 |
ທ່ານ ອາລາວອນ ວົງສັນຕິ ຮອງປະທານຄະນະທີ່ປຶກສາດ້ານເສດຖະກິດຊາວໜຸ່ມລາວ ໄດ້ຂຶ້ນຜ່ານບົດສະຫຼຸບປະຈຳປີ 2024 ແລະ ທິດທາງແຜນການປີ 2025 ຂອງ ຄປຊລ ວ່າ: ຄປຊລ ປະກອບດ້ວຍບັນດາສະຫາຍທີ່ເປັນນັກທຸລະກິດ, ເປັນເຈົ້າຂອງບໍລິສັດ, ເຈົ້າຂອງກິດຈະການ, ເຈົ້າຂອງໂຄງການຕ່າງໆ ຊຶ່ງລ້ວນແຕ່ເປັນຜູ້ທີ່ມີຄວາມຮູ້-ຄວາມສາມາດ, ມີຄຸນທາດການເມືອງໜັກແໜ້ນ, ເຂົ້າໃຈຕໍ່ແນວທາງນະໂຍບາຍຂອງພັກ ລະບຽບກົດໝາຍຂອງລັດ, ມີແນວຄິດຫຼັກໝັ້ນ ແລະ ເຊື່ອໝັ້ນຕໍ່ແນວທາງຂອງພັກ ມີຄວາມມຸ່ງຫວັງຕັ້ງໃຈໃນການພັດທະນາເສດຖະກິດຕິດພັນກັບການພັດທະນາຊາວໜຸ່ມລາວ, ເຍົາວະຊົນບັນດາເຜົ່າໃຫ້ມີຄວາມເຂັ້ມແຂງໝັກແໜ້ນ, ປັດຈຸບັນ ຄປຊລ ປະກອບມີຄະນະບໍລິຫານງານ ແລະ ສະມາຊິກທັງໝົດ 55 ຄົນ ຍິງ 21 ຄົນ.
ຄປຊລ ເປັນເສນາທິການສະເພາະໃຫ້ຄະນະເລຂາທິການ ສຊປລ ໃນການຄົ້ນຄວ້າ, ໃຫ້ຄຳປຶກສາ, ຊຸກຍູ້ຊ່ວຍເຫຼືອສົ່ງເສີມການສ້າງເສດຖະກິດຂອງ ຄປຊລ ແຕ່ລະຂັ້ນ, ແບບແຜນວິທີການເຮັດວຽກແມ່ນປະຕິບັດຕາມຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະບຸກຄົນຮັບຜິດຊອບ, ການປະຕິບັດວຽກງານໄປຕາມຂັ້ນຕອນ, ມີການຄົ້ນຄວ້າປຶກສາຫາລື, ມີການສະຫຼຸບກວດກາປະເມີນຜົນ. ໃນໜຶ່ງປີຜ່ານມາ, ຄປຊລ ໄດ້ຈັດກອງປະຊຸມຕ່າງໆ ເພື່ອປຶກສາຫາລືວຽກງານຮ່ວມກັນ, ໄດ້ອອກໜັງສືສະເໜີຕ່າງໆ ແລະ ເຂົ້າຮ່ວມຂະບວນການຕ່າງໆ. ສຳລັບທິດທາງແຜນການປີ 2025 ແມ່ນຈະສືບຕໍ່ສຶກສາອົບຮົມການເມືອງແນວຄິດເຮັດໃຫ້ບັນດາສະຫາຍໃນ ຄປຊລ ມີຄຸນທາດການເມືອງສູງ, ກຳໄດ້ມະຕິ, ລະບຽບກົດໝາຍຂອງພັກ-ລັດ, ມີແນວຄິດຫຼັກໝັ້ນ ແລະ ເຊື່ອໝັ້ນຕໍ່ແນວທາງ ແລະ ນະໂຍບາຍຂອງພັກ-ລັດຂຶ້ນຕື່ມ ປັບປຸງແບບແຜນວິທີການເຮັດວຽກໃຫ້ສອດຄ່ອງກວ່າເກົ່າ, ສືບຕໍ່ປະຕິບັດວຽກງານວິຊາສະເພາະຕາມພາລະບົດບາດຂອງຕົນໃຫ້ປະສົບຜົນສຳເລັດຢ່າງຈົບງາມ, ເຂົ້າຮ່ວມປະກອບສ່ວນໃນຂະບວນການຕ່າງໆຂອງພັກ-ລັດ ໂດຍສະເພາະແມ່ນ ສຊປລ ວາງອອກໃນແຕ່ໄລຍະ, ສືບຕໍ່ຄົ້ນຄວ້າວຽກງານການພັດທະນາເສດຖະກິດຂອງ ສຊປລ ແລະ ຄປຊລ ແຕ່ລະຂັ້ນຕາມທ່າແຮງ ແລະ ຄວາມສາມາດປະກອບສ່ວນຊ່ວຍເຫຼືອ ຄຊປປລ ແຕ່ລະຂັ້ນ ແລະ ສັງຄົມຕາມຄວາມຮຽກຮ້ອງຕ້ອງການ ແລະ ຄວາມສາມາດຕົວຈິງ.
 |
ໂອກາດນີ້, ທ່ານ ທອງລີ ສີສຸລິດ ໄດ້ໃຫ້ກຽດມອບຫຼຽນຊາວໜຸ່ມຕະລຸມບອນ ແລະ ມອບໃບຍ້ອງຍໍ ຂອງສູນກາງຊາວໜຸ່ມລາວໃຫ້ບັນດາສະຫາຍ ຄປຊລ ທີ່ມີຜົນງານພົ້ນເດັ່ນໃນການເຄື່ອນໄຫວວຽກງານໃນໄລຍະຜ່ານມາເຊັ່ນ: ມອບໃບຍ້ອງຍໍຈຳນວນ 39 ຄົນ ແລະປະດັບຫຼຽນຊາວໜຸ່ມຕະລຸມບອນຈຳນວນ 29 ຄົນ. ພ້ອມທັງໃຫ້ກຽດໂອ້ລົມເພື່ອເປັນເຂັມຊີ້ທິດເຍືອງທາງ ເນັ້ນໜັກໃຫ້ ຄປຊລ ສືບຕໍ່ສຶກສາອົບຮົມການເມືອງແນວຄິດ,ປັບປຸງແບບແຜນວິທີເຮັດວຽກໃຫ້ສອດຄ່ອງກັບຄວາມເປັນຈິິງ.
ຂ່າວ-ຮູບ: ບຸນຕອມ
ຄໍາເຫັນ