ໂດຍການເຂົ້າຮ່ວມຂອງທ່ານ ສໍາລານ ພັນຄະວົງຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ຈ່າງສື ຜູ້ຈັດການໂຄງການຊ່ວຍເຫຼືອລາວ ຈາກສໍານັກພິມຈໍາໜ່າຍການສຶກສາ ຊຽງໄຮ້ ຈໍາກັດ, ມີບັນດາ ຫົວໜ້າກົມ, ຮອງກົມ, ຜູ້ອໍານວຍການສະຖາບັນ, ຄະນະບັນນາທິການ ແລະ ຊ່ຽວຊານ ຈາກ ສປ ຈີນ ແລະ ແຂກຖືກເຊີນເຂົ້າຮ່ວມ.
ທ່ານ ສໍາລານ ພັນຄະວົງ ໄດ້ກ່າວວ່າ: ສໍານັກພິມຈໍາໜ່າຍ ສຶກສາ ຊຽງໄຮ້ ຈໍາກັດ ເປັນຜູ້ຈັດຕັ້ງປະຕິບັດໂຄງການຊຶ່ງສໍານັກພິມດັ່ງກ່າວ ໄດ້ຈັດຕັ້ງຊ່ຽວຊານດ້ານການສຶກສາທີ່ມີຊື່ສຽງ ແລະ ປະສົບການຂອງນະຄອນຊຽງໄຮ້ ມາຮ່ວມສ້າງ ແລະ ຮຽບຮຽງປຶ້ມຄູ່ມື, ປຶ້ມແບບຮຽນ ໃນການຝຶກອົບຮົມຈົນເຮັດໃຫ້ປຶ້ມຄູ່ມື ແລະ ແບບຮຽນການຝຶກອົບຮົມດັ່ງກ່າວສໍາເລັດເປັນຈໍານວນຫຼາຍຊຸດ. ພ້ອມດຽວກັນນັ້ນ, ຝ່າຍລາວຍັງໄດ້ສໍາເລັດວຽກງານການກວດແກ້ປຶ້ມຄູ່ມື ແລະ ປຶ້ມແບບຮຽນຝຶກອົບຮົມດັ່ງກ່າວຊຶ່ງປຶ້ມເຫຼົ່ານີ້ບໍ່ພຽງແຕ່ມີເນື້ອໃນທີ່ອຸດົມສົມບູນເທົ່ານັ້ນ ແຕ່ຍັງນໍາເອົາບັນດາຄວາມຮູ້ໃໝ່ໆແຫ່ງຍຸກສະໄໝ ຈໍານວນຫຼວງຫຼາຍເຂົ້າມາເພີ່ມເຕີມ, ຊ່ວຍໃຫ້ການສຶກສາຂອງລາວ ໃຫ້ເຊື່ອມໂຍງເຂົ້າກັບພາກພື້ນ ແລະ ສາກົນ.
ພາຍຫຼັງທີ່ມີການສ້າງ ແລະ ຮຽບຮຽງປຶ້ມຄູ່ມື, ປຶ້ມແບບຮຽນ ໃນການຝຶກອົບຮົມແລ້ວ ສໍານັກພິມການສຶກສາ ນະຄອນຊຽງໄຮ້ ຍັງໄດ້ຈັດຕັ້ງການຝືກອົບຮົມ ໃຫ້ແກ່ພະນັກງານດ້ານການສຶກສາຂອງລາວ ເປັນຈໍານວນຫຼາຍຊຸດ, ໂດຍມີຜູ້ຊ່ຽວຊານດ້ານການສຶກສາທີ່ມີຄຸນວຸດທິສູງຂອງຈີນ ໃຫ້ຄໍາແນະນໍາບຸກຄະລາກອນການສຶກສາຂອງລາວ. ໂດຍຜ່ານການຝຶກອົບຮົມໃຫ້ບັນດານັກສໍາມະນາກອນລາວ ບໍ່ພຽງແຕ່ໄດ້ຮັບຄວາມຮູ້ ແລະ ປະສົບການ ທີ່ຫຼາກຫຼາຍຈາກຜູ້ຊ່ຽວຊານດ້ານການສຶກສາຂອງ ສປ ຈີນ ເທົ່ານັ້ນ; ຍັງໄດ້ຮັບໂອກາດແລກປ່ຽນບົດຮຽນປະສົບການກັບຜູ້ຊ່ຽວຊານ ຂອງ ສປ ຈີນ ແລະ ເພື່ອນຮ່ວມວົງການສຶກສາຂອງຕົນຢ່າງເລິກເຊິງ. ພາຍໃຕ້ການຈັດການໂຄງການຝຶກອົບຮົມຂອງສໍານັກພິມການສຶກສາ ນະຄອນຊຽງໄຮ້, ບັນດານັກສໍາມະນາກອນລາວ ທີ່ຝຶກອົບຮົມຢູ່ ສປ ຈີນ ຍັງໄດ້ສໍາຜັດປະສົບການທາງການສຶກສາ ຢູ່ພາກສະໜາມ ແລະ ຮຽນຮູ້ວັດທະນະທໍາອັນເປັນມູນເຊື້ອຂອງ ສປ ຈີນ ດ້ວຍຕົນເອງ; ເຊື່ອແນ່ວ່າສິ່ງເຫຼົ່ານີ້ຈະສາມາດສ້າງຄວາມອຸດົມສົມບູນດ້ານເນື້ອໃນການສຶກສາ, ຍົກສູງລະດັບການສຶກສາ ແລະ ແນວຄິດທາງການສຶກສາຂອງ ສປປ ລາວ; ເພີ່ມທະວີມິດຕະພາບລະຫວ່າງສອງປະເທດ ລາວ-ຈີນ ໃຫ້ມີຄວາມຍືນຍົງຕະຫຼອດໄປອີກດ້ວຍ.ເພາະສະນັ້ນ, ຫວັງຢ່າງຍິ່ງວ່າ: ຈະໄດ້ດໍາເນີນການສືບຕໍ່ “ໂຄງການຊ່ວຍເຫຼືອຍົກສູງຂີດຄວາມສາມາດຄູຊົນນະບົດລາວ ໄລຍະ 2”, ເພື່ອເຮັດໃຫ້ຄູ-ອາຈານ ຊົນນະບົດຂອງລາວ ໄດ້ມີໂອກາດເຂົ້າຮ່ວມຝຶກອົບຮົມໃຫ້ຫຼາຍຂຶ້ນ.
ຂ່າວ, ບຸນຕອມ,ພາບ:ບຸນອູ້ມ
ຄໍາເຫັນ