາຍມູນເຊື້ອຮັກຊາດອັນດູດດື່ມ, ຄວາມອົງອາດກ້າແກ່ນ ແລະ ເດັດດ່ຽວຕໍ່ສູ້ບໍ່ອ່ອນຍອມຂອງຊາດລາວເຮົາ ໂດຍມີ ປະທານ ໄກສອນ ພົມວິຫານ, ປະທານ ສຸພານຸວົງ ຜູ້ນໍາທີ່ແສນເຄົາລົບຂອງປະຊາຊົນລາວບັນດາເຜົ່າ, ທີ່ໄດ້ອຸທິດຊີວິດ,ສະຕິປັນຍາ, ເຫື່ອແຮງຂອງຕົນດ້ວຍຄວາມເສຍສະຫຼະເພື່ອ ປະເທດຊາດ, ເພື່ອການປະຕິວັດ ໄດ້ນໍາເອົາເອກະລາດແຫ່ງຊາດມາໃຫ້ພວກເຮົາໄດ້ດໍາລົງຄົງຢູ່ຈົນເທົ່າທຸກວັນນີ້.
ເວົ້າສະເພາະ ແຂວງສາລະວັນຂອງພວກເຮົາ ໃນຕະຫຼອດ 69 ປີຜ່ານມາ, ພາຍໃຕ້ການນໍາພາຂອງພັກ, ອົງຄະນະພັກທຸກຂັ້ນ ໄດ້ເຮັດໃຫ້ແຂວງມີສະຖຽນລະພາບດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບ ເປັນລະບຽບຮຽບຮ້ອຍ ແຂວງໄດ້ຮັບການພັດທະນາຢ່າງຕໍ່ເນື່ອງ ບໍ່ວ່າທາງດ້ານເສດຖະກິດ-ສັງຄົມ ມີທ່າກ້າວຂະຫຍາຍຕົວ ອັນພົ້ນເດັ່ນແມ່ນສາມາດເຮັດໃຫ້ຊີວິດການເປັນຢູ່ຂອງສະມາຊິກພັກ-ພະນັກງານ-ລັດຖະກອນ ແລະ ປະຊາຊົນບັນດາເຜົ່າດີຂຶ້ນເປັນກ້າວໆ.
ໃນນາມຄະນະໂຄສະນາອົບຮົມແຂວງສາລະວັນ ກໍໄດ້ປະກອບສ່ວນປະຕິບັດຕາມພາລະບົດບາດຂອງຕົນຢ່າງຖືກຕ້ອງ ແລະ ເຕັມສ່ວນ ໃນນັ້ນໄດ້ສຸມໃສ່ວຽກງານສຶກສາອົບຮົມການເມືອງ- ແນວຄິດ, ວຽກພັກ-ພະນັກງານ ແລະ ປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງ, ເຜີຍແຜ່ເຊື່ອມຊຶມ, ປະຫວັດການກໍາເນີດ, ທາດແທ້, ອຸດົມການກໍຄືຜົນງານການນໍາພາຂອງພັກໃນຕະຫຼອດ ໄລຍະ 69 ປີຜ່ານມາ, ເພື່ອພ້ອມກັນນໍາເອົາມູນເຊື້ອ ແລະ ຜົນງານອັນຍິ່ງໃຫຍ່ຂອງພັກປະຊາຊົນ ປະຕິວັດລາວເຂົ້າໃນການຈັດຕັ້ງປະຕິບັດວຽກງານຕົວຈິງ ຂອງຂະແໜງການ ແລະ ເມືອງ ໃຫ້ບັນລຸຕາມຄາດໝາຍທີ່ພັກໄດ້ກໍານົດໄວ້.
ໃນຕໍ່ໜ້ານີ້,ຄະນະໂຄສະນາອົບຮົມແຂວງ ຈະຕັ້ງໜ້າປະຕິບັດພາລະບົດບາດ ໜ້າທີ່ຂອງຕົນໃຫ້ດີຂຶ້ນກວ່າເກົ່າ ແລະ ໃຫ້ສໍາເລັດຕາມຄາດໝາຍທີ່ວາງໄວ້ ໂດຍສະເພາະໄລຍະນີ້ ແມ່ນກໍາລັງດໍາເນີນກອງປະຊຸມສາມຂັ້ນ,ສືບຕໍ່ປະຕິບັດວາລະແຫ່ງຊາດ,ການແກ້ໄຂຄວາມທຸກຍາກ ແລະ ປຸກລະດົມຂະບວນການຮອບດ້ານເພື່ອສ້າງຂະບວນການຕ້ອນຮັບກອງປະຊຸມໃຫຍ່ຄັ້ງທີ IX ອົງຄະນະພັກແຂວງ.
ອີກເທື່ອໜຶ່ງ,ຂ້າພະເຈົ້າຂໍຈົດຈໍາບຸນຄຸນອັນໃຫຍ່ຫຼວງລ້ໍາຄ່າຂອງບັນດາຜູ້ນໍາຂອງພັກ, ລັດເຮົາຮຸ່ນກໍ່ຕັ້ງ ແລະ ຮຸ່ນຕໍ່ໆມາ, ລະລຶກເຖິງນັກຮົບ ແລະ ປະຊາຊົນບັນດາເຜົ່າ ທີ່ໄດ້ອຸທິດຕົນ, ເສຍສະຫຼະ ເລືອດເນື້ອເພື່ອປະເທດຊາດ ແລະ ປະຊາຊົນລາວເຮົາໃນໄລຍະທີ່ຜ່ານມາ ໄວ້ໃນສ່ວນເລິກຂອງຫົວໃຈຂອງ ພວກເຮົາຕະຫຼອດໄປ.
ວັນທີ 22 ມີນາ ໝັ້ນຍືນ !
ຄໍາເຫັນ