 |
ພະອາຈານໃຫຍ່ ອ່ອນແກ້ວ ກິຕຕິພັທໂທ ກຳມະການສູນກາງແນວລາວສ້າງຊາດ ຄະນະບໍລິຫານງານປະຈໍາການ ສູນກາງອົງການພຸດທະສາສະໜາສັມພັນລາວ ປະທານອົງການພຸດທະສາສະໜາສັມພັນລາວ ແຂວງຫຼວງພະບາງ ໄດ້ກ່າວໄຂກອງປະຊຸມວ່າ: ກອງປະຊຸມໃຫຍ່ຄັ້ງນີ້, ຈະດຳເນີນເປັນເວລາ 1 ວັນ. ໃນນັ້ນ, ຈະມີການສະຫຼຸບຕີລາຄາການເຄື່ອນໄຫວຈັດຕັ້ງປະຕິບັດວຽກງານ ໃນ 5 ປີ ທີ່ຜ່ານມາ ຍົກໃຫ້ເຫັນ ດ້ານດີ-ດ້ານອ່ອນ ແລະ ຂໍ້ຄົງຄ້າງ ເພື່ອນຳມາປັບປຸງແກ້ໄຂ ໃຫ້ເປັນແຜນວຽກດຳເນີນງານໃນ 5 ປີຕໍ່ໜ້າ ໃຫ້ດີຂຶ້ນກວ່າເກົ່າ, ພ້ອມດຽວກັນນີ້ ຈະໄດ້ຮັບຮອງເອົາການຄັດເລືອກເອົາບຸກຄະລາກອນພະສົງ ອົງທີ່ມີຄວາມຮູ້ ຄວາມສາມາດ ແລະ ມີມາດຕະຖານ-ເງື່ອນໄຂຄົບຖ້ວນ ທີ່ກໍານົດໄວ້ໃນທັມມະນູນສົງລາວ ເຂົ້າເປັນຄະນະບໍລິຫານງານ ອົງການພຸດທະສາສະໜາສັມພັນລາວ ແຂວງຫຼວງພະບາງ ຊຸດໃໝ່ ຕາມຄວາມເໝາະສົມ ແລະ ຈະໄດ້ຮັບຟັງການປະກອບຄຳເຫັນ ອັນເປັນທິດຊີ້ນຳໂອ້ລົມຂອງ ການນຳພັກ-ລັດ ແຂວງຫຼວງພະບາງ ແລະ ການໃຫ້ໂອ້ວາດຂອງ ພະອາຈານໃຫຍ່ ອົງຮັກສາການປະທານ ສູນກາງອົງການພຸດທະສາສະໜາສັມພັນ ແຫ່ງ ສປປ ລາວ ຕື່ມອີກ.
 |
ພາຍຫຼັງກ່າວໄຂກອງປະຊຸມ, ພະອາຈານ ຈັນທະລິນ ຈິນນະທັມໂມ ຮອງປະທານ ອົງການພຸດທະສາສະໜາສັມພັນລາວແຂວງ ໄດ້ຜ່ານບົດລາຍງານ ການເຄື່ອນໄຫວວຽກງານ ຂອງຄະນະບໍລິຫານງານ ອົງການພຸດທະສາສະໜາສັມພັນລາວແຂວງ ແຕ່ປີ 2020-2025 ແລະ ທິດທາງແຜນການດໍາເນີນງານ 2026-2030, ທັງຮັບຟັງການປະກອບຄໍາເຫັນ ຈາກພາກສ່ວນກ່ຽວຂ້ອງ ຂອງແຂວງຈຳນວນໜຶ່ງ.
(ຂ່າວ: ອາພຸດເດດ ບຸບຜາ, ພາບ: ທະນູສີນ ແລະເພັດສາຄອນ)
ຄໍາເຫັນ