 |
ສະຫາຍ ພັນເອກ ສິງທອງ ອິນທະວອງ ຫົວໜ້າຫ້ອງການກອງບັນຊາການທະຫານແຂວງ ໄດ້ຂຶ້ນຜ່ານບົດສະຫຼຸບ ວ່າ: ຜ່ານມາ ຄະນະບັນຊາແຕ່ລະຂັ້ນ ໄດ້ຊີ້ນຳຈັດຕັ້ງກຳລັງລົງກໍ່ສ້າງຮາກຖານການເມືອງຕາມ 4 ເນຶ້ອໃນ 4 ຄາດໝາຍ ສາມາດສ້າງບ້ານປ້ອງກັນຊາດເຂັ້ມແຂງໄດ້ 22 ກຸ່ມບ້ານ, ມີ 91 ບ້ານ, 6,315 ຄອບຄົວ ກວມເອົາ 9 ເມືອງ, ຈັດຕັ້ງກຳລັງເຄື່ອນໄຫວຊອກຄົ້ນຕີສັດຕູ 37 ຄັ້ງ, ໄດ້ຈັດຕັ້ງກຳລັງປ້ອງກັນເສັ້ນທາງລົດໄຟລາວ - ຈີນ 27 ຈຸດ, ເຂື່ອນໄຟຟ້າ 6 ແຫ່ງ, ໂຄງການຂຸດຄົ້ນບໍ່ແຮ່ 5 ຈຸດ, ຊ່ວຍເຫຼືອກອບກູ້ໄພພິບັດທຳມະຊາດໄດ້ 8 ຄັ້ງ, ຊີ້ນໍາການອົບຮົມ-ຫັດແອບ, ປັບປຸງລະບຽບແບບແຜນ, ຝຶກຝົນຫຼໍ່ຫຼອມກຳລັງແຮງກາຍຂອງນາຍ ແລະ ພົນທະຫານ, ອົບຮົມ, ນັກຮຽນ-ນັກສຶກສາ, ອົບຮົມທະຫານໃໝ່, ບຳລຸງນາຍສິບ, ກໍ່ສ້າງນາຍສິບ, ການສ້າງບ້ານປ້ອມໝັ້ນ ກຸ່ມບ້ານສູ້ຮົບຕິດລຽນ ແລະ ສ້າງທ່າສະໜາມປ້ອງກັນບໍລິເວນ, ເຮັດໃຫ້ທົ່ວແຂວງມີຄວາມສະຫງົບປອດໄພ, ສັງຄົມມີຄວາມເປັນລະບຽບຮຽບຮ້ອຍ, ໄດ້ສຶກສາອົບຮົມການເມືອງນຳພາແນວຄິດໃຫ້ພະນັກງານ - ນັກຮົບ ແລະ ຂະຫຍາຍມະຫາຊົນເຂົ້າພັກໄດ້ຕາມແຜນການ, ປະກາດເລື່ອນຊັ້ນໃຫ້ນາຍທະຫານ 644 ຄົນ, ອອກບັດຢັ້ງຢືນຊັ້ນ, ບັດປະຈຳຕົວນາຍທະຫານໄດ້ 215 ບັດ, ລຸລ່ວງພະນັກງານທີ່ມີເງື່ອນໄຂພັກຜ່ອນຮັບບໍານານ 17 ຄົນ, ສົ່ງໄປຍົກລະດັບທັງພາຍໃນ ແລະຕ່າງປະເທດ 48 ຄົນ, ຮັບຮອງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2025 ໄດ້ 43 ໜ່ວຍພັກ, ວຽກງານຮັບປະກັນພະລາທິການ ສາມາດຮັບປະກັນດ້ານເຂົ້າກິນໄດ້ 100%, ຊີ້ນ - ປາ 50%, ຜັກ 70%.
ປັດຈຸບັນ, ທົ່ວກອງບັນຊາການທະຫານແຂວງມີສັດລ້ຽງປະເພດງົວ - ຄວາຍ 711 ໂຕ, ໝູ - ແບ້ 383 ໂຕ, ສັດປີກ 7,994 ໂຕ, ກົບ-ປາ 129,659 ໂຕ, ມີສ່ວນຜັກໃນຮົ່ມ 58 ຫຼັງ, ມີເນຶ້ອທີ່ປູກພືດຜັກນອກຮົ່ມຫຼາຍກວ່າ 18 ເຮັກຕາ, ປູກຕົ້ນໄມ້ໃຫ້ໝາກ 10,254 ເຮັກຕາ, ໄມ້ອຸດສາຫະກໍາຫຼາຍກວ່າ 40 ເຮັກຕາ, ສາມາດສ້າງລາຍຮັບໄດ້ 8 ຕື້ກວ່າກີບ, ທຽບໃສ່ແຜນການເພີ່ມຂຶ້ນ 18%. ໄປພ້ອມກັນນີ້ ສາມາດຮັບປະກັນທາງດ້ານພາຫະນະເຕັກນິກ, ອາວຸດລູກກະສູນໃຫ້ແກ່ການກຽມພ້ອມສູ້ຮົບໄດ້ 100%, ໄດ້ສືບຕໍ່ພົວພັນຮ່ວມມືກັບປະເທດເພື່ອນມິດ ແລະ ກົມກອງແຮກສ່ຽວ ໂດຍສະເພາະກົງສູນໃຫຍ່ ສປ ຈີນ, ກົງສູນໃຫຍ່ ສສ ຫວຽດນາມ ປະຈຳພາກເໜືອ, ແຂວງດຽນບຽນ, ແຂວງເຊິນລາ, ທະຫານເຂດ ll ແລະ ກອງບັນຊາການທະຫານຊາຍແດນ ສສ ຫວຽດນາມ. ຈາກນັ້ນ, ຜູ້ເຂົ້າຮ່ວມໄດ້ຜັດປ່ຽນກັນຂຶ້ນປະກອບຄຳເຫັນ ເຮັດໃຫ້ບົດສະຫຼຸບມີເນຶ້ອໃນຄົບຖ້ວນສົມບຸນ ແລະ ເອກະພາບນໍາໄປຈັດຕັ້ງປະຕິບັດໃນທິດທາງຕໍ່ໜ້າໃຫ້ໄດ້ຮັບໝາກຜົນສູງ.
(ຂ່າວ: ບຸນເພັງ ແກ້ວມະນີວົງ)
ຄໍາເຫັນ