ສູນວັດທະນະທໍາຈີນ ປະຈໍາ ລາວ ຮ່ວມກັບ ບໍລິສັດທາງລົດໄຟລາວ-ຈີນ ຈໍາກັດ ຊຶ່ງຮັບຜິດຊອບຈັດງານໂດຍ ສູນຄຸ້ມຄອງ ແລະ ດໍາເນີນການສະຖານີນະຄອນຫຼວງ ໄດ້ຈັດກິດຈະກໍາງານຊຸມນຸມແຫ່ງວັດທະນະທໍາ ບົດກະວີສາລາຫຼານຖິງ ເທິງຂະບວນລົດໄຟລ້ານຊ້າງ ຂຶ້ນໃນວັນທີ 21 ເມສານີ້ ໂດຍຂະບວນລົດໄຟລ້ານຊ້າງຖ້ຽວ D88 ຕູ້ເບີ 5 ໄດ້ຖືກແຕ່ງໄປດ້ວຍສິລະປະການຂຽນຕົວໜັງສືຈີນ ບົດກະວີຫຼານຖິງ ເຮັດໃຫ້ພາຍໃນຕູ້ລົດໄຟເຕັມໄປດ້ວຍບັນຍາກາດແຫ່ງວັດທະນະທໍາຈີນ ໂດຍມີ ທ່ານ ພູເຮືອງ ສຸວັນນະລາດ ຮອງຫົວໜ້າກົມມໍລະດົກ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ), ທ່ານນາງ ຫຼີຢີ່ຜິງ ຫົວໜ້າສູນວັດທະນະທໍາຈີນ ປະຈຳ ລາວ, ມີສຳມະນາກອນຈາກກົມກອງອ້ອມຂ້າງກະຊວງ ຖວທ ທີ່ໄປເຂົ້າຮ່ວມການຝຶກອົບຮົມການປົກປັກຮັກສາມໍລະດົກວັດທະນະທຳນາມມະທຳທີ່ປະເທດຈີນ ພ້ອມດ້ວຍຜູ້ໂດຍສານນາທັງພາຍໃນ ແລະ ຕ່າງປະເທດເຂົ້າຮ່ວມ.
ກິດຈະກຳໃນຄັ້ງນີ້, ຜູ້ເຂົ້າຮ່ວມໄດ້ຊື່ນຊົມ, ໄດ້ສຳຜັດຜົນງານສິລະປະຕົວໜັງສືຈີນຮູບແບບ ສິງ ຊູ່ ທີ່ເປັນອັນດັບໜຶ່ງຂອງໂລກກໍຄືຜົນງານທີ່ມີຊື່ວ່າ: ຫຼານ ຖິງ ຈີ ຊູ້ ຂອງທ່ານ ຫວາງ ຊີ່ຈື່. ໄດ້ຫວນຄືນສໍາຜັດກັບງານຊຸມນຸມແຫ່ງວັດທະນະທຳ ບົດກະວີສາລາຫຼານຖິງ ແບບດັ້ງເດີມ ຊຶ່ງສູນວັດທະນະທໍາຈີນ ປະຈໍາລາວ ໄດ້ຍັງເຊື້ອເຊີນທ່ານ ຫຼີ ຫຼິງ ຮອງຫົວໜ້າສະມາຄົມສິລະປະຕົວໜັງສືຈີນ ປະຈຳ ລາວ ມາສະແດງ ແລະ ສອນຜູ້ໂດຍສານໂດຍໃຊ້ພູ່ກັນຂຽນຕົວໜັງສືຈີນຢູ່ເທິງລົດໄຟຕື່ມອີກ. ຜູ້ໂດຍສານໄດ້ພະຍາ ຍາມທີ່ຈະຮຽນຂຽນຄຳວ່າ: 兰亭雅集 ຊຶ່ງມີຄວາມໝາຍວ່າ: ງານຊຸມນຸມແຫ່ງວັດທະນະທໍາ ບົດກະວີສາລາຫຼານຖິງ ທີ່ເປັນຊື່ຂອງກິດຈະກຳຄັ້ງນີ້ ເທື່ອລະຂີດ ຂີດດ້ວຍພູ່ກັນ, ດື່ມດໍ່າໄປກັບຄວາມງົດງາມຂອງສິລະປະຕົວໜັງສືຈີນ ທີ່ແຝງໄປດ້ວຍຄວາມໝາຍທີ່ເລິກເຊິ່ງຂອງວັດທະນະທຳຈີນ, ສຳຜັດໄດ້ເຖິງລົດສະນິຍົມການດຳລົງຊີວິດອັນສູງສົ່ງຂອງຜູ້ມີຄວາມຮູ້ຂອງຊາວຈີນໃນອາດີດ ເຮັດໃຫ້ຫຼາຍຄົນຕ່າງກໍຊົມເຊີຍກິດຈະດັ່ງກ່າວວ່າມີຄວາມແປກໃໝ່ ແລະ ມີຄວາມໜ້າສົນໃຈຫຼາຍ ນີ້ເປັນຄັ້ງທຳອິດທີ່ໄດ້ສຳຜັດການຂຽນສິລະປະຕົວໜັງສືຈີນດັ້ງເດີມເທິງລົດໄຟທີ່ມີຄວາມທັນສະໄໝ.
ທ່ານ ພູເຮືອງ ສຸວັນນະລາດ ໃຫ້ຮູ້ວ່າ: ກິດຈະກຳໃນຄັ້ງນີ້ ປະກອບມີຫຼາກຫຼາຍກິດຈະກຳ ທີ່ມີຄວາມໝາຍ-ຄວາມສໍາຄັນສາມາດເຮັດໃຫ້ ຜູ້ເຂົ້າຮ່ວມໄດ້ຮັບຮູ້ ແລະ ຮຽນຮູ້ເຖິງວິຖີຊີວິດທາງດ້ານວັດທະນະທຳຂອງ ສປ ຈີນ ກ່ອນເຂົ້າຮ່ວມຝຶກອົບຮົມວຽກຕົວຈິງໃນລະຫວ່າງວັນທີ 22-25 ເມສານີ້ທີ່ ແຂວງຟູເອີ ສປ ຈີນ ເຊັ່ນ: ກິດຈະກຳສອນພາສາຈີນ, ສິລະປະການຂຽນຕົວອັກສອນຈີນນັບຕັ້ງແຕ່ມີການສ້າງຕົວອັກສອນຈີນ ຂຶ້ນມາ ແລະ ບົດກະວີຫຼານຖິງ, ການສາທິດວິທີການຂຽນໂຕໜັງສືພາສາຈີນ ພ້ອມເຮັດໃຫ້ຮູ້ເຖິງປະຫວັດຄວາມເປັນມາ ແລະ ຄວາມສໍາຄັນຂອງການຂຽນໜັງສືພາສາຈີນ ທີ່ຕິດພັນກັບວິຖີການດຳລົງຊີວິດ ຂອງບັນພະບູລຸດຂອງປະຊາຊົນຈີນທີ່ມີມາອັນຍາວນານແຕ່ປີ ຄ.ສ 353 ຂອງວັນທີ 3 ເດືອນມີນາຕາມປະຕິທິນຈີນ ແລະ ມີກິດຈະກຳ ອື່ນໆອີກ. ປະເທດຈີນເປັນໜຶ່ງໃນປະເທດທີ່ມີມໍລະດົກວັດທະນະທຳນາມມະທຳທີ່ຫຼາຍທີ່ສຸດ ແລະ ເປັນປະເທດທີ່ສາມາດຮັກສາມໍລະດົກດັ່ງກ່າວໄດ້ດີທີ່ສຸດໃນໂລກ. ປະເທດລາວກໍມີວັດທະນະທຳນາມມະທຳຫຼາຍຢ່າງທີ່ຕ້ອງໄດ້ຄົ້ນຫາ, ຫວັງຢ່າງຍິ່ງວ່າສອງຊາດລາວ-ຈີນ ຈະເພີ່ມທະວີການຮ່ວມມືທາງດ້ານວຽກງານການປົກປັກຮັກສາມໍລະດົກວັດທະນະທຳນາມມະທຳ ແລະ ຍົກສູງຄວາມສາມາດ ແລະ ລະດັບການປົກປັກຮັກສາມໍລະດົກວັດທະນະທຳນາມມະທຳຂອງລາວ ແລະ ຊຸກຍູ້ການແລກປ່ຽນຮຽນຮູ້ອະລິຍະທຳ ຊຶ່ງກັນ ແລະ ກັນ.
ທ່ານນາງ ຫຼີຢີ່ຜິງ ໃຫ້ຮູ້ວ່າ: ຢາຈິ ຫຼື ງານຊຸມນຸມແຫ່ງວັດທະນະທໍາ ແມ່ນຮີດຄອງປະເພນີທີ່ສໍາຄັນໃນປະຫວັດສາດຈີນ ເພື່ອລະນຶກເຖິງໄລຍະເວລາແຫ່ງວັດທະນະທໍາ ແລະ ປະຫວັດສາດອັນລໍ້າເລີດກ່ອນປີ 1670, ເພື່ອໃຫ້ປະຊາຊົນທົ່ວໂລກໄດ້ສໍາຜັດກັບຄວາມງາມ ແລະ ຄວາມໝາຍວັດທະນະທໍາອັນເລິກເຊິ່ງຂອງສິລະປະການຂຽນຕົວໜັງສືຈີນ. ອີງຕາມແຜນງານຂອງ ກະຊວງວັດທະນະທໍາ ແລະ ທ່ອງທ່ຽວ ແຫ່ງ ສປ ຈີນ, ສູນວັດທະນະທໍາຈີນທົ່ວໂລກທັງ 48 ແຫ່ງ ແລະ ສໍານັກງານທ່ອງທ່ຽວຈີນ 23 ແຫ່ງຈະເປີດຕົວກິດຈະກໍາສິລະປະການຂຽນຕົວໜັງສືຈີນຂຶ້ນທົ່ວໂລກໃນເດືອນເມສານີ້ ຊຶ່ງກິດຈະກໍາໃນຄັ້ງນີ້ ກໍເປັນພາກສ່ວນສໍາຄັນຂອງໂຄງການດັ່ງກ່າວ. ທ່ານນາງ ຫຼີຢີ່ຜິງ ຍັງໄດ້ສົ່ງຄຳອວຍພອນເປັນພິເສດໃຫ້ກັບນັກສຳມະນາກອນລາວ ທີ່ໄປເຂົ້າຮ່ວມການຝຶກອົບຮົມຢູ່ ສປ ຈີນ ໃນຄັ້ງນີ້ ພ້ອມຫວັງວ່າການເດີນທາງດ້ວຍລົດໄຟຂະບວນລ້ານຊ້າງໃນຄັ້ງນີ້ ຈະເປັນຈຸດເລິ່ມຕົ້ນແຫ່ງຄວາມປະທັບໃຈໃນການທ່ອງທ່ຽວປະເທດຈີນ ແລະ ເປັນການປະກອບສ່ວນສໍາຄັນເຂົ້າໃນການແລກປ່ຽນ-ຮ່ວມມືທາງດ້ານວັດທະນະທຳ ແລະ ທ່ອງທ່ຽວຂອງສອງຊາດລາວ-ຈີນ.
ຂ່າວ-ພາບ: ວັນເພັງ
ຄໍາເຫັນ