 |
ສະຫາຍ ມອນໄຊ ລາວມົວຊົ່ງ ໄດ້ໃຫ້ກຽດກ່າວເປີດກອງປະຊຸມວ່າ: ກອງປະຊຸມຄັ້ງນີ້ ໄດ້ສຸມໃສ່ປຶກສາຫາລື ແລະ ຮັບຮອງຫຼາຍເນື້ອໃນທີ່ສໍາຄັນເປັນຕົ້ນພ້ອມກັນຕີລາຄາຄືນຢ່າງຮອບດ້ານເລິກເຊິ່ງ ກ່ຽວກັບຜົນສໍາເລັດ ຂອງການຈັດຕັ້ງປະຕິບັດທິດທາງ, ຄາດໝາຍ, ຈຸດສຸມ ທີ່ໄດ້ວາງອອກໃນກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VIII, ຜົນສໍາເລັດສິ່ງທີ່ຄົງຄ້າງ ແລະ ສາເຫດ. ຈາກນັ້ນ, ກໍຖອດຖອນເປັນບົດຮຽນ ເພື່ອກຳນົດທິດທາງ, ຄາດໝາຍສູ້ຊົນ, ຈຸດສຸມໃນຕໍ່ໜ້າ ແນໃສ່ສືບຕໍ່ຜັນຂະຫຍາຍແນວທາງປ່ຽນແປງໃໝ່ຂອງພັກ ເຂົ້າສູ່ວຽກງານຕົວຈິງ ແລະ ເປັນວຽກຈຸດສຸມ ເພື່ອຈັດຕັ້ງປະຕິບັດ ໃຫ້ມີຄວາມເຂັ້ມແຂງຮອບດ້ານໃນໄລຍະໃໝ່ແນໃສ່ສຶກສາອົບຮົມຊາວໜຸ່ມເຍົາວະຊົນລາວ ບັນດາເຜົ່າໃຫ້ກາຍເປັນຜູ້ສືບທອດທີ່ດີຂອງພັກ ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມອຸດົມການຂອງພັກ ເພື່ອເຮັດໃຫ້ປະເທດຊາດມັ່ງຄັ່ງເຂັ້ມແຂງປະຊາຊົນຮັ່ງມີຜາສຸກສັງຄົມສາມັກຄີປອງດອງ ປະຊາທິປະໄຕຍຸຕິທຳ ແລະ ສີວິໄລ.
 |
ໃນພິທີ, ສະຫາຍ ທອງລີ ສີສຸລິດ ຮອງເລຂາຄະນະບໍລິຫານງານພັກ ປະທານກວດກາພັກ ຮອງເລຂາ ຄຊປປລ ໄດ້ຂຶ້ນຜ່ານບົດລາຍງານການເມືອງສະຫາຍໄດ້ຍົກໃຫ້ເຫັນການເຄື່ອນໄຫວວຽກງານໄລຍະ 5 ປີຜ່ານມາພາຍໃຕ້ແນວທາງປ່ຽນແປງໃໝ່ຂອງພັກ, ການນຳພາ-ຊີ້ນຳ ຂອງຄະນະພັກແຕ່ລະຂັ້ນ. ຄຊປປລ ແຕ່ລະຂັ້ນໄດ້ນຳພາ-ຊີ້ນຳການຈັດຕັ້ງຊາວໜຸ່ມ, ສະມາຊິກຊາວໜຸ່ມ, ເຍົາວະຊົນ ແລະ ອະນຸຊົນ ປະຕິບັດໜ້າທີ່ພາລະບົດບາດຂອງຕົນດ້ວຍຄວາມຟົດຟື້ນຫ້າວຫັນ, ໄດ້ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ຄັ້ງທີ VIII ຕະຫຼອດໄລຍະ 5 ປີ ຜ່ານມາ ມີຜົນສໍາເລັດຕາມລະດັບຄາດໝາຍທີ່ໄດ້ກຳນົດໄວ້ເຮັດໃຫ້ຊາວໜຸ່ມລາວບັນດາເຜົ່າຍັງມີນ້ຳໃຈຮັກຊາດອັນດູດດື່ມ, ມີຄວາມຈົງຮັກພັກດີຕໍ່ພັກ, ມີຄວາມກະຕັນຍູກະຕະເວທີຕໍ່ຜູ້ມີຜົນງານຄວາມດີ, ມີຄວາມກະຕືລືລົ້ນໃນການສະແຫວງຫາຄວາມກ້າວໜ້າ ແລະ ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ, ການປັບປຸງການຈັດຕັ້ງກົງຈັກເສນາທິການຂອງ ຄຊປປລ ເປັນໄປຕາມທິດກະທັດຮັດ ແລະ ມີປະສິດທິພາບ, ການສ້າງສະມາຊິກຊາວໜຸ່ມໃຫ້ກາຍເປັນສະມາຊິກພັກໃຫ້ກາຍເປັນກຳລັງແຮງ ແລະ ເປັນພະນັກງານສືບທອດຂັ້ນການນຳຂອງສູນກາງຊາວໜຸ່ມ ປະຊາຊົນປະຕິວັດລາວ ຂັ້ນສູນກາງ, ແຂວງ, ນະຄອນຫຼວງວຽງຈັນ, ກະຊວງ ແລະ ອົງການຢ່າງຫຼວງຫຼາຍ.
 |
ນອກຈາກນີ້, ໄດ້ຍົກໃຫ້ເຫັນຜົນງານພົ້ນເດັ່ນໃນຫຼາຍດ້ານ, ລວມທັງຈຸດອ່ອນ ແລະ ຂໍ້ຄົງຄ້າງ, ສາເຫດຕົ້ນຕໍທີ່ພາໃຫ້ມີຈຸດອ່ອນ ແລະ ຂໍ້ຄົງຄ້າງບາງບົດຮຽນທີ່ຖອດຖອນໄດ້ ທິດທາງ ແລະ ວຽກງານຈຸດສຸມຂອງ ຄຊປປລ ໃນ 5 ປີຕໍ່ໜ້າ ນັບແຕ່ 2026-2030. ກອງປະຊຸມຄັ້ງນີ້ ຍັງໄດ້ຮັບຟັງພິຈາລະນາຮັບຮອງເອົາແຜນພັດທະນາຊາວໜຸ່ມ-ເຍົາວະຊົນ 5 ປີ ຄັ້ງທີ III (2026-2030), ກົດລະບຽບ ຄຊປປລ ແລະ ກົດລະບຽບການຈັດຕັ້ງເຍົາວະຊົນທັນວາ ສະໄໝທີ IX (ສະບັບປັບປຸງ) ເພື່ອໃຫ້ສອດຄ່ອງກັບການຈັດຕັ້ງ ແລະ ການເຄື່ອນໄຫວຕົວຈິງ. ນອກນີ້, ໄດ້ດໍາເນີນການສໍາຫຼວດກວດກາການນໍາພາ-ຊີ້ນໍາ ຂອງ ຄຊປປລ ຊຸດທີ VIII. ໂອກາດນີ້, ຜູ້ແທນກອງປະຊຸມຈະໄດ້ໃຊ້ສິດຂອງຕົນໃນການປ່ອນບັດເລືອກຕັ້ງເອົາ ຄຊປປລ ຊຸດທີ IX. ພ້ອມນັ້ນ, ຍັງຈະໄດ້ຮັບຟັງການໂອ້ລົມໃຫ້ທິດຊີ້ນໍາ ຂອງ ສະຫາຍ ບຸນທອງ ຈິດມະນີ. ກອງປະຊຸມຈະໄດ້ດໍາເນີນໄປເປັນເວລາ 2 ວັນຈຶ່ງສໍາເລັດ.
(ຂ່າວ: ວັນເພັງ, ພາບ: ເກດສະໜາ)
ຄໍາເຫັນ