ການເລືອກຕັ້ງສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນຂັ້ນແຂວງ (ສສຂ) ແຕ່ລະຄັ້ງ ລ້ວນເປັນເຫດການທາງປະຫວັດສາດທີ່ສໍາຄັນຂອງຊາດ, ມີຄວາມໝາຍສໍາຄັນ ແລະ ຈຳເປັນໃນການເສີມຂະຫຍາຍສິດປະຊາທິປະໄຕ ຂອງປະຊາຊົນລາວບັນດາເຜົ່າ ໂດຍສະເພາະມະຕິກົມການເມືອງສູນກາງພັກ ກ່ຽວກັບການເພີ່ມທະວີການນໍາພາ-ຊີ້ນໍາຂອງອົງຄະນະພັກທຸກຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ໄດ້ເນັ້ນເຖິງຄວາມສໍາຄັນ ແລະ ຈຳເປັນ 4 ປະການ.
ເອກະສານທີ 1 ເຊື່ອມຊຶມ ແລະ ຜັນຂະຫຍາຍມະຕິກົມການເມືອງສູນກາງພັກ ກ່ຽວກັບການເພີ່ມທະວີການນໍາພາ-ຊີ້ນໍາຂອງອົງຄະນະພັກທຸກຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ໃຫ້ຮູ້ວ່າ: ມະຕິດັ່ງກ່າວໄດ້ເນັ້ນເຖິງຄວາມສໍາຄັນ ແລະ ຈຳເປັນ 4 ປະການ ໃນການເພີ່ມທະວີການນໍາພາ-ຊີ້ນໍາຂອງອົງ ຄະນະພັກທຸກຂັ້ນ ຕໍ່ການເລືອກຕັ້ງຄັ້ງນີ້ຄື: 1. ການເລືອກຕັ້ງ ສສຊ ແລະ ສສຂ ແຕ່ລະຄັ້ງລ້ວນເປັນເຫດການທາງປະຫວັດສາດທີ່ສໍາຄັນຂອງຊາດ, ມີຄວາມໝາຍສໍາຄັນ ແລະ ຈຳເປັນໃນການເສີມຂະຫຍາຍສິດປະຊາທິ ປະໄຕຂອງປະຊາຊົນລາວບັນດາເຜົ່າ ເພື່ອບູລະນະລະບອບປະຊາທິປະໄຕປະຊາຊົນ, ປັບປຸງລະບົບອຳນາດແຫ່ງລັດໃຫ້ມີຄວາມເຂັ້ມແຂງ; 2. ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V (2026-2030) ເປັນເຫດການ ການເມືອງທີ່ສໍາຄັນຍິ່ງຂອງຊາດ ຊຶ່ງດໍາເນີນໃນບັນຍາກາດທີ່ທົ່ວພັກ, ທົ່ວລັດ, ກຳລັງປະກອບອາວຸດ ແລະ ທົ່ວປວງຊົນລາວທັງຊາດສະເຫຼີມສະຫຼອງ 3 ວັນປະຫວັດສາດທີ່ຍິ່ງໃຫຍ່ຂອງຊາດ (ວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ, ວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 50 ປີ, ວັນເກີດປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປະຊາຊົນລາວບັນດາເຜົ່າ ຄົບຮອບ 105 ປີ) ແລະ ໃນບັນຍາກາດທີ່ອົງຄະນະພັກຂັ້ນຕ່າງໆ ໄດ້ສຳເລັດການດໍາເນີນກອງປະຊຸມໃຫຍ່ຂັ້ນຮາກຖານ, ຂັ້ນເມືອງ, ກະຊວງ, ອົງການ, ນະຄອນຫຼວງ, ແຂວງ ແລະ ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ; ພ້ອມກັບການປັບປຸງກົງຈັກການຈັດຕັ້ງບໍລິຫານປົກຄອງຂັ້ນລັດຖະ ບານ ແລະ ຂັ້ນທ້ອງຖິ່ນຢ່າງຂຸ້ນຂ້ຽວ (ທັງຍຸບ, ທັງໂຮມ, ທັງສ້າງຕັ້ງຂຶ້ນໃໝ່ຄື: ຄະນະກຳມະການປົກຄອງຕາ ແສງ); 3. ການເລືອກຕັ້ງຄັ້ງນີ້ ຢູ່ໃນທ່າມກາງທີ່ສະພາບການຂອງໂລກ ແລະ ພາກພື້ນພວມຜັນແປໄປຢ່າງສັບສົນ, ຄາດຄະເນໄດ້ຍາກ ຊຶ່ງມີທັງຂໍ້ສະດວກ ແລະ ສິ່ງທ້າທາຍ ຕໍ່ພາລະກິດປົກປັກຮັກສາ ແລະ ພັດທະ ນາປະເທດຊາດ. ຄຽງຄູ່ກັບຜົນສໍາເລັດອັນໃຫຍ່ຫຼວງຫຼາຍດ້ານ ໃນການປະຕິບັດແນວທາງປ່ຽນແປງໃໝ່ຂອງພັກນັ້ນ ຢູ່ພາຍໃນປະເທດພວກເຮົາຍັງປະເຊີນໜ້າກັບສິ່ງທ້າທາຍ ແລະ ຂໍ້ຫຍຸ້ງຍາກຫຼາຍຢ່າງ ເປັນຕົ້ນຄວາມຫຍຸ້ງຍາກທາງດ້ານເສດຖະກິດ-ການເງິນທີ່ແກ່ຍາວມາຫຼາຍປີ ແລະ ອິດທິກຳລັງປໍລະປັກ ກໍຍັງສືບຕໍ່ກົນອຸບາຍມ້າງເພທຳລາຍລະບອບໃໝ່ຂອງພວກເຮົາຢ່າງບໍ່ລົດລະ; 4. ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຈະມີພະນັກງານນໍາພາ-ຄຸ້ມຄອງຂັ້ນສູງຂອງພັກ ແລະ ລັດ ມີຈຳນວນທີ່ເພີ່ມຂຶ້ນອອກສະໝັກຮັບເລືອກຕັ້ງເປັນ ສສຊ ແລະ ສສຂ. ນອກນັ້ນ, ຍັງຈະມີຜູ້ສະໝັກຈາກຂົງເຂດຕ່າງໆ ຢູ່ສູນກາງ ແລະ ທ້ອງຖິ່ນ. ໃນນັ້ນ, ມີທັງຂົງເຂດທຸລະກິດ, ການຜະລິດ, ຊັ້ນຄົນ ແລະ ປັນຍາຊົນອີກຈໍານວນໜຶ່ງ.
ສະນັ້ນ, ການເພີ່ມທະວີການນໍາພາ-ຊີ້ນໍາຢ່າງໃກ້ຊິດ, ຕິດແທດຕົວຈິງຂອງອົງຄະນະພັກທຸກຂັ້ນ ຕໍ່ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຈຶ່ງມີຄວາມສໍາຄັນ ແລະ ຈໍາເປັນຢ່າງຍິ່ງ ເພື່ອເຮັດໃຫ້ການເລືອກຕັ້ງຄັ້ງນີ້ບັນລຸຜົນສໍາເລັດຕາມຈຸດປະສົງລະດັບຄາດໝາຍທີ່ວາງໄວ້.
ໂດຍ: ວັນເພັງ
ຄໍາເຫັນ