ໃນ ວັນທີ 8 ພະຈິກນີ້ ທີ່ ນະຄອນຫຼວງວຽງຈັນ,ໂດຍການເປັນປະທານຮ່ວມ ຂອງ ທ່ານ ພົນຕີ ຄຳກິ່ງ ຜຸຍຫຼ້າມະນີວົງ ຮອງລັດຖະມົນຕີກະຊວງ ປກສ, ທ່ານ ຊູໂຕມຸ ໂກຍຊູມິເອກອັກຄະຣາຊະທູດຍີ່ປຸ່ນ ປະຈຳລາວ,ທ່ານ ມາສູດ ກາລີມີປົວ ຜູ້ຕາງໜ້າອົງການສະຫະປະຊາຊາດເພື່ອຄວບຄຸມຢາເສບຕິດ ແລະ ຕ້ານອາຊະຍາກໍາປະຈຳພາກພື້ນອາຊີຕາເວັນອອກສ່ຽງໃຕ້ ແລະ ປາຊີຟິກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ໄດ້ນຳສະເໜີສະພາບບັນຫາຢາເສບຕິດ,ຜົນສຳເລັດທີ່ພົ້ນເດັ່ນ ແລະ ສິ່ງທ້າທາຍກ່ຽວກັບບັນຫາຢາເສບຕິດຂອງ ສປປ ລາວ ແລະ ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ,ທິດທາງແຜນການໃນຕໍ່ໜ້າໃນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຮອດທ້າຍປີ 2025 ແລະ ນຳສະເໜີ ສະພາບລວມບັນຫາຢາເສບຕິດຢູ່ ສປປ ລາວ ແລະ ພາກພື້ນແມ່ນໍ້າຂອງ,ແຜນງານ ແລະ ການປະສານງານຂອງອົງການ UNODCD.
ທ່ານ ພົນຕີ ຄຳກິ່ງ ຜຸຍຫຼ້າມະນີວົງກ່າວວ່າ: ກອງປະຊຸມດັ່ງກ່າວໄດ້ຈັດຂຶ້ນທຸກປີເພື່ອກະກຽມໃຫ້ແກ່ກອງປະຊຸມໃຫຍ່ປະຈໍາປີຂອງຂະບວນການໂຕະມົນໃນທ້າຍເດືອນພະຈິກ 2024 ໂດຍແມ່ນກະຊວງແຜນການ ແລະ ການລົງທຶນຈະເປັນເຈົ້າພາບຊຶ່ງບັນຫາຢາເສບຕິດຢູ່ໃນໂລກແລະພາກພື້ນໄດ້ມີການຂະຫຍາຍວົງກວ້າງ, ເພີ່ມທະວີຄວາມອັນຕະລາຍ ຊຶ່ງໄດ້ຕິດພັນກັບການເຊື່ອມໂຍງກັບບັນຫາການກໍ່ການຮ້າຍ, ອາຊະຍາກໍາຂ້າມຊາດ, ອາຊະຍາກໍາທາງໂທລະຄົມມະນາຄົມ, ອາຊະຍາກໍາທາງຄອມພິິວເຕີ, ອາຊະຍາກໍາທາງການຟອກເງິນ, ການຄ້າມະນຸດ ແລະ ອາຊະຍາກໍາອື່ນໆທີ່ໃຊ້ຄວາມຮຸ່ນແຮງປະເພດຕ່າງໆມີທ່າອ່ຽງເພີ່ມຂຶ້ນໃນແຕ່ລະປີ, ກາຍເປັນໄພຂົ່ມຂູ່ຕໍ່ການສ້າງສາພັດທະນາເສດຖະກິດ-ສັງຄົມ-ວັດທະນະທຳກໍຄືຄວາມໝັ້ນຄົງຂອງພາກພື້ນແລະປະຊາຊາດຢູ່ໃນໂລກ.
ທ່ານກ່າວຕື່ມວ່າ:ໃນຊຸມປີທີ່ຜ່ານມາ,ລັດຖະບານລາວໄດ້ຖືເອົາການແກ້ໄຂບັນຫາຢາເສບຕິດເປັນວຽກງານບຸລິມະສິດ, ຈຳເປັນ ແລະ ຮີບດ່ວນ ຊຶ່ງໄດ້ຍົກຂຶ້ນເປັນວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດແຕ່ປີ 2021-2023 ແລະສືບຕໍ່ໄປຈົນໝົດປີ 2025ໂດຍໄດ້ປັບປຸງບາງມາດຕາກ່ຽວກັບກົດໝາຍວ່າດ້ວຍຢາເສບຕິດ,ໄດ້ອອກນິຕິກຳເພື່ອໃຫ້ສອດຄ່ອງກັບສະພາບການຄວາມເປັນຈິງໃນປັດຈຸບັນໃນການແກ້ໄຂບັນຫາຢາເສບຕິດ.ໄດ້ເອົາໃຈໃສ່ໃນການໂຄສະນາສຶກສາອົບຮົມໃຫ້ທົ່ວປວງຊົນ ໂດຍສະເພາະແມ່ນໄວໜຸ່ມ ແລະ ນັກສຶກສາ ເພື່ອໃຫ້ເຂົາເຈົ້າເຂົ້າໃຈເຖິງພິດໄພອັນຕະລາຍຈາກຢາເສບຕິດຢ່າງຕໍ່ເນື່ອງ,ໄດ້ຈັດຕັ້ງປະຕິບັດໂຄງການພັດທະນາທາງເລືອກທົດແທນການປູກພືດທີ່ມີສານເສບຕິດຢູ່ບັນດາແຂວງພາກກາງ ແລະ ພາກເໜືອຂອງລາວ, ໄດ້ສ້າງສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດຂຶ້ນທັງໝົດ 14 ແຫ່ງເພື່ອບຳບັດ, ປິ່ນປົວ, ຟື້ນຟູສຸຂະພາບ, ໃຫ້ຄໍາປຶກສາແກ່ຜູ້ຕິດຢາເສບຕິດ ແລະ ຈັດຝຶກອົບຮົມວິຊາຊີບທີ່ຈໍາເປັນໃຫ້ແກ່ພວກເຂົາເຈົ້າ,ເພື່ອກັບຄືນມາເປັນຄົນດີຂອງຄອບຄົວ ແລະ ສັງຄົມ, ໄດ້ໃຫ້ຄວາມສໍາຄັນຕໍ່ກັບການປະຕິບັດມາດຕະການດ້ານກົດໝາຍໂດຍເຈົ້າໜ້າທີ່ລາວເຮົາສາມາດມ້າງໄດ້ຫຼາຍຄະດີສຳຄັນ, ຢຶດຢາເສບຕິດແລະສານເຄມີຕັ້ງຕົ້ນໄດ້ຈຳນວນຫຼາຍ.ນອກຈາກນັ້ນ, ກໍໄດ້ເອົາໃຈໃສ່ໃຫ້ການຮ່ວມມື, ແລກປ່ຽນບົດຮຽນ, ຂໍ້ມູນ-ຂ່າວສານ, ປະສົບການກັບບັນດາປະເທດເພື່ອນມິດສາກົນແລະ ອົງການຈັດຕັ້ງສາກົນຕ່າງໆ ເປັນຕົ້ນແມ່ນໄດ້ສ້າງສູນປະສານງານແມ່ນ້ຳຂອງປອດໄພ, ສູນປະສານງານແມ່ນ້ຳຂອງ-ແມ່ນ້ຳລ້ານຊ້າງ, ຫ້ອງການປະສານງານຕາມຊາຍແດນ ຫຼື BLOsເພື່ອເປັນຈຸດປະສານງານ, ແລກປ່ຽນບົດຮຽນ ແລະ ຂໍ້ມູນ-ຂ່າວສານເພື່ອແກ້ໄຂບັນຫາຢາເສບຕິດຮ່ວມກັນ,ໂອກາດນີ້ສະແດງຄວາມຂອບໃຈຕໍ່ລັດຖະບານ ສສຫວຽດນາມ, ສປ ຈີນ, ຣາຊະອານາຈັກ ໄທ,ອົສຕຣາລີ, ຍີ່ປຸ່ນ, ສເກົາຫຼີ ແລະບັນດາປະເທດອື່ນໆລວມທັງອົງການUNODCທີ່ໄດ້ໃຫ້ການຊ່ວຍເຫຼືອ, ອູ້ມຊູ ແລະ ສະໜັບສະໜູນເຂົ້າໃນວຽກງານແກ້ໄຂບັນຫາຢາເສບຕິດຢູ່ສປປລາວ.
(ຂ່າວ-ພາບ:ສຳນານ)
ຄໍາເຫັນ