 |
ສະຫາຍ ນາງ ອາລີ ວົງໜໍ່ບຸນທໍາ ໄດ້ກ່າວວ່າ: ການດໍາເນີນກອງປະຊຸມໃຫຍ່ສະມາຊິກພັກ ຂອງອົງຄະນະພັກ ສູນກາງສະຫະພັນແມ່ຍິງລາວໃນຄັ້ງນີ້, ສະມາຊິກພັກ, ຄະນະພັກໄດ້ສຸ່ມໃສ່ປະຕິບັດຕາມຄໍາສັ່ງ ແລະ ຄໍາແນະນໍາຂອງຂັ້ນເທິງກ່ຽວກັບການດໍາເນີນກອງປະຊຸມໃຫຍ່ 3 ຂັ້ນ; ອັນສໍາຄັນແມ່ນ ໄດ້ສຳເລັດການດຳເນີນກອງປະຊຸມໃຫຍ່ໜ່ວຍພັັກຮາກຖານທັງໝົດ 10 ໜ່ວຍພັກ ແລະ ກອງປະຊຸມໃຫຍ່ ອົງການຈັດຕັ້ງມະຫາຊົນຂອງ ສູນກາງສະຫະພັນແມ່ຍິງລາວ; ໄດ້ສໍາເລັດຮ່າງລາຍງານການເມືອງ, ຮ່າງແຜນພັດທະນາ ຂອງສູນກາງສະຫະພັນແມ່ຍິງລາວໄລຍະ 5 ປີ ແລະ ບົດສໍາຫຼວດການນໍາພາລວມ ໂດຍໄດ້ຈັດຕັ້ງກອງປະຊຸມຄົ້ນຄວ້າ, ປະກອບຄໍາເຫັນຢ່າງກວ້າງຂວາງ, ທາບທາມ ແລະ ປັບປຸງຕາມຄໍາເຫັນຂອງສະມາຊິກພັກ ພາຍໃນອົງຄະນະພັກສູນກາງສະຫະພັນແມ່ຍິງລາວ; ໄດ້ດຳເນີນຊີວິດການເມືອງທ້າຍສະໄໝຂອງຄະນະບໍລິຫານງານພັກສະໄໝທີ IV, ສໍາຫຼວດກວດກາ-ຕີລາຄາການນໍາພາ-ຊີ້ນໍາລວມຂອງອົງຄະນະພັກ ແລະ ຕີລາຄາຄວາມຮັບຜິດຊອບການເມືອງຂອງບຸກຄົນຄະນະບໍລິຫານງານພັກ; ພ້ອມກັນນັ້ນ ຍັງໄດ້ສໍາເລັດການທາບທາມບຸກຄະລາກອນ ເພື່ອເລືອກເຟັ້ນເອົາເປົ້າໝາຍສະໝັກເຂົ້າເປັນຄະນະບໍລິຫານງານພັກຊຸດໃໝ່ຈໍານວນ 2 ຄັ້ງ, ຊຶ່ງໄດ້ດຳເນີນມາໂດຍບັນຍາກາດແຫ່ງຄວາມສາມັກຄີເປັນເອກະພາບ, ມີປະຊາທິປະໄຕ, ມີວິໄນ ແລະ ມີຄວາມຮັບຜິດຊອບສູງ ແລະ ຜ່ານການກະກຽມຢ່າງຕັ້ງໜ້າ, ພາຍໃຕ້ການນໍາພາ-ຊີ້ນໍາຢ່າງໃກ້ຊິດ ຂອງກຳມະການກົມການເມືອງສູນກາງພັກ, ເລຂາທິການສູນກາງພັກ ແລະ ການເຮັດວຽກຮ່ວມກັບຄະນະຊຸກຍູ້ຕິດຕາມການກະກຽມດຳເນີນກອງປະຊຸມໃຫຍ່, ອົງຄະນະພັກສູນກາງສະຫະພັນແມ່ຍິງລາວ ຈຶ່ງມີເງື່ອນໄຂຄວາມພ້ອມທຸກປະການ ແລະ ໄດ້ຮັບອະນຸມັດໃຫ້ດໍາເນີນກອງປະຊຸມໃຫຍ່ ຄັ້ງທີ V ຢ່າງເປັນທາງການ ແລະ ກອງປະຊຸມໃຫຍ່ ອົງຄະນະພັກສູນກາງສະຫະພັນແມ່ຍິງລາວໃນຄັ້ງນີ້ ຈະໄດ້ຄົ້ນຄວ້າ, ປະກອບຄໍາເຫັນ, ຮັບຮອງເອົາລາຍງານການເມືອງ ແລະ ແຜນພັດທະນາຂອງສູນກາງສະຫະພັນແມ່ຍິງລາວໄລຍະ 5 ປີ (2026-2030) ເພື່ອສືບຕໍ່ນຳພາ-ຊີ້ນຳ ຈັດຕັ້ງປະຕິບັດໜ້າທີ່ການເມືອງ, ພາລະບົດບາດໜ້າທີວຽກງານຂອງສູນກາງສະຫະພັນແມ່ຍິງລາວ ໃຫ້ປະສົບຜົນສໍາເລັດໃຫມ່ໃຫຍ່ຫຼວງກວ່າເກົ່າ; ຜູ້ແທນກອງປະຊຸມໃຫຍ່ຈະໄດ້ຄົ້ນຄວ້າ ປະກອບຄໍາເຫັນຕໍ່ ບົດສໍາຫຼວດການນໍາພາລວມ ຂອງຄະນະບໍລິຫານງານພັກສະໄໝທີ IV ເພື່ອເຫັນໄດ້ໝາກຜົນແຫ່ງການນໍາພາ-ຊີ້ນໍາ ທັງດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ຈາກການນໍາພາ-ຊີ້ນໍາ ຕົວຈິງໃນໄລຍະຜ່ານມາ. ພ້ອມກັນນັ້ນ, ຜູ້ແທນສົມບູນຈະໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາ ຄະນະບໍລິຫານງານພັກສູນກາງສະຫະພັນແມ່ຍິງລາວສະໄໝທີ V ເພື່ອສືບຕໍ່ນຳພາ-ຊີ້ນໍາ ເສີມຂະຫຍາຍ ດ້ານດີ, ຜົນສໍາເລັດ ແລະ ສືບຕໍ່ຄົ້ນຄວ້າປັບປຸງ ແບບແຜນການນໍາພາ-ຊີ້ນໍາ ແລະ ວິທີເຮັດວຽກ ຮັບປະກັນໃຫ້ວຽກງານມີປະສິດທິພາບ-ປະສິດທິຜົນກວ່າເກົ່າ.
ສະຫາຍ ນາງ ອາລີ ວົງໜໍ່ບຸນທໍາ ໄດ້ກ່າວຕື່ມວ່າ: ພາຍຫຼັງສໍາເລັດ ກອງປະຊຸມໃຫຍ່ສະມາຊິກພັກ ຂອງອົງຄະນະພັກສູນກາງສະຫະພັນແມ່ຍິງລາວ ຄັ້ງທີ IV ໃນປີ 2022, ຄະນະບໍລິຫານງານພັກ ສູນກາງສະຫະພັນແມ່ຍິງລາວ ໄດ້ນໍາພາ-ຊີ້ນໍາ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ສະມາຊິກພັກຂອງຕົນຕິດພັນກັບການຈັດຕັ້ງປະຕິບັດ ມະຕິກອງປະຊຸມໃຫຍ່ຜູ້ແທນແມ່ຍິງລາວ ທົ່ວປະເທດຄັ້ງທີ VIII ແລະ ການຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ, 2 ວາລະແຫ່ງຊາດ ໂດຍການສຶກສາອົບຮົມ ການເມືອງ-ແນວຄິດ, ເຕົ້າໂຮມຄວາມສາມັກຄີ ແລະ ສ້າງຄວາມເຂັ້ມແຂງໃຫ້ສະມາຊິກພັກ-ພະນັກງານ ສູນກາງສະຫະພັນແມ່ຍິງລາວ ໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮັບຜິດຊອບສູງ ແລະ ເປັນເຈົ້າການ ປະຕິບັດໜ້າທີ່ການເມືອງ ໃນການເປັນຕົວແທນປົກປ້ອງສິດ ຜົນປະໂຫຍດອັນຊອບທໍາຂອງສະມາຊິກແມ່ຍິງ, ແມ່ຍິງລາວບັນດາເຜົ່າ, ນໍາພາຈັດຕັ້ງປະຕິບັດ 10 ແຜນງານ, 65 ໂຄງການ, 3 ແຜນດໍາເນີນແຫ່ງຊາດ ກ່ຽວກັບຄວາມສະເໝີພາບຍິງ-ຊາຍ, ແມ່ ແລະເດັກ ແລະ ການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກ; ປຸກລະດົມແມ່ຍິງໃຫ້ພັດທະນາຕົນເອງ ຕາມຂໍ້ແຂ່ງຂັນ 3 ດີ ແລະ ສ້າງຄວາມເຂັ້ມແຂງໃຫ້ພະນັກງານເພດຍິງ ເພື່ອມີມາດຕະຖານ ເງື່ອນໄຂຄົບຖ້ວນ ເປັນພະນັກງານນໍາພາ-ຄຸ້ມຄອງສືບທອດປ່ຽນແທນ ຕາມນະໂຍບາຍຂອງພັກ ແລະ ຄວາມຮຽກຮ້ອງຕ້ອງການຕົວຈິງຂອງວຽກງານ; ປຸກລະດົມແມ່ຍິງເອົາໃຈໃສ່ ຍົກລະດັບຊີວິດການເປັນຢູ່ຂອງຕົນ, ອະນຸລັກຮັກສາມູນເຊື້ອອັນດີງາມຂອງຊາດ, ຂອງແມ່ຍິງລາວ ແລະຕັ້ງໜ້າເຂົ້າຮ່ວມພາລະກິດປົກປັກຮັກສາ ແລະ ພັດທະນາປະເທດຊາດແລະ ສະມາຊິກພັກ, ຄະນະພັກ ໄດ້ສຸ່ມໃສ່ປະຕິບັດຕາມຄໍາສັ່ງ ແລະ ຄໍາແນະນໍາຂອງຂັ້ນເທິງ ກ່ຽວກັບ ການດໍາເນີນກອງປະຊຸມໃຫຍ່ 3 ຂັ້ນ; ອັນສໍາຄັນແມ່ນ ໄດ້ສຳເລັດການດຳເນີນກອງປະຊຸມໃຫຍ່ໜ່ວຍພັັກຮາກຖານທັງໝົດ 10 ໜ່ວຍພັກ ແລະ ກອງປະຊຸມໃຫຍ່ ອົງການຈັດຕັ້ງມະຫາຊົນຂອງ ສູນກາງສະຫະພັນແມ່ຍິງລາວ; ໄດ້ສໍາເລັດຮ່າງລາຍງານການເມືອງ, ຮ່າງແຜນພັດທະນາ ຂອງສູນກາງສະຫະພັນແມ່ຍິງລາວ ໄລຍະ 5 ປີ ແລະ ບົດສໍາຫຼວດການນໍາພາລວມ ໂດຍໄດ້ຈັດຕັ້ງກອງປະຊຸມຄົ້ນຄວ້າ, ປະກອບຄໍາເຫັນຢ່າງກວ້າງຂວາງ, ທາບທາມ ແລະ ປັບປຸງຕາມຄໍາເຫັນຂອງສະມາຊິກພັກ ພາຍໃນອົງຄະນະພັກສູນກາງສະຫະພັນແມ່ຍິງລາວ; ໄດ້ດຳເນີນຊີວິດການເມືອງທ້າຍສະໄໝ ຂອງຄະນະບໍລິຫານງານພັກສະໄໝທີ IV, ສໍາຫຼວດກວດກາ-ຕີລາຄາການນໍາພາ-ຊີ້ນໍາລວມຂອງອົງຄະນະພັກ ແລະ ຕີລາຄາຄວາມຮັບຜິດຊອບການເມືອງຂອງບຸກຄົນຄະນະບໍລິຫານງານພັກ; ພ້ອມກັນນັ້ນ ຍັງໄດ້ສໍາເລັດ ການທາບທາມບຸກຄະລາກອນ ເພື່ອເລືອກເຟັ້ນເອົາເປົ້າໝາຍສະໝັກເຂົ້າເປັນຄະນະບໍລິຫານງານພັກຊຸດໃໝ່ຈໍານວນ 2 ຄັ້ງ ຊຶ່ງໄດ້ດຳເນີນມາໂດຍບັນຍາກາດແຫ່ງຄວາມສາມັກຄີເປັນເອກະພາບ, ມີປະຊາທິປະໄຕ, ມີວິໄນ ແລະ ມີຄວາມຮັບຜິດຊອບສູງ.
 |
ໃນກອງປະຊຸມ ບັນດາສະຫາຍຜູ້ແທນສົມບູນ ໄດ້ພ້ອມກັນໃຊ້ສິດປະຊາທິປະໄຕຂອງຕົນປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ, ກົດລະບຽບຂອງພັກ, ທັງຖືກຕ້ອງ ສອດຄ່ອງຕາມມາດຖານເງື່ອນໄຂທີ່ກຳນົດໄວ້ ຊຶ່ງມີຜູ້ຮັບສະໜັກເລືອກຕັ້ງ ຈຳນວນ 14 ສະຫາຍ. ໃນນັ້ນ ເລືອກເອົາ 11 ສະຫາຍ.
ກອງປະຊຸມຄັ້ງປະຖົມມະລືກໄດ້ເປັນເອກະສັນເລືອກຕັ້ງເອົາ ຄື: ສະຫາຍ ນາງ ອາລີ ວົງໜໍ່ບຸນທໍາ ເປັນເລຂາຄະນະບໍລິຫານງານພັກ ສູນກາງສະຫະພັນແມ່ຍິງລາວ ສະໄໝທີ V, ສະຫາຍ ນາງ ທຳມາ ເພັດວິໄຊ ເປັນຮອງເລຂາຄະນະບໍລິຫານງານພັກ; ເລືອກເອົາ ປະທານ ແລະ ຮອງປະທານກວດກາພັກ ຄື: ສະຫາຍ ນາງ ຜາສຸກ ວົງວິຈິດ ເປັນປະທານ, ສະຫາຍ ນາງ ພູຄໍາ ຄັດສະຫວ່າງ ແລະ ສະຫາຍ ນາງ ວົງອາກອນ ເພັງດາລິດ ເປັນຮອງປະທານ.
ເພື່ອເປັນເຂັມຊີ້ທິດເຍືອງທາງໃຫ້ຄະນະບໍລິຫານງານພັກກໍຄືສະມາຊິກພັກ ສສຍລ ທຸກສະຫາຍ, ໂອກາດທີ່ມີຄວາມໝາຍາງສໍາຄັນໃນຄັ້ງນີ້, ສະຫາຍ ກິແກ້ວ ໄຂຄຳພິທູນ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ຜົນສໍາເລັດ ທີ່ຍາດມາໄດ້ໃນໄລຍະຜ່ານມາ ແລະ ເນັ້ນຫຼາຍບັນຫາຕໍ່ກອງປະຊຸມໃຫຍ່ ເປັນຕົ້ນ:
ເພີ່ມທະວີວຽກງານສຶກສາອົບຮົມການເມືອງ-ແນວຄິດໃຫ້ສະມາຊິກພັກ-ພະນັກງານ ຕ້ອງເຮັດຢ່າງເປັນລະບົບ, ຕໍ່ເນື່ອງລຽນຕິດ ແລະ ຍາວນານ ດ້ວຍຫຼາຍວິທີຫຼາຍຮູບການທີ່ແຂງແຮງກວ່າເກົ່າ, ສືບຕໍ່ຖືສໍາຄັນເອົາໃຈໃສ່ຕໍ່ການປັບປຸງພາຍໃນຄະນະບໍລິຫານງານພັກ ແລະ ບັນດາໜ່ວຍພັກຮາກຖານຂອງຕົນໃຫ້ ປອດໃສ, ໜັກແໜ້ນ, ເຂັ້ມແຂງ, ເອົາໃຈໃສ່ບໍາລຸງ-ກໍ່ສ້າງພະນັກງານສະມາຊິກແມ່ຍິງ ຊຶ່ງເປັນຂໍກຸນແຈ ແລະ ຕ່ອງໂສ້ສໍາຄັນຢູ່ໃນທຸກໄລຍະຂອງການປະຕິວັດ ກໍຄືພາລະກິດປ່ຽນແປງໃໝ່, ເອົາໃຈໃສ່ນໍາພາຈັດຕັ້ງປະຕິບັດເນື້ອໃນຄໍາຂວັນ ແລະ ຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ ໃຫ້ເຂົ້າສູ່ລວງເລິກ, ມີການບຸກທະລຸ, ມີການປ່ຽນແປງ, ສ້າງວິຖີຊີວິດໃໝ່ ເພື່ອພັດທະນາຕົນເອງໃຫ້ກາຍເປັນ "ແມ່ຍິງລາວຍຸກ ໃໝ່ທີ່ເຂັ້ມແຂງ", ເປັນໃຈກາງໃນການປຸກລະດົມສະມາຊິກແມ່ຍິງ ແລະ ແມ່ຍິງລາວບັນດາເຜົ່າ ໃນການສົ່ງເສີມ, ສ້າງໂອກາດໃຫ້ແມ່ຍິງຢູ່ເຂດຫ່າງໄກໄດ້ມີວິຊາອາຊີບ, ສ້າງລາຍຮັບແກ້ໄຂຄວາມເປັນຢູ່ຂອງຕົນ, ປະສານສົມທົບກັບອົງການພາຄີ ເພື່ອເປັນເຈົ້າການໃນການປັບປຸງການຈັດຕັ້ງຂອງຕົນໃຫ້ມີຄວາມກະທັດຮັດ, ໜັກແໜ້ນ, ປະຕິບັດໜ້າທີ່ການເມືອງໃຫ້ມີປະສິດທິພາບ, ສືບຕໍ່ພົວພັນຮ່ວມມືກັບປະເທດເພື່ອນມິດຍຸດທະສາດ ແລະ ອົງການຈັດຕັ້ງສາກົນຢ່າງເລືອກເຟັ້ນ ຕາມແນວທາງຂອງພັກບົນຫຼັກການພື້ນຖານເຄົາລົບເຊິ່ງກັນ ແລະ ກັນ ຕ່າງຝ່າຍຕ່າງມີຜົນປະໂຫຍດ, ພ້ອມກັນນໍາເອົາມະຕິກອງປະຊຸມໃຫຍ່ໃນຄັ້ງນີ້ ໄປຈັດຕັ້ງຜັນຂະຫຍາຍໃຫ້ມີຜົນສໍາເລັດ.
ຂ່າວ: ບຸນອູ້ມ
ຄໍາເຫັນ