ຊີມລົດຊາດທີ່ແທ້ຈິງຂອງເຂົ້າໜົມໄຫວ້ພະຈັນ ແລະ ສໍາຜັດເຖິງຄວາມຮູ້ສຶກທີ່ແທ້ຈິງຕໍ່ຄອບຄົວ ແລະ ປະເທດຊາດ

ກ່ອນບຸນໄຫວ້ພະຈັນປີ 2015 ໃກ້ຈະໝູນວຽນມາເຖິງ, ໃນໂອກາດເດີນທາງຢ້ຽມຢາມອາເມຣິກາທາງລັດຖະກິດຕາມຄຳເຊື້ອເຊີນ, ທ່ານ ສີຈິ້ນຜິງ ປະທານປະເທດຈີນໄດ້ເຂົ້າຮ່ວມງານລ້ຽງຕ້ອນຮັບທີ່ບຸກຄົນຈາກວົງການຊາວຈີນຕ່າງດ້າວຢູ່ນະຄອນຊີອາໂຕ ສະຫະລັດ ອາເມຣິກາ ຈັດຂຶ້ນຢ່າງສົມກຽດ, ເພື່ອຮ່ວມກັບພີ່ນ້ອງຮ່ວມຊາດຕ່າງດ້າວສະເຫຼີມສະຫຼອງບຸນໄຫວ້ພະຈັນລ່ວງໜ້າ.

ໃນງານລ້ຽງດັ່ງກ່າວ, ທ່ານ ສີຈິ້ນຜິງ ໄດ້ຍົກເອົາບາງຕອນໃນບົດກະວີຂອງຈ່າງຈິວຫຼິງ ນັກກະວີສະໄໝລາຊະວົງຖັງຂອງຈີນມາກ່າວວ່າ: “ຍິ່ງຢູ່ແດນຟ້າກວ້າງສຸດສາຍຕາຄວາມອາວອນຫາບ້ານເກີດຍິ່ງທົບເທົ່າທະວີຄູນ”. ນອກນັ້ນ, ເພິ່ນຍັງໄດ້ຕາງໜ້າໃຫ້ພີ່ນ້ອງທັງຊາດເອົາເຂົ້າໜົມໄຫວ້ພະຈັນຈາກບ້ານເກີດໄປຕ້ອນບັນດາພີ່ນ້ອງຮ່ວມຊາດຕ່າງດ້າວ, ເພິ່ນເວົ້າດ້ວຍຄວາມຮູ້ສຶກອັນເລິກເຊິ່ງວ່າ: “ພວກຂ້າພະເຈົ້າເດີນທາງມາອາເມຣິກາເທື່ອນີ້ໄດ້ນຳເອົາເຂົ້າໜົມໄຫວ້ພະຈັນຈຳນວນໜຶ່ງຈາກບ້ານເກີດມາໃຫ້ບັນດາທ່ານໄດ້ຊີມ, ນີ້ຄືນ້ຳໃຈເລັກໆນ້ອຍໆຈາກປະຊາຊົນຂອງຊາດ.”

ລົດຊາດຂອງບ້ານເກີດໃຫ້ຄວາມອົບອຸ່ນໃຈທີ່ສຸດ ແລະ ສາມາດປອບໂຍນຫົວໃຈຄົນທີ່ຢູ່ໄກບ້ານເກີດໄດ້ດີທີ່ສຸດ.

ກ່ອນມື້ບຸນໄຫວ້ພະຈັນປີ 1986 ຈະໝູນວຽນມາເຖິງ, ທ່ານ ສີຈິ້ນຜິງ ຮອງເຈົ້າຄອງນະຄອນເຊ້ຍເມີນ ແຂວງຟູຈ້ຽນ ໃນເວລານັ້ນໄດ້ຂີ່ລົດຖີບນຳເອົາເຂົ້າໜົມໄຫວ້ພະຈັນສອງກັບໄປຫໍພັກນັກສຶກສາມະຫາວິທະຍາໄລເຊ້ຍເມີນ ເພື່ອຮ່ວມສະຫຼອງບຸນໄຫວ້ພະຈັນກັບນັກສຶກສາຢູ່ທີ່ນັ້ນ, ໃນຈໍານວນນັກສຶກສາເຫຼົ່ານີ້ກໍມີທ່ານ ຈ່າງຫົງຫຼຽງ ລວມຢູ່ດ້ວຍ, ພາບອັນອົບອຸ່ນຕອນນັ້ນໄດ້ສ້າງຄວາມປະທັບໃຈຢ່າງເລິກເຊິ່ງໃຫ້ແກ່ລາວ, ເຖິງເວລາຜ່ານໄປຫຼາຍປີແລ້ວ, ມາເຖິງທຸກມື້ນີ້ລາວຍັງຈື່ບໍ່ລືມ. ລາວຫວນຄືນຫຼັງວ່າ: “ພວກເຮົາທຸກຄົນຕ່າງກໍຢູ່ຫ່າງໄກພໍ່ແມ່ ແລະ ບ້ານເກີດເພື່ອມາຮ່ຳຮຽນຢູ່ຕ່າງຖິ່ນ, ທ່ານຮອງເຈົ້າຄອງນະຄອນສີໄດ້ນຳເອົາເຂົ້າໜົມໄຫວ້ພະຈັນມາຮ່ວມສະຫຼອງບຸນດັ່ງກ່າວນໍາພວກເຮົາ, ທຸກຄົນດີໃຈຫຼາຍເພາະເພິ່ນເປັນກັນເອງປານກັບອ້າຍໃຫຍ່.”

ບຸນໄຫວ້ພະເຈົ້າແມ່ນໜຶ່ງໃນບັນດາບຸນປະເພທີ່ສຳຄັນຂອງປະຊາຊາດຈີນ. ນັບແຕ່ບູຮານນະການມາເຖິງປັດຈຸບັນ, ຄົນຈີນເມື່ອຢູ່ໃນຄໍ່າຄືນເດືອນເພັງທີ່ພະຈັນເຕັມດວງອັນໃສແຈ້ງກໍມັກຈະປາດຖະໜາຫາຄວາມສົມບູນພູນສຸກໃນຊີວິດ. ບໍ່ວ່າຈະຢູ່ແຫ່ງຫົນໃດກໍຕາມ, ການໄດ້ຊີມລົດຊາດເຂົ້າໜົມໄຫວ້ພະຈັນແລະ ຊົມດວງຈັນເຕັມດວງຮ່ວມກັນເປັນຄວາມສຸກແຫ່ງພິທີກໍາຂອງລູກຫຼານປະຊາຊາດຈີນ, ເປັນການເຊື່ອມສານຈິດໃຈທີ່ເກີດຈາກວັດທະນະທຳຈີນທີ່ມີປະຫວັດຄວາມເປັນມາຍາວນານຫຼາຍພັນປີ.

ສຳລັບຄົນຈີນແລ້ວ, ການກິນເຂົ້າໜົມໄຫວ້ພະຈັນເປັນເລື່ອງປົກກະຕິເພື່ອສຳຜັດກັບຄວາມຮັກແພງອັນຈິງໃຈລະຫວ່າງຄົນກັບຄົນ. ຢ່າງໃດກໍຕາມ, ເຄີຍມີໄລຍະໜຶ່ງ, ການຫຸ້ມຫໍ່ທີ່ຫຼູຫຼາເກີນໄປ ແລະ ລາຄາແພງເກີນໄປເຮັດໃຫ້ເຂົ້າໜົມໄຫວ້ພະຈັນປ່ຽນລົດຊາດກໍຄືປ່ຽນຄວາມໝາຍໄປ.

ກ່ອນບຸນໄຫວ້ພະຈັນ ປີ 2013 ຈະໝູນວຽນມາເຖິງ, ທ່ານ ສີຈິ້ນຜິງ ໄດ້ເຄື່ອນໄຫວຢ້ຽມຢາມແຂວງຫຼຽວໜິງ, ເພິ່ນເນັ້ນໜັກເປັນພິເສດໃຫ້ກຳຈັດປັດເປົ່າປາກົດການຫຍໍ້ທໍ້ຕ່າງໆເຊັ່ນ: ການສວຍໂອກາດໃນຍາມບຸນເພື່ອສົ່ງຂອງຂວັນລາຄາແພງດ້ວຍເງິນຂອງລັດ ແລະ ອື່ນໆ, ຫັນໄປສະຫຼອງບຸນທ່າມກາງບັນຍາກາດໂປ່ງໃສ ແລະ ສຸດຈະຫຼິດ. ຫຼັງຈາກນັ້ນບໍ່ເທົ່າໃດມື້, ຄະນະກຳມະການກວດກາວິໄນສູນກາງພັກ ແລະ ໜ່ວຍງານນຳພາການເຄື່ອນໄຫວສຶກສາອົບຮົມແນວທາງມະຫາຊົນຂອງສູນກາງພັກກອມມູນິດຈີນ ໄດ້ອອກແຈ້ງການໂດຍກຳນົດຢ່າງຈະແຈ້ງວ່າຫ້າມບໍ່ໃຫ້ສົ່ງເຂົ້າໜົມໄຫວ້ພະຈັນ ແລະ ຂອງຂວັນໃນຍາມບຸນດ້ວຍເງິນຂອງລັດຢ່າງເດັດຂາດ.

ພາຍຫຼັງບຸນໄຫວ້ພະຈັນ, ໃນໂອກາດເຂົ້າຮ່ວມກອງປະຊຸມຮ່ວມຊີວິດພັກແບບປະຊາທິປະໄຕຂອງຄະນະປະຈຳພັກແຂວງເຫີເປີຍ, ທ່ານ ສີຈິ້ນຜິງ ໄດ້ຍົກໃຫ້ເຫັນວ່າ: “ຄະນະກຳມະການກວດກາວິໄນສູນກາງພັກໄດ້ສຸມໃສ່ແກ້ໄຂບັນຫາເຂົ້າໜົມໄຫວ້ພະຈັນໃນໄລຍະບຸນໄຫວ້ພະຈັນເທື່ອນີ້, ເບິ່ງຄືວ່າເປັນເລື່ອງເລັກນ້ອຍ, ແຕ່ຄວາມຈິງແລ້ວແມ່ນເພື່ອແກ້ໄຂບັນຫາການສໍ້ລາດບັງຫຼວງທີ່ແຝງຊ້ອນຢູ່ເບື້ອງຫຼັງ”. ທ່ານ ສີຈິ້ນຜິງ ຍັງເນັ້ນໜັກວ່າ: “ຫຼັງຈາກແກ້ໄຂປະກົດການຫຍໍ້ທໍ້ໃນໄລຍະບຸນໄຫວ້ພະຈັນແລ້ວໃຫ້ແກ້ໄຂບັນຫາໃນໄລຍະວັນຊາດ, ປີໃໝ່ສາກົນ, ບຸນກຸດຈີນ, ບຸນເຊັງເມັ້ງ ຫຼື ບຸນອະນາໄມສຸສານ, ບຸນຕ່ວນອູ ຫຼື ບຸນຊ່ວງເຮືອ ແລະ ປະຕິບັດແບບນີ້ຕໍ່ໄປເພື່ອໃຫ້ກາຍເປັນປະເພນີ ແລະ ແບບແຜນອັນດີງາມຢ່າງໜຶ່ງ.”

ປັດຈຸບັນ, ຍຸກສະໄໝທີ່ເຂົ້າໜົມໄຫວ້ພະຈັນມີລາຄາແພງຜິດປົກກະຕິໄດ້ຜ່ານພົ້ນໄປດົນແລ້ວ, ສັງຄົມທົ່ວປະເທດຈີນເຕັມໄປດ້ວຍບັນຍາດກາດທີ່ໂປ່ງໃສແລະ ສຸດຈະຫຼິດ. ທ່າມກາງແບບແຜນຂອງພັກ, ແບບແຜນການປົກຄອງຂອງລັດແລະ ແບບແຜນສັງຄົມທີ່ສຸດຈະຫຼິດ, ຄົນທັງຫຼາຍໄດ້ຊີມລົດຊາດອັນແຊບຊ້ອຍແບບດັ້ງເດີມທີ່ແທ້ຈິງຂອງເຂົ້າໜົມໄຫວ້ພະຈັນ ແລະ ມີຄວາມສຸກກັບຄວາມອົບອຸ່ນຈາກການເຕົ້າໂຮມຄວາມສາມັກຄີພາຍໃນຄອບຄົວ.

ບົດໂດຍ: ວິທະຍຸ, ໂທລະພາບສູນກາງຈີນ (CMG)