ກອງປະຊຸມ ແມ່ນໄດ້ຮັບຟັງການລາຍງານຜົນການຄົ້ນຄວ້າ, ກວດກາ, ການສະເໜີຂໍອະໄພຍະໂທດຂອງ ຄະນະກໍາມະການອະໄພຍະໂທດລະດັບກະຊວງ, ແຂວງ, ນະຄອນຫຼວງວຽງຈັນ ປະຈໍາປີ 2025 ມີຈໍານວນທັງໝົດ 2,867 ຄົນ ຍິງ 363 ຄົນ, ຕ່າງປະເທດ ຈຳນວນ 59 ຄົນ ຊຶ່ງກອງປະຊຸມທີ່ມີຄວາມໝາຍຄວາມສໍາຄັນນີ້ ຈະໄດ້ຮັບຟັງການລາຍງານບັນຫາສໍາຄັນ ຄື: ໜຶ່ງ, ຮັບຟັງຜົນການລາຍງານການຄົ້ນຄວ້າ ແລະ ກວດກາການສະເໜີໃຫ້ອະໄພຍະໂທດ ຂອງຈຸທີ 1 ປະກອບ ມີ: ກະຊວງປ້ອງກັນປະເທດ, ແຂວງຫົວພັນ, ໄຊຍະບູລີ, ອຸດົມໄຊ, ຫຼວງນໍ້າທາ, ຫຼວງພະບາງ, ໄຊສົມບູນ ແລະ ແຂວງວຽງຈັນ; ຈຸທີ 2 ປະກອບມີ: ນະຄອນຫຼວງວຽງຈັນ, ບໍລິຄໍາໄຊ, ຄໍາມ່ວນ, ສະຫວັນນະເຂດ, ສາລະວັນ, ຈໍາປາສັກ ແລະ ແຂວງອັດຕະປື; ຈຸທີ 3 ປະກອບມີ: ຄ້າຍຄຸມຂັງ-ດັດສ້າງ ໂພນຕ້ອງ, ໂພນເງິນ, ນາຂ່າ, ຄັງໄຂ, ລ້ອງເລິກ ແລະ ຄ້າຍຄຸມຂັງ-ດັດສ້າງ ແກ້ງຄັນ ແລະ ຈຸທີ 4 ປະກອບມີ: ແຂວງເຊກອງ, ແຂວງບໍ່ແກ້ວ, ຄ້າຍບັງລຽງ, ຄ້າຍ ຕານປ່ຽວ ແລະ ຄ້າຍຄຸມຂັງ-ດັດສ້າງ ບຸນເໜືອ.
ໃນໂອກາດນີ້, ປະທານກອງປະຊຸມໄດ້ຮຽກຮ້ອງທຸກທ່ານ ຈົ່ງສຸມໃສ່ໃນການຄົ້ນຄວ້າ ແລະ ປະກອບຄໍາເຫັນດ້ວຍຄວາມຮັບຜິດຊອບສູງ, ກົງໄປກົງມາ ແລະ ມີວິທີການແກ້ໄຂຢ່າງຈະແຈ້ງ ໂດຍອີງຕາມ ລັດຖະບັນຍັດ ວ່າດ້ວຍການໃຫ້ອະໄພຍະໂທດ ແລະ ນິຕິກໍາ ຂອງຄະນະກໍາມະການອະໄພຍະໂທດລະດັບຊາດ ເປັນພື້ນຖານໃນການຄົ້ນຄວ້າພິຈາລະ ນາ ຊຶ່ງຜ່ານການຮັບຟັງການສະເໜີລາຍງານ, ປຶກສາຫາລື, ປະກອບຄໍາເຫັນ ແລະ ເພື່ອຜັນຂະຫຍາຍເນື້ອໃນຈິດໃຈຂອງກອງປະຊຸມຄັ້ງນີ້ ໃຫ້ບັນລຸຕາມຈຸດປະສົງ ແລະ ຄາດ ໝາຍທີ່ວາງໄວ້, ບັນດາສະຫາຍຫົວໜ້າຈຸ ເວົ້າລວມ, ເວົ້າສະເພາະ ແມ່ນບັນດາທ່ານທີ່ຮັບຜິດຊອບແຕ່ລະກະຊວງ, ແຂວງ, ນະຄອນຫຼວງວຽງຈັນ ຈົ່ງໄດ້ສືບຕໍ່ຍົກສູງຄວາມຮັບຜິດຊອບ ແລະ ເອົາໃຈໃສ່ໃນການຈັດຕັ້ງປະຕິບັດບາງວຽກງານທີ່ສໍາຄັນ ຄື: ໜຶ່ງ, ກ່ຽວກັບການຄົ້ນຄວ້າ ແລະ ກວດກາ, ສະເໜີໃຫ້ອະໄພຍະໂທດ ປະຈໍາປີ 2025 ພື້ນຖານແມ່ນເຫັນດີຕາມການລາຍງານ ຂອງບັນດາທ່ານ ແລະ ຮີບຮ້ອນນໍາໄປກວດກາຄືນ ແລະ ປັບປຸງ ໂດຍສະເພາະການຄິດໄລ່ໂຕເລກຫຼຸດຜ່ອນໂທດ, ປ່ອຍຕົວ, ການຈັດພິມຂໍ້ມູນຕ່າງໆ, ໃຫ້ຊັດເຈນ, ຄົບຖ້ວນ; ສອງ, ມອບໃຫ້ຄະນະຮັບຜິດຊອບ ຂຶ້ນແຜນເພື່ອຂໍທິດຊີ້ນໍາ ຈາກທ່ານຮອງນາຍົກລັດຖະມົນຕີ ປະທານຄະນະກໍາມະການອະໄພຍະໂທດ ລະດັບຊາດ ໃນການເປີດກອງປະຊຸມ ຄະນະກໍາມະການອະໄພຍະໂທດລະດັບຊາດ ຕາມລັດຖະບັນຍັດ ວ່າດ້ວຍການໃຫ້ອະໄພຍະໂທດ; ສາມ, ສໍາລັບນັກໂທດປະຫານຊີວິດ ທີ່ທາງຫ້ອງວ່າການສໍານັກງານປະທານປະເທດ ສົ່ງເອກະສານມາແລ້ວ ມອບໃຫ້ທ່ານຮອງຫົວໜ້າກອງເລຂາ ຄະນະກໍາມະການອະໄພຍະໂທດລະດັບຊາດ ໂດຍສະເພາະແມ່ນຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ແຈກຢາຍມອບໃຫ້ແຕ່ສະຫາຍຮັບຜິດຊອບໃນການກວດກາ ແລະ ຄົ້ນຄວ້າ ເພື່ອນໍາສະເໜີຕໍ່ກອງເລຂາ ຄະນະກໍາມະການອະໄພຍະໂທດ ລະດັບຊາດ ພິ ຈາລະນາ.
(ແຫຼ່ງຂ່າວ: ອອປສ ຂ່າວ: ຕຸໄລເພັດ)
ຄໍາເຫັນ