ການດຳເນີນຄະດີອາຊະຍາກຳສັດປ່າ, ພາຍໃຕ້ການເປັນປະທານຂອງ ທ່ານ ນາງ ພອນເພັດ ອຸ່ນແກ້ວ ຄະນະບໍລິຫານງານພັກ ຮອງຫົວໜ້າອົງການໄອຍະການປະຊາຊົນສູງສຸດ, ມີບັນດາທ່ານຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງພະແນກ ແລະ ວິຊາການ ຂອງອົງການໄອຍະການປະຊາຊົນສູງສຸດ, ສານປະຊາຊົນສູງສຸດ, ກະຊວງຍຸຕິທຳ, ກະຊວງປ້ອງກັນຄວາມສະຫງົບ, ກະຊວງກະສິກຳ ແລະ ປ່າໄມ້, ກະຊວງການເງິນ, ມະຫາວິທະຍາໄລແຫ່ງຊາດ ແລະ ອົງການອະນຸລັກສັດປ່າ ປະຈໍາ ສປປ ລາວ ເຂົ້າຮ່ວມ.
ກອງປະຊຸມໃນຄັ້ງນີ້ ໄດ້ສືບຕໍ່ຄົ້ນຄວ້າ ປຶກສາຫາລື ບັນດາຫົວຂໍ້ທີ່ສຳຄັນ ເປັນຕົ້ນ ແມ່ນຈະໄດ້ປຶກສາຫາລື ກ່ຽວກັບກົດໝາຍ ແລະ ລະບຽບການຕ່າງໆ ທີ່ກ່ຽວຂ້ອງກັບການຕ້ານອາຊະຍາກໍາສັດປ່າ ເພື່ອເປັນບ່ອນອີງໃນການຂຽນປຶ້ມຄູ່ມື ການດໍາເນີນຄະດີອາຊະຍາກໍາສັດປ່າ; ປຶກສາຫາລື ແລະ ທົບທວນ ກ່ຽວກັບຮ່າງສາລະບານປື້ມຄູ່ມື ການດຳເນີນຄະດີອາຊະຍາກຳປ່າໄມ້ ທີ່ໄດ້ປັບປຸງ ແລະ ແບ່ງກຸ່ມຄົ້ນຄວ້າຄືນແຕ່ລະຫົວຂໍ້ໃຫ້ແກ່ຄະນະຮັບຜິດຊອບຂຽນປື້ມຄູ່ມື ເພື່ອຄົ້ນຄວ້າຂຽນເນື້ອໃນປະກອບເຂົ້າໃນປື້ມຄູ່ມືດັ່ງກ່າວ; ປຶກສາຫາລື ກ່ຽວກັບການກໍານົດເນື້ອໃນ, ກຳນົດເວລາ, ການດຳເນີນການຂຽນ ແລະ ຄົ້ນຄວ້າເອກະສານທີ່ເປັນບ່ອນອີງ ໃນການຂຽນປຶ້ມຄູ່ມື ການດຳເນີນຄະດີອາຊະຍາກຳສັດປ່າ. ພ້ອມນັ້ນ ບັນດາທ່ານທີ່ເຂົ້າຮ່ວມ ກອງປະຊຸມ ຍັງໄດ້ສົນທະນາແລກປ່ຽນປະກອບຄຳຄິດຄຳເຫັນກ່ຽວກັບບັນຫາທີ່ຄົງຄ້າງ ໃນການຂຽນປຶ້ມຄູ່ມືດັ່ງກ່າວ ແລະ ວາງແຜນກິດຈະກຳຄັ້ງຕໍ່ໄປ. (ຂ່າວ-ພາບ: ສຸກພາວະດີ ອອປສ)
ຄໍາເຫັນ