 |
ໃນກອງປະຊຸມດັ່ງກ່າວ, ທ່ານ ສະເຫຼີມໄຊ ກົມມະສິດ ໄດ້ກ່າວເປີດຢ່າງເປັນທາງການ. ຈາກນັ້ນ, ທ່ານ ລິນຄຳ ດວງສະຫວັນ ລັດຖະມົນຕີ ກະຊວງກະສິກຳ ແລະ ສິ່ງແວດລ້ອມ ຮອງປະທານ ຜູ້ປະຈຳການ ຄະນະກຳມະການຄຸ້ມຄອງນ້ຳແຫ່ງຊາດ ໄດ້ຂຶ້ນກ່າວຕໍ່ກອງປະຊຸມວ່າ: ໃນກອງປະຊຸມຄັ້ງນີ້ ພວກເຮົາຈະໄດ້ຮັບຟັງການນຳສະເໜີກ່ຽວກັບບົດບາດໜ້າທີ່ ຂອງພາກສ່ວນທີ່ກ່ຽວຂ້ອງພາຍໃຕ້ ດຳລັດ ວ່າດ້ວຍ ຄະນະກຳມະການຄຸ້ມຄອງນໍ້າແຫ່ງຊາດ, ຜົນການຈັດຕັ້ງປະຕິບັດວຽກງານ ການຄຸ້ມຄອງນໍ້າ ແລະ ຊັບພະຍາກອນນໍ້າ, ລວມທັງການຕ້ານຖ້ວມ-ຕ້ານແລ້ງ ໃນໄລຍະທີ່ຜ່ານມາ ແລະ ພ້ອມກັນປຶກສາຫາລື ກ່ຽວກັບ ແຜນການໃນຕໍ່ໜ້າ, ໂດຍສະເພາະແມ່ນການກະກຽມຮັບມືກັບໄພພິບັດນ້ຳຖ້ວມ ທີ່ອາດຈະເກີດຂຶ້ນໃນລະດູຝົນປີນີ້.
 |
ໂດຍອີງໃສ່ ດຳລັດດັ່ງກ່າວ ກະຊວງກະສິກຳ ແລະ ສິ່ງແວດລ້ອມ ໃນນາມເປັນຮອງປະທານ ທັງເປັນຜູ້ປະຈຳການ ແລະ ກອງເລຂາ ຂອງຄະນະກຳມະການຄຸ້ມຄອງນໍ້າແຫ່ງຊາດ ແມ່ນມີບົດບາດໃນການຄຸ້ມຄອງລວມຊັບພະຍາກອນນໍ້າ. ຂ້າພະເຈົ້າ ຂໍຕາງໜ້າໃຫ້ ກະຊວງກະສິກຳ ແລະ ສິິ່ງແວດລ້ອມ, ກໍຄື ຄະນະຮັບຜິດຊອບກະກຽມ ແລະ ດຳເນີນກອງປະຊຸມຄັ້ງທີ I ຂອງ ຄະນະກຳມະການຄຸ້ມຄອງນໍ້າແຫ່ງຊາດ ຂໍຕີລາຄາສູງຕໍ່ຜົນຂອງການປຶກສາຫາລື ແລະ ການປະກອບຄຳເຫັນຂອງບັນດາທ່ານ ຕໍ່ກອງປະຊຸມໃນມື້ນີ້. ຜ່ານການປະຊຸມປຶກສາຫາລື ປະກອບຄຳເຫັນ ດ້ວຍບັນຍາກາດຟົດຟື້ນ, ສ້າງສັນ, ກົງໄປກົງມາ ແລະ ດ້ວຍຄວາມຮັບຜິດຊອບສູງ ຈາກບັນດາຜູ້ເຂົ້າຮ່ວມກອງປະຊຸມທັງທີ່ຢູ່ໃນຫ້ອງປະຊຸມ ແລະ ຜ່ານລະບົບທາງໄກ, ໂດຍສະເພາະ ການປຶກສາຫາລື ເພືິ່ອແກ້ໄຂບັນຫາຕ່າງໆທີິ່ຍັງເປັນຂໍ້ຄົງຄ້າງ ແລະ ເປັນສິິ່ງອຸດຕັນ ໃນການພັດທະນາວຽກງານຄຸ້ມຄອງ ແລະ ພັດທະນາ ຊັບພະຍາກອນນໍ້າ ຂອງພວກເຮົາ.
ທ່ານ ລິນຄຳ ດວງສະຫວັນ ກ່າວອີກວ່າ: ສຳລັບທິດທາງແຜນການ ທີ່ທາງພາກສ່ວນສູນກາງ ແລະ ທ້ອງຖິ່ນໄດ້ສົ່ງໃຫ້ແລ້ວ, ໃຫ້ກົມຊັບພະຍາກອນນໍ້າ ສົມທົບກັບ ກອງເລຂາຄະນະກຳມະການຄຸ້ມຄອງແມ່ນໍ້າແຫ່ງຊາດ ໃນການສັງລວມບັນດາແຜນການ ແລະ ໃຫ້ ຄຄນຊ ຊີ້ນໍາການຈັດຕັ້ງປະຕິບັດແຜນປະຈໍາປີ 2026 ຊຶ່ງມີໜ້າວຽກສຳຄັນດັ່ງລຸ່ມນີ້:
- ແຜນບໍລິຫານຈັດການນ້ຳ ເປັນຕົ້ນ ແຜນຄວບຄຸມນໍ້າໜ້າເຂື່ອນ, ແຜນການກັກເກັບນໍ້າ ແລະ ແຜນການປ່ອຍນໍ້າ ເພື່ອປ້ອງກັນ ແລະ ຫຼຸດຜ່ອນຜົນກະທົບຈາກໄພນ້ຳຖ້ວມ ແລະ ໄພແຫ້ງແລ້ງ; ລາຍງານການຊຸກຍູ້ບັນດາເຂື່ອນ ໃຫ້ເຮັດປະກັນໄພຂອງເຂື່ອນ;
- ບົດແນະນໍາດ້ານວິຊາການ ກ່ຽວກັບການກັກເກັບ ແລະ ປ່ອຍນໍ້າ ເພື່ອຕ້ານແລ້ງ, ຕ້ານຖ້ວມ ເປັນຕົ້ນການຮັກສາລະດັບນໍ້າໜ້າເຂື່ອນໂດຍປະຕິບັດຕາມແຜນການຄວບຄຸມນໍ້າໜ້າເຂື່ອນ (rule curve/operation rule) ຫຼື ໃຫ້ປ່ອຍນໍ້າກ່ອນຈະມີພາຍຸພັດຜ່ານ ກໍລະນີອ່າງເກັບນໍ້າຂອງເຂື່ອນມີນໍ້າເກີນ ແປດສິບສ່ວນຮ້ອຍ (80%);
- ແຜນໂຄສະນາ, ເຜີຍແຜ່, ສ້າງຈິດສຳນຶກ ແລະ ປະຊາສໍາພັນ ກ່ຽວກັບການຮັບມື ປ້ອງກັນ ແລະ ຫຼຸດຜ່ອນ ຜົນກະທົບ ໄພນໍ້າຖ້ວມ ແລະ ໄພແຫ້ງແລ້ງ;
- ລາຍງານການຄາດຄະເນສະພາບອຸຕຸນິຍົມ ແລະ ອຸທົກກະສາດ, ພະຍາກອນ ໄລຍະສັ້ນ, ໄລຍະກາງ ແລະ ໄລຍະຍາວ ພ້ອມທັງສ້າງແຜນປະຊາສໍາພັນກ່ຽວກັບການຮັບມື ສະພາບໄພນໍ້າຖ້ວມ ແລະ ໄພແຫ້ງແລ້ງປະຈຳປີ; ລາຍງານດ້ານເຕັກນິກກ່ຽວກັບການປະເມີນ ແລະ ກຳນົດລະດັບນໍ້າ ໃນເຂດພື້ນທີ່ມີຄວາມສ່ຽງ ເພື່ອແຈ້ງເຕືອນໄພນໍ້າຖ້ວມ ແລະ ເຕືອນໄພແຫ້ງແລ້ງ; ຜ່ານແຜນການ ແລະ ແຜນງົບປະມານ ດ້ານການບຳລຸງຮັກສາ, ຂະຫຍາຍຕາໜ່າງສະຖານີອຸຕຸນິຍົມ ແລະ ອຸທົກກະສາດ, ພະຍາກອນ ແລະ ລະບົບເຕື່ອນໄພ; ສ້າງ ແລະ ປັບປຸງລະບົບຂໍ້ມູນຂ່າວສານ ລວມທັງການສະໜອງຂໍ້ມູນ ຂ່າວສານ ໃນການແຈ້ງເຕືອນໄພໃຫ້ສັງຄົມ ຮັບຊາບ ແລະ ສາມາດເຂົ້າເຖິງຂໍ້ມູນຂ່າວສານໄດ້;
- ລາຍງານ ສະພາບການຂໍອະນຸຍາດນຳໃຊ້ນ້ຳ ຂອງບັນດາອ່າງເກັບນ້ຳ, ຄວາມສົມດຸນຂອງນ້ຳ, ແຜນວາດການຈໍລະຈອນການໄຫຼຂອງນໍ້າ ແລະ ບົດປະເມີນປະລິມານການໄຫຼຂອງນ້ຳ ໃນອ່າງຮັບນໍ້າ; ປ້ອງກັນ ແລະ ຫຼຸດຜ່ອນຜົນກະທົບຈາກໄພນ້ຳຖ້ວມ ແລະ ໄພແຫ້ງແລ້ງ;
- ລາຍງານການອະນາໄມຄອງນ້ຳ, ຮ່ອງນ້ຳ, ສາຍນໍ້າ ເພື່ອໃຫ້ລະບົບການຈໍລະຈອນຂອງນໍ້າໄຫຼສະດວກ;
- ລາຍງານການສຳຫຼວດ, ອອກແບບ ແລະ ສ້າງລະບົບລະບາຍນໍ້າຖ້ວມຂັງໃນຕົວເມືອງ, ທໍ່ລະບາຍນ້ຳຕາມເສັ້ນທາງ, ຕາຝັ່ງເຈື່ອນ ແລະ ຍົກລະດັບຄູກັນນ້ຳ ເພື່ອປ້ອງກັນ ແລະ ຫຼຸດຜ່ອນຜົນກະທົບຈາກໄພນ້ຳຖ້ວມ ແລະ ໄພແຫ້ງແລ້ງ;
- ລາຍງານການບຳລຸງຮັກສາ ແລະ ຕິດຕາມກວດກາປະຕູລະບາຍນໍ້າສຸກເສີນຂອງເຂື່ອນໄຟຟ້າ ແລະ ຊົນລະປະທານ ໃຫ້ສາມາດໃຊ້ງານໄດ້ເປັນປົກກະຕິ.
ຜົນຂອງກອງປະຊຸມໃນຄັ້ງນີ້ຈະໄດ້ຮັບການຈັດຕັ້ງຜັນຂະຫຍາຍ ເພື່ອເຮັດໃຫ້ວຽກງານການຮັບມືກັບສະພາບນໍ້າຖ້ວມ-ແຫ້ງແລ້ງມີປະສິດທິຜົນຍິ່ງຂຶ້ນ.
ຂ່າວ-ພາບ: ພູວຽງຄຳ
ຄໍາເຫັນ