ກອງປະຊຸມໃຫຍ່ຄັ້ງທີ 10 ຂອງຄະນະຮາກຖານຊາວໜຸ່ມຫ້ອງວ່າການແຂວງຫຼວງນໍ້າທາ.

ເມື່ອບໍ່ດົນມານີ້ ຢູ່ທີ່ສະໂມສອນແຂວງຫຼວງນໍ້າທາ, ຄະນະຮາກຖານຊາວໜຸ່ມຫ້ອງວ່າການແຂວງຫຼວງນໍ້າທາໄດ້ຈັດກອງປະຊຸມໃຫຍ່ຄັ້ງທີ 10 ຂຶ້ນ ໂດຍການເປັນປະທານຂອງສະຫາຍ ນາງ ເມດຕາ ພັນທະວົງ ຄະນະບໍລິຫານງານຊາວໜຸ່ມແຂວງ ເລຂາຄະນະຊາວໜຸ່ມຫ້ອງວ່າການແຂວງ, ມີສະຫາຍ ສອນໄຊ ໄຊຍະຄຳ ຮອງເລຂາຄະນະຊາວໜຸ່ມປະຊາຊົນ ປະຕິວັດລາວ ແຂວງ, ແຂກຖືກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
     ສະຫາຍ ນາງ ເມດຕາ ພັນທະວົງ ໄດ້ຜ່ານບົດສະຫຼູບການຈັດຕັ້ງປະຕິບັດວຽກງານຊາວໜຸ່ມໃນໄລຍະຜ່ານມາຄະນະຊາວໜຸ່ມຮາກຖານຫ້ອງວ່າການແຂວງ ໄດ້ຖືເອົາວຽກງານ ສຶກສາອົບຮົມການເມືອງ-ນຳພາແນວຄິດໃຫ້ແກ່ສະມາຊິກເປັນປົກກະຕິ ໂດຍການນໍາເອົາແນວທາງນະໂຍບາຍຂອງພັກ, ມະຕິຄໍາສັ່ງ, ກົດໝາຍ, ລະບຽບການ, ແຜນພັດທະນາເສດຖະກິດ - ສັງຄົມຂອງແຂວງ ແລະ ຂໍ້ແຂ່ງຂັນ 4 ບຸກ ເພື່ອເຜີຍແຜ່ ແລະ ເຊື່ອມຊຶມໃຫ້ສະມາຊິກໄດ້ຮັບຮູ້ ແລະ ເຂົ້າໃຈ. ໄດ້ຮັບຟັງການເຜີຍແຜ່ ເອກະສານຕ່າງໆ ໄດ້ທັງໝົດ 45 ຄັ້ງ ແລະ ໄດ້ປູກຕົ້ນໄມ້ຮ່ວມກັບການນໍາແຂວງ ໃນໂຄງການຊາວໜຸ່ມປູກປ່າ. ກໍ່ສ້າງ ແລະ ເລືອກໄດ້ສະມາຊິກຊາວໜຸ່ມຜູ້ທີ່ມີຜົນງານດີເດັ່ນໃນຂະບວນການ 4 ບຸກ ມີ 174 ສະຫາຍ ຍິງ 130 ສະຫາຍ, ປະເມີນ ແລະ ຮັບຮອງ ເປັນຄະນະຊາວໜຸ່ມຮາກຖານ ທີ່ມີຜົນງານດີເດັ່ນໃນຂະບວນການ 4 ບຸກຢ່າງຕໍ່ເນື່ອງໃນແຕ່ລະປີ ສາມາດຍາດໄດ້ທຸງໄຊນໍາໜ້າໃນການຈັດຕັ້ງປະຕິບັດຂໍ້ແຂ່ງຂັນ 4 ບຸກ, ໄດ້ຮັບໃບຍ້ອງຍໍຈາກທ່ານເຈົ້າແຂວງ, ສູນກາງຊາວໜຸ່ມ ແລະ ອື່ນໆ.
ໂອກາດນີ້, ໄດ້ປ່ອນບັດເອົາຄະນະໜ່ວຍຊຸດໃໝ່ມີຜູ້ສະໝັກ 5 ສະຫາຍ, ປ່ອນເອົາ 3 ສະຫາຍ. ໃນນັ້ນ ໄດ້ເປັນເອກະສັນກັນເລືອກເອົາ ສະຫາຍ ນາງ ອໍາໄພວັນ ດານຄໍາລອຍ ເປັນເລຂາ, ສະຫາຍ ສອນແກ້ວ ໄຂສະຫວ່າງ ເປັນຮອງເລຂາ ທັງເປັນປະທານກວດກາ ແລະ ສະຫາຍ ນາງ ແສງຕານ ຈັນຕະວິໄລ ເປັນຮອງເລຂາ.
(ຂ່າວ, ພາບ: ມຸນຕີ)