ກອງຮ້ອຍສື່ສານ 231 ປະດັບຫຼຽນໄຊພິລະອາດຫານ 

ເມື່ອບໍ່ດົນມານີ້, ກອງຮ້ອຍສື່ສານ 231 ທະຫານແຂວງບໍ່ແກ້ວ ໄດ້ຈັດຕັ້ງພິທີປະດັບຫຼຽນໄຊພິລະອາດຫານ ແລະ ມອບໃບຍ້ອງຍໍຂອງກອງບັນຊາການທະຫານແຂວງບໍ່ແກ້ວຂຶ້ນຢູ່ທີ່ສະໂມສອນຂອງກອງດັ່ງກ່າວ ໂດຍການເຂົ້າຮ່ວມເປັນປະທານຂອງສະຫາຍ ພັນໂທ ພອນໄຊ ອຸ່ນອາລົມ ຫົວໜ້າພະແນກສື່ສານຫ້ອງເສນາທິການ ກອງບັນຊາການທະຫານແຂວງບໍ່ແກ້ວ, ມີສະຫາຍ ພັນໂທ ຄໍາກອນ ແກ້ວໄມຜິດ ຫົວໜ້າການເມືອງກອງຮ້ອຍສື່ສານ 231 ທະຫານແຂວງບໍ່ແກ້ວ ແລະ ພາກສ່ວນກ່ຽວຂ້ອງເຂົ້າຮ່ວມ. 
ພິທີ ສະຫາຍ ພັນຕີ ບຸນຈັນ ສີນາວາ ຫົວໜ້າໝວດ 1 ກອງຮ້ອຍສື່ສານ 231 ທະຫານແຂວງບໍ່ແກ້ວ ໄດ້ຂຶ້ນຜ່ານຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການມອບຫຼຽນໄຊພິລະອາດຫານຊັ້ນ II, ຊັ້ນ III ແລະ ມອບໃບຍ້ອງຍໍ ໃຫ້ກອງບັນຊາການທະຫານແຂວງ, ໃຫ້ນາຍ ແລະ ພົນທະຫານ ເພື່ອຍ້ອງຍໍນາຍ ແລະ ພົນທະຫານ, ທີ່ໄດ້ເຮັດສຳເລັດໜ້າທີ່ການເມືອງຕາມການມອບໝາຍຂອງຂັ້ນເທິງເພື່ອແກ້ໄຂບັນຫານໍ່ແໜງທີ່ມາເຄື່ອນໄຫວກໍຄວາມບໍ່ສະຫງົບຢູ່ແຂວງບໍ່ແກ້ວ ເຮັດໃຫ້ພື້ນຖານດັ່ງກ່າວມີຄວາມສະຫົງບ ແລະ ສຳເລັດຕາມແຜນການ, ຖືເປັນການປະກອບສ່ວນສໍາຄັນເຂົ້າໃນວຽກງານປ້ອງກັນຊາດປ້ອງກັນຄວາມສະຫງົບ ເພື່ອປົກປັກຮັກສາ ແລະ ພັດທະນາປະເທດຊາດ. ໃນນີ້ ໄດ້ປະດັບຫຼຽນໄຊພິລະອາດຫານຊັ້ນ II, ຊັ້ນ III ໃຫ້ 11 ສະຫາຍ ເປັນກຽດປະດັບຫຼຽນໂດຍ ສະຫາຍ ພັນໂທ ພອນໄຊ ອຸ່ນອາລົມ, ມອບໃບຍ້ອງຍໍຂອງກອງບັນຊາການ ຈຳນວນ 30 ສະຫາຍ ເປັນກຽດມອບໂດຍສະຫາຍ ພັນຕີ ຄໍາລານ ລັດສະໝີ ຮອງຫົວໜ້າພະແນກສື່ສານ ຫ້ອງເສນາທິການ ກອງບັນຊາການທະຫານແຂວງບໍ່ແກ້ວ.
ໂອກາດດັ່ງກ່າວ, ສະຫາຍ ພັນໂທ ພອນໄຊ ອຸ່ນອາລົມ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ກົມກອງຍາດມາໄດ້ໃນ 1 ປີຜ່ານມາ ພ້ອມທັງເນັ້ນໜັກໃຫ້ ຄະນະພັກ - ຄະນະບັນຊາ ແຕ່ລະຂັ້ນ ຕະຫຼອດຮອດພະນັກງານ-ນັກຮົບ ເອົາໃຈໃສ່ວຽກງານປ້ອງກັນຊາດ - ປ້ອງກັນຄວາມສະຫງົບໃຫ້ແຂງແຮງຂຶ້ນກວ່າເກົ່າ, ຕິດພັນກັບການປັບປຸງກໍ່ສ້າງພະນັກງານ - ນັກຮົບ, ເພີ່ມທະວີແບບແຜນວິທີເຮັດວຽກໃຫ້ຖຶກຕ້ອງກັບແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ຂໍ້ກຳນົດກົດລະບຽບຂອງກອງທັບ, ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ, ປະຕິບັດນໍ້າໃຈ ເພິ່ງຕົນເອງ ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.
(ຂ່າວ: ກອງຮ້ອຍສື່ສານ 231)