ເຄືອຂ່າຍສື່ມວນຊົນອາຊີໃຕ້ ແລະ ຕາເວັນອອກສ່ຽງໃຕ້

 ໄດ້ສ້າງຕັ້ງຂຶ້ນ ຢູ່ນະຄອນຫຼວງປັກກິ່ງ ຂອງ ສປ ຈີນ ເມື່ອບໍ່ດົນມານີ້ຊຶ່ງມີເປົ້າໝາຍຊຸກຍູ້ການເຊື່ອມໂຍງສື່ມວນຊົນ ແລະ ພັດທະນາຢ່າງມີຫົວຄິດປະດິດສ້າງ ແບບຍືນຍົງຂອງເຄືອຂ່າຍ ແລະ ຄວາມຈະເລີນຮຸ່ງເຮືອງຂອງນັກຂ່າວໃນພາກພື້ນ ໂດຍຜ່ານການແລກປ່ຽນຊັບພະຍາກອນ, ແລກປ່ຽນປະສົບການ ແລະ ການຮ່ວມມືດ້ານວິຊາຊີບ, ການແລກປ່ຽນວັດທະນະທຳ, ການສຶກສາ ແລະ ຄວາມໄວ້ເນື້ອເຊື່ອໃຈ ຊຶ່ງກັນ ແລະ ກັນ. ຮ່ວມມືກັບ ສື່ມວນຊົນພາຍໃນ ແລະ ຕ່າງປະເທດ ພ້ອມກັນໂຄສະນາ ໃນສິ່ງທີ່ເປັນຄວາມຈິງ ເປັນປະໂຫຍດຕໍ່ປະຊາຊົນລະຫວ່າງປະເທດສະມາຊິກ ເວົ້າສະເພາະ ແມ່ນການສ້າງຄວາມເຂົ້າອົກເຂົ້າໃຈກັນ ແລະ ພ້ອມກັນພັດທະນາ ຕ່າງຝ່າຍຕ່າງໄດ້ຮັບຜົນປະໂຫຍດ ກໍຄືຮ່ວມກັນຕອບໂຕ້ຖ້ອຍຄຳຂອງຄົນບໍ່ດີທີ່ໂຄສະນາຜ່ານສື່ແບບບໍ່ຖືກຕ້ອງຕາມຄວາມເປັນຈິງ.
ປັດຈຸບັນມີສື່ມວນຊົນ 100 ກວ່າສໍານັກຈາກ 12 ປະເທດເປັນສະມາຊິກ.ເຄືອຂ່າຍສື່ມວນຊົນອາຊີໃຕ້ ແລະອາຊີຕາເວັນອອກສ່ຽງໃຕ້ ມີຈຸດປະສົ່ງເພື່ອສ້າງກົນໄກການຮ່ວມມືຂອງສື່ມວນຊົນເຮັດວຽກຮ່ວມກັນ,ການຈັດຕັ້ງກິດຈະກຳແລກປ່ຽນໃນລະດັບພາກພື້ນ,ຈັດກອງປະຊຸມປຶກສາຫາລື,ການປາຖະກະຖາໃນຫົວຂໍ້ຕ່າງໆ, ການຝຶກອົບຮົມຫົວຂໍ້ພິເສດ, ການຄັດເລືອກຂ່າວປະຈຳປີ,ຝຶກອົບຮົມບຸກຄະລາກອນ, ຊຸກຍູ້ການພັດທະນາຕາມຍຸດທະສາດຮ່ວມກັນ.ທຸກໆປີຈະມີການຄັດເລືອກບຸກຄະລາກອນສື່ມວນຊົນທີ່ດີເດັ່ນຈຳນວນໜຶ່ງ ເພື່ອໄປທັດສະນະແລກປ່ຽນຊຶ່ງກັນ ແລະ ກັນ ແລະ ອື່ນໆ.
ສໍາລັບຂອບການດໍາເນີນງານຂອງເຄືອຂ່າຍ ແມ່ນມີຫຼັກການຢຶດໝັ້ນການເຄົາລົບຊຶ່ງກັນ ແລະກັນ, ປຶກສາຫາລືແບບເສະເໝີພາບ,ຊ່ວຍເຫຼືອຊຶ່ງກັນ ແລະກັນ, ມີຜົນປະໂຫຍດຮ່ວມກັນ, ຮ່ວມມືກັບສື່ມວນຊົນພາຍໃນ ແລະ ຕ່າງປະເທດ ເພື່ອນໍາສະເໜີຂ່າວເລື່ອງລາວທີ່ເປັນປະໂຫຍດຕໍ່ການດໍາລົງຊີວິດຂອງປະຊາຊົນໃນແຕ່ລະປະເທດ, ຊຸກຍູ້ການເຊື່ອມໂຍງສື່ມວນຊົນ ແລະ ພັດທະນາຢ່າງມີຫົວຄິດປະດິດສ້າງ, ເພີ່ມທະວີການແລກປ່ຽນວັດທະນະທຳ, ການສຶກສາ ແລະ ຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ. ຢຶດໝັ້ນຫຼັກການເປີດໃຈສະເໝີ ແລະ ຍິນດີຕ້ອນຮັບສື່ມວນຊົນທີ່ເຫັນດີກັບແນວຄວາມຄິດ ແລະ ເປົ້າໝາຍເຂົ້າຮ່ວມດ້ວຍຄວາມສະໝັກໃຈ, ບໍ່ວ່າສື່ຈະມາຈາກໃສ. ບົນພື້ນຖານການຮ່ວມມືຢ່າງສະເໝີພາບ,ສະມາຊິກເຄືອຂ່າຍຈະຮ່ວມກັນຮັກສາສະພາບແວດລ້ອມທີ່ເປັນມິດ,ຊຸກຍູ້ການພັດທະນາແບບຍືນຍົງຂອງເຄືອຂ່າຍ ແລະ ຄວາມຈະເລີນຮຸ່ງເຮືອງຂອງນັກຂ່າວໃນພາກພື້ນ ໂດຍຜ່ານການແລກປ່ຽນຊັບພະຍາກອນ, ແລກປ່ຽນປະສົບການ ແລະ ການຮ່ວມມືດ້ານວິຊາຊີບ.
ສໍາລັບໂຄງສ້າງການຈັດຕັ້ງຂອງເຄືອຂ່າຍປະກອບມີກອງເລຂາ ແລະສະມາຊິກຈາກສໍານັກງານຂ່າວສານຕ່າງປະເທດ.ກອງເລຂາແມ່ນຫ້ອງການຖາວອນທີ່ຕັ້ງຂຶ້ນໃນທັງອົງການປະຈຳວັນຂອງຈີນ ແລະ YICCແລະມີໜ້າທີ່ຮັບຜິດຊອບຕໍ່ວຽກງານປະຈໍາວັນຂອງເຄືອຂ່າຍ,ສະມາຊິກທົ່ວໄປຂອງເຄືອຂ່າຍຕ້ອງສະແດງຄວາມສະໝັກໃຈຂອງຕົນທີ່ຈະເຂົ້າຮ່ວມໂດຍຜ່ານເອກະສານຢືນຢັນ,ໂດຍບໍ່ມີການຈ່າຍຄ່າທໍານຽມປະຈໍາປີ.ສະມາຊິກເຄືອຂ່າຍ ຕ້ອງຮັບຮູ້ການຮ່ວມມືທີ່ຊັດເຈນໂດຍຜ່ານໂຄງການສະເພາະແລະໂດຍຜ່ານກອງປະຊຸມປະຈໍາປີ.
ໃນເມື່ອເຂົ້າເປັນສະມາຊິກຂອງເຄືອຂ່າຍສື່ມວນຊົນ ຈະໄດ້ຮັບສິດ ແລະ ຜົນປະໂຫຍດໃນການສະໜັບສະໜູນການເປັນເຈົ້າພາບຈັດກິດຈະກໍາຢູ່ປະເທດສະມາຊິກ.ຈະໄດ້ເຄື່ອນໄຫວສໍາພາດຢູ່ປະເທດຈີນ ແລະ ປະເທດສະມາຊິກ, ພັກຜ່ອນຢູ່ສະໂມສອນນັກຂ່າວອາຊີໃຕ້ແລະອາຊີຕາເວັນອອກສ່ຽງໃຕ້,ໄດ້ຮັບການຝຶກອົບຮົມນັກຂ່າວ,ບັນນາທິການ, ການທົດລອງອຸປະກອນ ແລະການຊ່ວຍເຫຼືອເຕັກໂນໂລຊີ ແລະ ເຂົ້າຮ່ວມກອງປະຊຸມປະຈໍາປີຂອງເຄືອຂ່າຍ.
ໃນພິທີເປີດເວທີສົນທະນາການສື່ສານສາກົນຢຸນນານ ຄັ້ງທີ 3 ໄດ້ຈັດຂຶ້ນໃນວັນທີ 10 ທັນວາ ຜ່ານມາ ໃນກອງປະຊຸມທ່ານນາງ ເຈິງຢ້ຽນກຳມະການປະຈຳຄະນະພັກແຂວງຢຸນນານ ຫົວໜ້າພະແນກໂຄສະນາອົບຮົມແຂວງຢຸນນານກ່າວວ່າ: ເວທີສົນທະນາການສື່ສານສາກົນຢຸນນານທີ່ຮ່ວມຈັດຂຶ້ນໂດຍສໍານັກຂ່າວຊິນຮວາ ແລະ ແຂວງຢຸນນານ, ມີຈຸດປະສົງເພື່ອສ້າງເສັ້ນທາງການສື່ສານສາຍໜຶ່ງທີ່ປະເທດຈີນ ແລະ ທົ່ວໂລກກ້າວໄປທາງໜ້າພ້ອມກັນ ໂດຍຖືເອົາໂຕຊ້າງເປັນສັນຍາລັກ ແລະ ອົງການສື່ມວນຊົນເປັນເຄື່ອງມື. ເວທີສົນທະນານີ້ໄດ້ກາຍເປັນງານມະໂຫລານໃນການແລກປ່ຽນຂອງວົງການສື່ມວນຊົນທົ່ວໂລກ ແລະ ຖານເວທີການຮ່ວມມື ຊຶ່ງໄດ້ອໍານວຍໂອກາດທີ່ດີໃຫ້ແກ່ບັນດາເພື່ອນສື່ມວນຊົນ. ພາຍໃຕ້ຫົວຂໍ້ “ຮ່ວມມືກັນ, ປະດິດສ້າງອະນາຄົດຮ່ວມກັນ, ຄົ້ນຫາຊ່ອງທາງໃໝ່ຂອງການສື່ສານສາກົນ”, ເວທີສົນທະນາເປັນສື່ກາງຄົ້ນຄວ້າແລກປ່ຽນກັນດ້ານແນວຄິດ, ສ້າງຄວາມເຫັນເປັນເອກະພາບກັນຢ່າງກວ້າງຂວາງ ແລະ ຊຸກຍູ້ສົ່ງເສີມບັນລຸການຮ່ວມມືແບບຕ່າງຝ່າຍຕ່າງມີຜົນປະໂຫຍດ. ເພື່ອສ້າງເປັນເວທີສົນທະນາລະດັບສູງດ້ານການສື່ສານສາກົນໃນເຂດແຄ້ວນ, ພວກເຮົາຍິນດີຮ່ວມກັນເພື່ອກໍ່ສ້າງປະຊາຄົມຮ່ວມຊາຕາກໍາຂອງມວນມະນຸດ. ປະເທດຈີນໄດ້ສະເໜີຂໍ້ລິເລີ່ມຕ່າງໆເຊັ່ນ: ຂໍ້ລິເລີ່ມການພັດທະນາທົ່ວໂລກ, ຂໍ້ລິເລີ່ມຄວາມປອດໄພທົ່ວໂລກ ແລະ ຂໍ້ລິເລີ່ມຄວາມສີວິໄລທົ່ວໂລກ.
ສໍາລັບວິໄສທັດໃນປີ 2025ສ້າງເວທີການສື່ສານສໍາລັບເຄືອຂ່າຍເພື່ອເຊື່ອມໂຍງຢ່າງແໜ້ນແຟ້ນໃນການແລກປ່ຽນວັດທະນະທຳ-ເຜີຍແຜ່ດ້ານວັດທະນະທຳອັນດີງາມ ລະຫວ່າງປະເທດຕ່າງໆ ໃຫ້ໂລກໄດ້ຮັບຮູ້ເຖິງຄວາມຫຼາກຫຼາຍຂອງປະເທດອາຊີໃຕ້ ແລະຕາເວັນອອກສ່ຽງໃຕ້ໂດຍສະເພາະ.ຍົກໃຫ້ເຫັນຜົນສຳເລັດອັນໃຫຍ່ຫຼວງຂອງມະນຸດ ແລະ ຊ່ວຍໃຫ້ປະເທດຕ່າງໆບັນລຸການພັດທະນາຮ່ວມກັນໂດຍຜ່ານການຮຽນຮູ້ຊຶ່ງກັນແລະກັນ.ປະດິດສ້າງວິທີການສື່ສານເພື່ອອິດທິພົນສາກົນທີ່ໃຫຍ່ກວ່າ. ເຄືອຂ່າຍຈະຄົ້ນຫາວິທີການໃໝ່ ແລະຊ່ອງທາງການສື່ສານຢ່າງບໍ່ຢຸດຢັ້ງ ແລະຂະຫຍາຍອິດທິພົນຂອງຕົນໃນເວທີສາກົນ.ເສີມຂະຫຍາຍບັນດາກົນໄກການຮ່ວມມືເພື່ອພັດທະນາບັນດາອົງການສື່ມວນຊົນຂອງສະມາຊິກ ເພື່ອສ້າງອະນາຄົດທີ່ສົດໃສຂອງຕ່າງຝ່າຍຕ່າງມີຜົນປະໂຫຍດ.