ໂຮງໝໍມະໂຫສົດ ແລະ ອົງການ Fred Hollocws ປະຈຳ ສປປ ລາວ ໄດ້ຈັດກິດຈະກຳກວດວັດແທກສາຍຕາ ສ້າງຂະບວນການສະຫຼອງວັນສາຍຕາໂລກ ແລະ ແຈກແວ່ນຕາ ໂດຍບໍ່ເສຍຄ່າ ເພື່ອເປັນການສ້າງຂະບວນການສະເຫຼີມສະຫຼອງວັນສາຍຕາໂລກ 13 ຕຸລາ 2022 , ຂຶ້ນໃນວັນທີ 22 ກັນຍາ ທີໂຮງໝໍມະໂຫສົດ ,ພາຍໃຕ້ການເປັນປະທານກ່າວເປີດງານຂອງທ່ານ ໄຊຊະນະ ສົມບັນດິດ ຮອງຜູ້ອຳນວຍການໂຮງໝໍມະໂຫສົດ ຊຶ່ງມີທ່ານ ນາງ ສຸພອນສາ ໄຊບັນຍາ ຜູ້ຕາງໜ້າອົງການ Fred Hollocws ປະຈຳ ສປປ ລາວ ,ຊ່ຽວຊານ ພະນັກງານ ແພດໝໍ ແລະ ປະຊາຊົນ ເຂົ້າຮ່ວມກວດວັດແທກສາຍຕາຢ່າງຫຼວງຫຼາຍ.
ທ່ານ ໄຊຊະນະ ສົມບັນດິດ ກ່າວວ່າ: ຈຸດປະສົ່ງຂອງການຈັດງານໃນຄັ້ງນີ້ :ແມ່ນເພື່ອເປັນການຈັດກິດຈະກຳສ້າງຂະບວນການ ເພື່ອສະເຫຼີມສະຫຼອງວັນສາຍຕາໂລກ 13 ຕຸລາ ແລະ ເພື່ອເປັນການເພີ່ມທະວີ,ປ້ອງກັນ ແລະ ສົ່ງເສີມການປ້ອງກັນບັນຫາສຸຂະພາບທາງສາຍຕາ ໃນລະດັບປະເທດ,ພາກພື້ນ ແລະ ສາກົນ,ໂດຍສະເພາະເພື່ອໃຫ້ທຸກຄົນໃສ່ໃຈ ໃນການຮູ້ວິທີການດູແລ, ການເບິ່ງແຍງ ແລະ ການຮັກສາສຸຂະພາບຕາຂອງຕົນໃຫ້ດີ ເພື່ອປ້ອງກັນ ແລະ ຫຼຸດຜ່ອນບັນຫາຕາບອດ ທີ່ເກີດຈາກບາງພະຍາດ ຊຶ່ງພວກເຮົາສາມາດຫຼີກລ້ຽງໄດ້ ແລະ ກິດຈະກຳຄັ້ງນີ້ຜູ້ທີມາກວດ ແລະ ວັດແທກສາຍຕາ ຖ້າກວດທ່ານໃດເປັນພະຍາດແກນຕາຂຸ່ນ ທາງຄະນະຮັບຜິດຊອບຈະໄດ້ລວບລ່ວມລາຍຊື່ເພື່ອໄປຮັກສາຜ້າຕັດໃນວັນທີ 11 ຕຸລາ ແລະ ຈະເປີດຕາໃນວັນທີ 13 ຕຸລາ ຊຶ່ງວັນສາຍຕາໂລກ (ຂ່າວ:ຕຸໄລເພັດ )
ຄໍາເຫັນ