 |
ທ່ານ ພົນເອກ ຈັນສະໝອນ ຈັນຍາລາດ ກ່າວວ່າ: ກອງປະຊຸມຄັ້ງນີ້, ຈັດຂຶ້ນເພື່ອສະຫຼຸບການຈັດຕັ້ງປະຕິບັດວຽກງານຄຸ້ມຄອງໄພພິບັດ 5 ປີ (2021-2025), ວາງທິດທາງແຜນການ 5 ປີ (2026-2030), ສະຫຼຸບ ປີ 2025, ວາງທິດທາງແຜນການປີ 2026 ແລະ ກໍານົດແຜນກຽມພ້ອມຕອບໂຕ້ໄພພິບັດປີ 2026 ຊຶ່ງເປັນກອງປະຊຸມທີ່ມີຄວາມສໍາຄັນທາງຄະນະກຳມະການຄຸ້ມຄອງໄພພິ ບັດທັງຂັ້ນສູນກາງ ແລະ ຂັ້ນແຂວງໄດ້ມາປຶກສາຫາລືແລກປ່ຽນຖອດຖອນບົດຮຽນໃນການຈັດຕັ້ງປະຕິບັດວຽກງານການຄຸ້ມຄອງໄພພິບັດ, ເອກະພາບຕໍ່ທິດທາງແຜນການໃນອີກ 5 ປີຕໍ່ໜ້າ ແລະ ວາງແຜນການກຽມພ້ອມຮັບມືກັບໄພພິບັດ ທີ່ອາດເກີດຂຶ້ນໃນປີ 2026.
 |
ໃນໄລຍະ 5 ປີ ທີ່ຜ່ານມາ, ໄດ້ມີເຫດການໄພພິບັດທີ່ເກີດຂຶ້ນຢູ່ບັນດາແຂວງໃນຂອບເຂດທົ່ວປະເທດ ເຫັນໄດ້ວ່າສະພາບໄພພິບັດທີ່ເກີດຂຶ້ນໃນແຕ່ລະປີແມ່ນຜົນກະທົບຈາກສະພາບລົມພາຍຸ, ນໍ້າຖ້ວມ, ດິນເຈື່ອນ, ນໍ້າຖ້ວມຊຸ ແລະ ນໍ້າຖ້ວມຂັງ ຊຶ່ງໃນ 5 ປີ ຜ່ານມານີ້ ໄດ້ມີເຫດການໄພພິບັດເກີດຂຶ້ນທັງໝົດ 376 ຄັ້ງ, ສົ່ງຜົນກະທົບໂດຍກົງຕໍ່ປະຊາຊົນ 1 ລ້ານກວ່າຄົນ, ເສຍຊີວິດ 111 ຄົນ, ສູນຫາຍ 5 ຄົນ, ສ້າງຄວາມເສຍຫາຍຕໍ່ຂະແໜງການສັງຄົມ, ກະສິກຳ, ໂຄງລ່າງພື້ນຖານ ຄິດເປັນມູນຄ່າເສຍຫາຍຫຼາຍກວ່າ 12,577 ຕື້ກວ່າກີບ ຕາມການເກັບກຳຂໍ້ມູນຂອງກອງເລຂາ ແລະ ລາຍງານຂອງບັນດາແຂວງເຫັນໄດ້ວ່ານັບມື້ສະພາບໄພພິບັດແຫ່ງນັບມີຄວາມຮຸນແຮງແຂວງທາງພາກເໜືອບໍ່ເຄີຍມີນໍ້າຖ້ວມຂັງ ແລະ ຮຸນແຮງກໍມີ ຄືໃນປີ 2024, 2025 ແຂວງຫົວພັນ, ຫຼວງນໍ້າທາ, ໄຊຍະບູລີ, ຫຼວງພະບາງ ແລະ ແຂວງອື່ນໆ ຊຶ່ງສ້າງຄວາມເສຍຫາຍເປັນຈໍານວນຫຼາຍສົມຄວນ. ຕໍ່ກັບສະພາບໄພພິບັດທີ່ເກີດຂຶ້ນຄະນະກຳມະການຄຸ້ມຄອງໄພພິບັດຂັ້ນສູນກາງ ແລະ ທ້ອງຖິ່ນ ໄດ້ເອົາ ໃຈໃສ່ຊີ້ນໍາ-ນໍາພາ, ຕິດຕາມຊຸກຍູ້ການຄວບຄຸມ, ແກ້ໄຂສຸກເສີນ, ຊ່ວຍເຫຼືອປະຊາຊົນທີ່ໄດ້ຮັບຜົນກະທົບຈາກໄພພິບັດຢູ່ບັນດາແຂວງ ໃຫ້ສາມາດກັບສູ່ສະພາບປົກກະຕິໄດ້ຢ່າງວອງໄວ, ໄດ້ຮີບຮ້ອນຟື້ນຟູສຸກເສີນຮີບດ່ວນດ້ານພື້ນຖານໂຄງລ່າງ, ດ້ານການຜະລິດກະສິກຳ ແລະ ສະເໜີລັດຖະບານ ອະນຸມັດແກ້ໄຂໂຄງການຟື້ນຟູສຸກເສີນ ແລະ ຟື້ນຟູໄລຍະຍາວເຂົ້າໃນແຜນຟື້ນຟູປົກກະຕິແຜນລົງ ທຶນຂອງລັດໃນແຕ່ລະປີ. ພ້ອມນີ້, ເພື່ອເປັນການປັບປຸງກົນໄກການປະສານງານຂອງຄະນະກຳມະ ການຄຸ້ມຄອງໄພພິບັດຢູ່ແຕ່ລະຂັ້ນໃຫ້ມີຄວາມເຂັ້ມແຂງແນໃສ່ເຮັດໃຫ້ການຈັດຕັ້ງປະຕິບັດບັນດານິຕິກຳທີ່ວາງອອກ ໂດຍສະເພາະທາງດ້ານວຽກງານປ້ອງກັນ, ຄວບຄຸມ ແລະ ຟື້ນຟູຫຼັງໄພພິບັດ ໃຫ້ໄດ້ຮັບຜົນດີ.
 |
ທ່ານ ວົງຄຳ ພັນທະນຸວົງ ຫົວໜ້າກົມສັງຄົມສົງເຄາະ ຫົວໜ້າກອງເລຂາຄະນະກຳມະການຄຸ້ມຄອງໄພພິບັດ ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານຄຸ້ມຄອງໄພພິບັດ 5 ປີ (2021-2025) ແລະ ທິດທາງແຜນການ 5 ປີ (2026-2030), ສະຫຼຸບປີ 2025, ແຜນປີ 2026 ແລະ ຮ່າງແຜນກຽມພ້ອມຕອບໂຕ້ໄພພິບັດປີ 2026 ໃນໄລຍະ 1 ປີຜ່ານມາ ໄດ້ມີເຫດການໄພພິບັດເກີດຂຶ້ນໃນຂອບເຂດທົ່ວປະເທດ ສໍາລັບປີ 2025 ທັງໝົດ 70 ຄັ້ງ. ໃນນັ້ນ, ນໍ້າຖ້ວມ 38 ຄັ້ງ, ດິນເຈື່ອນ 1 ຄັ້ງ, ລົມພາຍຸພັດ 16 ຄັ້ງ, ໄຟໄໝ້ເຮືອນ 15 ຄັ້ງ, ສົ່ງຜົນກະທົບທຸກແຂວງທົ່ວປະເທດ. ໃນນັ້ນ, ມີຈໍານວນ 141 ເທື່ອເມືອງ, ຈໍານວນ 2,313 ເທື່ອບ້ານ, 83,206 ຄອບຄົວ, ຜູ້ໄດ້ຮັບຜົນກະທົບທັງໝົດ 403,303 ເທື່ອຄົນ, ເສຍຊີວິດ 55 ຄົນ, ສູນຫາຍ 5 ຄົນ ໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ ຢ່າງໜັກໜ່ວງ ຊຶ່ງມີມູນຄ່າຄວາມເສຍຫາຍລວມທັງໝົດປະມານ 2,940 ຕື້ກວ່າ ກີບ. ໃນນີ້, ໄດ້ຮັບຜົນກະທົບໜັກກວ່າໝູ່ແມ່ນເກີດຈາກລົມພາຍຸວູທີບ, ວິພາ ແລະ ພາຍຸບົວລອຍ ຊຶ່ງຄາດຄະເນຜົນກະທົບປະມານ 2,869 ຕື້ກວ່າກີບ, ເມື່ອສົມທຽບໃສ່ຜົນເສຍຫາຍໃນແຕ່ລະປີເຫັນວ່າໄພພິບັດນໍ້າຖ້ວມເລີ່ມນັບມື້ນັບເພີ່ມຄວາມຮຸນແຮງຂຶ້ນ ແລະ ສົ່ງຜົນເສຍຫາຍຫຼາຍຂຶ້ນເລື້ອຍໆ. ສຳລັບແຜນຈັດຕັັ້ງປະຕິບັດວຽກງານການຄຸ້ມຄອງໄພພິບັດ ປະຈໍາປີ 2026 ເພີ່ມທະວີວຽກງານປ້ອງກັນ, ການຄວບຄຸມ ແລະ ການຟື້ນຟູຫຼັງໄພພິບັດຕ່າງໆ ໃຫ້ມີຄວາມເຂັ້ມແຂງ ແລະ ສາມາດປະຕິບັດວຽກງານໄດ້ຢ່າງມີປະສິດທິຜົນ.
ຂ່າວ-ພາບ: ວັນເພັງ
ຄໍາເຫັນ