 |
ພາຍຫຼັງປະທານກອງປະຊຸມມີຄຳເຫັນເຈາະຈີ້ມແລ້ວ, ບັນດາ ຄະນະປະຈຳພັກ ແລະ ກຳມະການຄະນະພັກ ກໍໄດ້ປະກອບຄຳເຫັນຕໍ່ 2 ເອກະສານ ຊຶ່ງກອງປະຊຸມໄດ້ປຶກສາຫາລື ແລະ ຮັບຟັງການຜ່ານມະຕິຂອງຄະນະເລຂາທິການສູນກາງພັກ ແລະ ມະຕິຂອງຄະນະພັກຄະນະໂຄສະນາອົບຮົມສູນກາງພັກ ສະໄໝທີ VI, ບົດສະຫຼຸບຜົນການດໍາເນີນກອງປະຊຸມໃຫຍ່ ຄັ້ງທີ VI ແລະ ແຜນດໍາເນີນງານຂອງຄະນະບໍລິຫານງານພັກ ສະໄໝທີ VI, ຫຼັງຈາກນັ້ນ ບັນດາສະຫາຍໃນຄະນະບໍລິຫານງານພັກ ໄດ້ແລກປ່ຽນປະກອບຄໍາເຫັນຕໍ່ ບົດສະຫຼຸບຫຍໍ້ຜົນການດໍາເນີນກອງປະຊຸມໃຫຍ່ ຄັ້ງທີ VI ແລະ ແຜນດໍາເນີນງານຂອງຄະນະບໍລິຫານງານພັກ ສະໄໝທີ VI ຢ່າງກົງໄປກົງໄປມາ ແລະ ມີຄວາມເປັນເອກະພາບສູງຕໍ່ເອກະສານສອງເອກະສານດັ່ງກ່າວ ຊຶ່ງຈຸດປະສົງແຜນດຳເນີນງານສະໄໝທີ VI ຂອງ ຄອສພ ແມ່ນ ເພື່ອສ້າງຄວາມເປັນເອກະພາບຕໍ່ເນື້ອໃນຕົ້ນຕໍຂອງມະຕິກອງປະຊຸມໃຫຍ່ຄັ້ງທີ VI ອົງຄະນະພັກ ຄອສພ, ໄດ້ກຳນົດວຽກງານຈຸດສຸມທີ່ຄະນະບໍລິຫານງານຕ້ອງເອົາໃຈໃສ່ນຳພາ-ຊີ້ນຳ ແຕ່ນີ້ຫາກອງປະຊຸມໃຫຍ່ຄັ້ງທີ VII ຂອງອົງຄະນະພັກ ຄອສພ; ເພື່ອກຳນົດແຜນການເຄື່ອນໄຫວ ແລະ ວິທີນຳພາຂອງຄະນະບໍລິຫານງານພັກ ໃຫ້ຈະແຈ້ງ ເປັນລະບົບ ແລະ ມີຈຸດສຸມ, ຮັບປະກັນສ້າງການຫັນປ່ຽນຢ່າງແຂງແຮງ ເລິກເຊິ່ງ ແລະ ຮອບດ້ານ, ສ້າງຄວາມເຊື່ອໝັ້ນໃຫ້ພະນັກງານ, ສະມາຊິກພັກຕໍ່ກັບການນຳພາຂອງຄະນະບໍລິຫານງານພັກ ໃຫ້ສູງຂຶ້ນ, ດ້ວຍການສົມທົບກັບການແກ້ໄຂບັນຫາທີ່ເປັນພື້ນຖານທີ່ໄດ້ຮັບຮອງໃນກອງປະຊຸມໃຫຍ່ຄັ້ງທີ VI ອົງຄະນະພັກ ຄອສພ.
ຕອນທ້າຍຂອງກອງປະຊຸມ, ໄດ້ຮັບຟັງການໃຫ້ກຽດໂອ້ລົມຂອງ ສະຫາຍ ຄໍາພັນ ເຜີຍຍະວົງ ປະທານກອງປະຊຸມ ເພິ່ນໄດ້ໃຫ້ທິດຊີ້ນໍາວຽກງານຈຸດສຸມໃນຕໍ່ໜ້າຈຳນວນໜຶ່ງ ໂດຍເນັ້ນໜັກໃຫ້ຄະນະບໍລິຫານງານພັກທຸກສະຫາຍ ຍົກສູງຄວາມຮັບຜິດຊອບຂອງຕົນ ເປັນແບບຢ່າງນຳໜ້າ ໃນໜ້າທີ່ວຽກງານຂອງຕົນຮັບຜິດຊອບ ແລະ ຊີ້ນຳ-ນຳພາ, ເອົາໃຈໃສ່ສຶກສາອົບຮົມ ນຳພາວຽກງານການເມືອງ-ແນວຄິດ ໃຫ້ພະນັກງານສະມາຊິກພັກຢູ່ໃນກົມກອງຂອງຕົນເປັນປົກກະຕິ, ນຳພາຈັດຕັ້ງເຊື່ອມຊຶມບັນດາເອກະສານມະຕິກອງປະຊຸມໃຫຍ່ຄັັ້ງທີ XII ຂອງພັກ, ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກຄະນະໂຄສະນາອົບຮົມສູນກາງພັກ, ພ້ອມທັງຈັດຕັ້ງຜັນຂະຫຍາຍແຜນພັດທະນາວຽກງານໂຄສະນາອົບຮົມ ປີ 2026-2030 ທີ່ນອນໃນ 9 ແຜນງານ 42 ໂຄງການ ຫັນເປັນແຜນລະອຽດເຂົ້າໃນວຽກງານຕົວຈິງຂອງແຕ່ລະໜ່ວຍພັກກໍຄືຂອງແຕ່ລະກົມ.
(ຂ່າວ: ສົມລິດ)
ຄໍາເຫັນ