ກອງປະຊຸມໄດ້ມີການຄົ້ນຄວ້າຫຼາຍໜ້າວຽກ ໂດຍສະເພາະແມ່ນໂລໂກ້, ສັດນຳໂຊກ, ຫຼຽນລາງວັນ, ເນື້ອໃນຄຳຂວັນປະຈຳງານ, ຮອງຮັບກິລາແຂ່ງຂັນ ເບື້ອງຕົ້ນມີ 30 ກວ່າປະເພດກິລາ ລວມທັງສະຖານທີ່ແຂ່ງຂັນ, ທີ່ພັກນັກກິລາ ແລະ ອື່ນໆ.
ກອງປະຊມຄັ້ງນີ້ໄດ້ຈັດຂຶ້ນໃນວັນທີ 13 ພຶດສະພາ ຜ່ານມາ ທີ່ຫ້ອງປະຊຸມທັນສະໄໝຊັ້ນ 1, ສໍານັກງານອົງການປົກຄອງນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ພຸດ ສິມມາລາວົງ ລັດຖະມົນຕີ ກະຊວງ ສສກ ປະທານຄະນະກຳມະການໂອແລັມປິກແຫ່ງຊາດລາວ ແລະ ທ່ານ ອາດສະພັງທອງ ສີພັນດອນ ເຈົ້າຄອງ ນວ ປະທານຈັດງານມະຫະກໍາກິລາແຫ່ງຊາດ ຄັ້ງທີ XII, ມີບັນດາຮອງລັດຖະມົນຕີຈາກກະຊວງຕ່າງໆ, ຫົວໜ້າ-ຮອງຫົວໜ້າກົມ, ພະແນກ ແລະ ບັນດາກຳມະການຝ່າຍຕ່າງໆ ຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ອາດສະພັງທອງ ສີພັນດອນ ໄດ້ສະເໜີໃຫ້ກໍາມະການຝ່າຍຕ່າງໆໄດ້ກະກຽມແຜນດໍາເນີນງານຂອງຕົນ ໂດຍສະເພາະແມ່ນຄະນະຮັບຜິດຊອບປັບປຸງ ແລະ ສ້ອມແປງສະໜາມ, ກໍາມະການເສດຖະ ກິດ ແລະ ລະດົມທຶນ, ກໍາມະການພິທີການເປີດ-ປິດທີ່ຕ້ອງໄດ້ວາງແຜນວຽກຂອງຕົນໃນການຈັດຕັ້ງປະຕິບັດ ແລະ ກໍາມະການກອງເລຂາທີ່ເປັນຜູ້ສັງລວມ ແລະ ຊຸກຍູ້ກໍາມະການຝ່າຍຕ່າງໆ. ຫຼັງຈາກນັ້ນ, ທ່ານເຈົ້າຄອງ ນວ ຍັງຮຽກຮ້ອງມາຍັງບັນດາຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບເຂົ້າໃນການຄົ້ນຄວ້າປຶກສາຫາລືແຕ່ລະບັນຫາໃຫ້ຈະແຈ້ງ ພ້ອມທັງແບ່ງຄວາມຮັບຜິດຊອບໃຫ້ກັນຢ່າງລະອຽດຈະແຈ້ງ ເພື່ອເຮັດໃຫ້ການກະກຽມຈັດງານມະຫະກຳກິລາແຫ່ງຊາດ ຄັ້ງທີ XII ແລະ ງານມະຫະກໍາກິລາຄົນພິການແຫ່ງຊາດ ຄັ້ງທີ IV ດໍາເນີນໄປດ້ວຍດີ ແລະ ບັນລຸໄດ້ຕາມຈຸດປະສົງລະດັບຄາດໝາຍທີ່ວາງໄວ້.
ຂ່າວ-ພາບ: ສົງການ ພັນແພງດີ
ຄໍາເຫັນ