 |
ສະຫາຍ ພູທະນູເພັດ ໄຊສົມບັດ ກ່າວເປີດກອງປະຊຸມ ບາງຕອນວ່າ: ກອງປະຊຸມຄັ້ງນີ້, ໄດ້ໄຂຂຶ້ນຢ່າງເປັນທາງການ ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ທົ່ວປວງຊົນລາວ ເວົ້າລວມ-ເວົ້າສະເພາະ ແມ່ນຊາວແຂວງວຽງຈັນ ພວມສຸມໃສ່ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ, ຜົນສຳເລັດການເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນຂັ້ນແຂວງ ຊຸດທີ V, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ຂອງແຂວງວຽງຈັນ (2026-2030) ຢ່າງຕັ້ງໜ້າ ແລະ ມີຄວາມເປັນເອກະພາບສູງ, ໄປຄຽງຄູ່ກັບ ການອອກແຮງແຂ່ງຂັນກັນ ສ້າງຜົນງານຂໍ່ານັບຮັບຕ້ອນວັນສຳຄັນຕ່າງໆ ຂອງຊາດ, ຂອງພັກ ເປັນຕົ້ນແມ່ນ: ວັນສ້າງຕັ້ງກອງທັບປະຊາຊົນລາວ ຄົບຮອບ 77 ປີ, ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 71 ປີ ແລະ ການເກັບກູ້ຜົນຜະລິດຂອງປະຊາຊົນ, ການປະກອບສ່ວນຂອງນັກທຸລະກິດ-ຜູ້ປະກອບການ ໃນທົ່ວແຂວງ. ພ້ອມນີ້, ສະຫາຍໄດ້ຮຽກຮ້ອງມາຍັງບັນດາສະຫາຍທີ່ເຂົ້າຮ່ວມກອງປະຊຸມໃນຄັ້ງນີ້ ຈົ່ງເຊີດຊູຄວາມຮັບຜິດຊອບສູງ ໃນການຄົ້ນຄວ້າ ຄິດຫງໍ່າ, ແລກປ່ຽນຄຳຄິດ-ຄຳເຫັນ ຢ່າງເລິກເຊິ່ງ ກົງໄປກົງມາ ເຮັດໃຫ້ກອງປະຊຸມໃນຄັ້ງນີ້ ເຕັມໄປດ້ວຍບັນຍາກາດທີ່ອົບອຸ່ນ ແລະ ມີເນື້ອໃນທີ່ຄົບຖ້ວນສົມບູນ, ສ້າງຄວາມເປັນເອກະພາບ ຮັບຮອງເອົາໄປຈັດຕັ້ງປະຕິບັດ ໃຫ້ເກີດໝາກຜົນຕົວຈິງໃນຕໍ່ໜ້າ.
ກອງປະຊຸມຄັ້ງນີ້, ໄດ້ຜ່ານບົດສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ (2021-2026) ຄັ້ງທີ VI ໂດຍສັງເຂບ ແລະ ທິດທາງແຜນການ 5 ປີ ຄັ້ງທີ VII (2026-2030); ບົດສະຫຼຸບການຈັດຕັ້ງປະຕິບັດວຽກງານກວດກາພັກ-ລັດ ແຂວງ 5 ປີ ຜ່ານມາ (2021-2025) ໂດຍສັງເຂບ ແລະ ທິດທາງແຜນການ 5 ປີຕໍ່ໜ້າ (2026-2030); ບົດສະຫຼຸບການຈັດຕັ້ງປະຕິບັດວຽກງານອົງການໄອຍະການແຂວງ 5 ປີ ຜ່ານມາ (2021-2025) ໂດຍສັງເຂບ ແລະ ທິດທາງແຜນການ 5 ປີຕໍ່ໜ້າ (2026-2030) ແລະ ບົດສະຫຼຸບການຈັດຕັ້ງປະຕິບັດວຽກງານສານປະຊາຊົນ ແຂວງ 5 ປີ ຜ່ານມາ (2021-2025) ໂດຍສັງເຂບ ແລະ ທິດທາງແຜນການ 5 ປີຕໍ່ໜ້າ (2026-2030).
ໂອກາດນີ້, ປະທານກອງປະຊຸມຍັງໄດ້ມີຄຳເຫັນເຈາະຈີ້ມແຕ່ລະວຽກງານບາງບັນຫາທີ່ເຫັນວ່າຈະຕ້ອງໄດ້ສືບຕໍ່ແກ້ໄຂ ແລະ ບັນດາຜູ້ເຂົ້າຮ່ວມຍັງໄດ້ພ້ອມກັນປະກອບຄຳຄິດເຫັນ ໃສ່ເນື້ອເອກະສານກອງປະຊຸມຄັ້ງນີ້ ເພື່ອເຮັດໃຫ້ມີເນື້ອໃນຄົບຖ້ວນສົມບູນ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ