ເຂື່ອນໄຟຟ້ານໍ້າທາ 1 ສະຫຼຸບຜົນການຈັດຕັ້ງປະຕິບັດ  ວຽກງານຟື້ນຟູຊິວິດການເປັນຢູ່ຂອງປະຊາຊົນ

ລັດວິສາຫະກິດໄຟຟ້າລາວ ສາຂາແຂວງຫຼວງນໍ້າທາ ໂຄງການເຂື່ອນໄຟຟ້ານໍ້າທາ 1 ສະຫຼຸບຜົນການຈັດຕັ້ງປະຕິບັດ ວຽກງານຟື້ນຟູຊີວິດການເປັນຢູ່ຂອງປະຊາຊົນປະຈໍາປີ 2023 ແລະ ທິດທາງແຜນການ 2024 ຂຶ້ນເມື່ອບໍ່ດົນມານີ້, ໂດຍການເປັນປະທານຂອງທ່ານ ຄໍາພອນ ເດດລໍວົງ ຫົວໜ້າພະແນກພະລັງງານ ແລະ ບໍ່ແຮ່ແຂວງ, ທ່ານ ວິລະພອນ ວົງຊູນນະລາດ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວ, ມີບັນດາຜູ້ຕາງໜ້າຈາກຂະແໜງການທີ່ກ່ຽວຂ້ອງເມືອງນາແລ  ແຂວງຫຼວງນໍ້າທາ, ເມືອງຜາອຸດົມແຂວງບໍ່ແກ້ວ,ລັດວິສາຫະກິດໄຟຟ້າລາວ,ຕາງໜ້າບໍລິສັດເຂື່ອນໄຟຟ້ານໍ້າທາ 1, ບໍລິສັດທີ່ປຶກສາເຂົ້າຮ່ວມ.
ທ່ານ ວັນທອງ ແພງວິຈິດ ຕາງໜ້າບໍລິສັດທີ່ປຶກສາ ໄດ້ຕີລາຄາຜົນການຈັດຕັ້ງປະຕິບັດປີ 2023 ແລະ ທິດທາງ 2024 ຂອງວຽກງານຟື້ນຟູຊິວິດການເປັນຢູ່ຂອງປະຊາຊົນ ຂອງໂຄງການເຂື່ອນໄຟຟ້ານໍ້າທາ 1 ໄດ້ໃຫ້ຮູ້ວ່າ:  ໜ້າວຽກຂອງແຜນການຟື້ນຟູ ແລະ ປັບປຸງຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບ 2 ເຂດຄື: ເຂດນາແລ ເມືອງນາແລ ແຂວງຫຼວງນ້ຳທາ ແລະ ເຂດຫາດມວກ ເມືອງຜາອຸດົມ ແຂວງບໍ່ແກ້ວ ແຕ່ປີ 2020-2023 ປະກອບມີ 5 ໜ້າວຽກໃຫຍ່ເປັນຕົ້ນແມ່ນ ວຽກງານພັດທະນາທີ່ດິນ (ຄັງລ້ຽງສັດ, ການປົກປັກຮັກສາປ່າໄມ້ ແລະ ເຄື່ອງປ່າຂອງດົງ),ການຝຶກອົບຮົມ-ທັດສະນະສຶກສາ, ການຜະລິດສະບຽງອາຫານ ແລະ ສ້າງລາຍຮັບ, ການຜະລິດເປັນສິນຄ້າ,ການພັດທະນາຊຸມຊົນ ແລະ ສັງຄົມ. ສໍາລັບເມືອງນາແລແຂວງຫຼວງນໍ້າທາ ຜະລິດເປັນສິນຄ້າເຂດນາແລ ໄດ້ສະໜັບສະໜູນການລ້ຽງງົວ,ແບ້ ໄດ້ 30 ຄອບຄົວ,ການລ້ຽງເຜິ້ງໂກນ 1 ບ້ານ, 18 ຄອບຄົວ,ລາຍຮັບຈາກການປະມົງຫາປາເຂດໜ້າເຂື່ອນ 20 ຄອບຄົວ,ຕໍ່າຫູກ,ຕົ້ມເຫຼົ້າສ້າງລາຍຮັບໄດ້ 1 ຕື້ກວ່າກີບພາຍໃນ 3 ເດືອນແລະ ເຂດຫາດມວກ ເມືອງຜາອຸດົມ ແຂວງບໍ່ແກ້ວ ລ້ຽງງົວ,ແບ້ 15 ຄອບຄົວ ສະໜັບໜູນການປູກເຫັດ 20 ຄອບຄົວ,ໃນນັ້ນ 6 ຄອບຄົວສາມາດສ້າງລາຍຮັບໄດ້ 18 ລ້ານກີບ ພາຍໃນ 3 ເດືອນ, ສ້າງສູນສາທິດລ້ຽງງົວທອມ 5,2 ເຮັກຕາ, ປູກຫຍ້າ 4,5 ເຮັກຕາ, ສ້າງຄອກ 1 ຫຼັງ ແລະ ສາງເກັບມ້ຽນອາຫານ 1 ຫຼັງ, ວຽກງານທີ່ຄົງຄ້າງ ແມ່ນວຽກງານຈັດສັນເພື່ອລ້ຽງສັດ ແລະ ດິນປ່າໄມ້,ສຳລັບເຂດຍົກຍ້າຍຈັດສັນນາແລ 1.131 ຄອບຄົວ (1.131 ຮຕ) ແລະ ບ້ານຫາດມວກ 566 ຄອບຄົວ,(566 ຮຕ) ບໍ່ໄດ້ຈັດຕັ້ງປະຕິບັດ, ເພາະວ່າເນື້ອທີ່ຈຳກັດບໍ່ສາມາດຈັດສັນໄດ້, ການສະໜັບສະໜູນເດັກນ້ອຍທີ່ດ້ອຍໂອກາດ ໂດຍສະເພາະເຂດຍົກຍ້າຍຈັດສັນນາແລ ບໍ່ໄດ້ຈັດຕັ້ງປະຕິບັດ; ໃນເບື້ອງຕົ້ນການນຳໃຊ້ງົບປະມານດັ່ງກ່າວໄດ້ໃຊ້ເປັນແຜນປັບປຸງເຮືອນພັກໃຫ້ນັກຮຽນ,  ສໍາລັບກິດຈະກໍາອື່ນຈໍານວນໜຶ່ງທີ່ຍັງຄົງຄ້າງ ຫຼື ບໍ່ທັນໄດ້ຈັດຕັ້ງປະຕິບັດ ແມ່ນໄດ້ມີແຜນເພື່ອຈັດຕັ້ງປະຕິບັດໃນທ້າຍປີ 2023. ຍ້ອນການເບີກຈ່າຍງົບປະມານຈາກເຈົ້າຂອງໂຄງການມີຄວາມຊັກຊ້າເຮັດໃຫ້ວຽກງານອື່ນໆປະຕິບັດບໍ່ໄດ້ຕາມແຜນ; ສຳລັບທິດທາງແຜນການໃນຕໍ່ໜ້າແມ່ນຈະໄດ້ສືບຕໍ່ປະຕິບັດຄາດໝາຍແຜນການປັບປຸງຊິວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໂຄງການຊຶ່ງເຮັດໃຫ້ເຂົາເຈົ້າບັນລຸຄາດໝາຍເຊັ່ນ: ມີຢູ່,ມີກິນ ແລະ ມີຂາຍ,ປັບປຸງຊິວິດການເປັນຢູ່ຂອງປະຊາຊົນປີ 2024 ໃນ 5 ຂອບໜ້າວຽກໃຫຍ່ຄື: ຈັດສັນທີ່ດິນຄັງສັດ,ການປົກປັກຮັກສາປ່າໄມ້, ຝຶກອົບຮົມ ແລະ ທັດສະນະ,ສົ່ງເສີມການຜະລິດສະບຽງອາຫານແລະ ສ້າງລາຍຮັບ,ສົ່ງເສີມຄອບຄົວທຸກຍາກ,ການຜະລິດສິນຄ້າ,ພັດທະນາຊຸມຊົນ-ສັງຄົມ ແລະ ວຽກງານອື່ນໆ. 
(ຂ່າວ-ພາບ: ມຸນຕີ)