ກອງປະຊຸມຮ່ວມລະຫວ່າງອົງການປົກຄອງແຂວງຄໍາມ່ວນ ແລະ ສະພາປະຊາຊົນແຂວງ 

ກອງປະຊຸມຮ່ວມລະຫວ່າງອົງການປົກຄອງແຂວງຄຳມ່ວນແລະສະພາປະຊາຊົນແຂວງໄດ້ຈັດຂື້ນໃນວັນທີ 10 ມັງກອນ ນີ້ ທີ່ເຮືອນຮັບແຂກເລກ 1 ຂອງແຂວງຄໍາມ່ວນໂດຍການເປັນປະທານຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ແລະ ທ່ານ ບຸນມີ ພິມມະສອນ ປະທານສະພາປະຊາຊົນແຂວງ, ໂດຍມີບັນດາທ່ານຮອງເຈົ້າແຂວງ, ຫົວໜ້າພະແນກການ, ຄະນະປະຈຳສະພາ ແລະ ພາກສ່ວນກ່ຽວຂ້ອງ ເຂົ້າຮ່ວມ. 
ກອງປະຊຸມຄັ້ງນີ້ໄດ້ຮັບຟັງການຜ່ານແຜນການກະກຽມ ແລະ ວາລະດຳເນີນກອງປະຊຸມ,ສະພາບຄວາມຄືບໜ້າໃນການຫ້າງຫາກະກຽມຄວາມພ້ອມໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນ ແຂວງຄຳມ່ວນຊຸດທີ II, ເນື້ອໃນບັນດາຂໍ້ເຈາະຈີ້ມເພື່ອໃຫ້ບັນດາພະແນກການກ່ຽວຂ້ອງກະກຽມຊີ້ແຈງອະທິບາຍໃນກອງປະຊຸມຖຶກປະເດັນ, ຮັບປະກັນເນື້ອໃນທີ່ສົມບູນ ແລະ ສອດຄ່ອງກັບກຳນົດເວລາ, ພ້ອມນັ້ນກອງປະຊຸມຍັງໄດ້ມີຄໍາເຫັນຄົ້ນຄວ້າ ແລະ ປະກອບຄໍາຄິດຄໍາເຫັນໃສ່ບັນດາເນື້ອໃນເອກະສານດັ່ງກ່າວ ເພື່ອຄວາມເອກະພາບທາງດ້ານເນື້ອໃນ, ທັງນີ້ກໍເພື່ອເປັນການກະກຽມຄວາມພ້ອມໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄຳມ່ວນຊຸດທີ II ໃຫ້ບັນລຸຕາມລະດັບຄາດໝາຍທີ່ວາງໄວ້, ແນໃສ່ຮັບປະກັນໃຫ້ການພິຈາລະນາ, ຮັບຮອງເອົາບັນຫາສຳຄັນພື້ນຖານຂອງແຂວງ, ການສ້າງ ແລະ ປັບປຸງນິຕິກໍາໃຕ້ກົດໝາຍ ໃຫ້ມີຄວາມເປັນເອກະພາບຕໍ່ເນື້ອໃນທີ່ຈະນໍາເຂົ້າຄົ້ນຄວ້າ ແລະ ພິຈາລະນາຮັບຮອງເອົາບັນຫາຕ່າງໆ ໃນກອງປະຊຸມໃຫ້ບັນລຸຜົນສຳເລັດໄດ້ເປັນຢ່າງດີເຊິ່ງກອງປະຊຸມສະໄໝສາມັນເທື່ອທີ 6 ຄາດວ່າຈະໄດ້ຈັດຂື້ນລະຫວ່າງວັນທີ 16-19 ມັງກອນ 2024ທີ່ສະໂມສອນແຂວງ.
ຂ່າວ-ພາບ: ມະນີວັນ