ກອງປະຊຸມຫາລືວຽກງານຕິດຕາມກວດກາຄ້າຍຄຸມຂັງ-ດັດສ້າງ

ກອງປະຊຸມໃນຄັ້ງນີ້, ແມ່ນເພື່ອປະສານສົມທົບກັນ ລະຫວ່າງ ບັນດາອົງການຈັດຕັ້ງທີ່ດໍາເນີນຄະດີຕາມຂະບວນຍຸຕິທໍາແຕ່ລະຂັ້ນ ທີ່ຜ່ານມາແມ່ນສາມາດຈັດຕັ້ງປະຕິບັດໄດ້ດີ ແລະ ໄດ້ຖືເອົາການຊີ້ນຳ-ນຳພາ ຂອງຄະນະນໍາບັນຊາຂັ້ນຂອງຕົນ ແລະ ກົດໝາຍ ເປັນບ່ອນອີງໃນການຈັດຕັ້ງປະຕິບັດ, ພ້ອມນີ້ ກໍໄດ້ມີການປະສານສົມທົບ ກັບຂະແໜງການພາຍໃນຕົນເອງ ແລະ ພາກສ່ວນທີ່ກ່ຽວຂ້ອງ ເພື່ອພ້ອມກັນຈັດຕັ້ງປະຕິບັດກົດໝາຍ ໃຫ້ມີຄວາມເປັນເອກະພາບ ໃນການຄຸມຄອງຜູ້ຖືກຫາ, ນັກໂທດ. ແຕ່ເຖິງຢ່າງໃດກໍຕາມ ໃນການຈັດຕັ້ງປະຕິບັດຜ່ານມາກໍຍັງມີບັນຫາຄົງຄ້າງເຊັ່ນ ການກັກຂັງຜູ້ຖືກຫາເກີນກໍານົດ ແລະ ນັກໂທດຈໍານວນໜຶ່ງຖືກສານຕັດສິນແລ້ວພັດໄດ້ຮັບຄໍາຕັດສິນຊັກຊ້າ. ສະນັ້ນ, ໃນກອງປະຊຸມໃນຄັ້ງນີ້ ຈຶ່ງຖືວ່າເປັນເວທີໃນການແລກປ່ຽນຄຳຄິດຄຳເຫັນ ແລະ ປະສານງານລະຫວ່າງອົງການທີ່ດໍາເນີນຄະດີຕາມຂະບວນຍຸຕິທໍາ ໃນການແກ້ໄຂບັນຫາທີ່ຍັງຄົງຄ້າງ ເພື່ອເຮັດໃຫ້ການຄຸມຂັງ ຜູ້ຖືກຫາ, ນັກໂທດ ມີຄວາມເປັນລະບຽບຮຽບຮ້ອຍ, ຍຸຕິທຳ, ໂປ່ງໃສ ແລະ ສອດຄ່ອງກັບກົດໝາຍ. ກອງປະຊຸມຄັ້ງນີ້ ແມ່ນເພື່ອຊອກຫາສາເຫດ ແລະ ເອົາຂໍ້ມູນຕົວຈິງຈາກແຕ່ລະພາກສ່ວນ ວ່າສາເຫດທີ່ຄົງຄ້າງນັ້ນແມ່ນຍ້ອນຫຍັງແທ້ ແລະ ທັງໄດ້ພ້ອມກັນວິເຄາະວິໄຈບັນຫາ ເພື່ອຊອກຫາວິທີແກ້ໄຂທີ່ເປັນຈຸດສຸມ, ມີຄວາມເປັນເອກະພາບ ສາມາດນໍາເຂົ້າສູ່ວຽກງານຕົວຈິງໄດ້ ແລະ ກ່ອນຈະປະຕິບັດຕ້ອງໄດ້ລາຍງານ, ສະເໜີຕໍ່ຄະນະນໍາ ເພື່ອມີທິດຊີ້ນໍາ ໃນການຈັດຕັ້ງປະຕິບັດຕົວຈິງ.

ພ້ອມກັນນີ້. ປະທານກອງປະຊຸມຮຽກຮ້ອງທຸກທ່ານ ແລະ ພາກສ່ວນເຮັດໜ້າທີ່ການເມືອງ ດ້ວຍຄວາມຮັບຜິດຊອບສູງ, ມີຄວາມສາມັກຄີເປັນປຶກແຜ່ນກັບພາກສ່ວນອົງການກ່ຽວຂ້ອງ ເພື່ອປະສານສົມທົບຮ່ວມກັນສ້າງກົນໄກ ແລະ ແບບແຜນວິທີເຮັດວຽກ ໃນການປະຕິບັດໜ້າທີ່ວຽກງານຕົວຈິງໃຫ້ມີຄວາມເປັນເອກະພາບ ແລະ ຖືກກົດໝາຍ ໂດຍມີການຕິດຕາມກວດກາຊຶ່ງກັນ ແລະ ກັນ, ສະຫຼຸບ, ຖອດຖອນບົດຮຽນ ແລະ ລາຍງານ, ຂໍຄຳເຫັນຊີ້ນຳ ຈາກຂັ້ນເທິງຂອງຕົນ ຢ່າງເປັນປົກກະຕິ.

(ຂ່າວ: ແສງພະຈັນ)