ກອງປະຊຸມໄດ້ຮັບຟັງການລາຍງານຜົນສໍາເລັດການຈັດຕັ້ງຜັນຂະຫຍາຍມະຕິ VII ຂອງຄະນະບໍລິຫານງານຊາວໜຸ່ມໃນໄລຍະ 5 ປີຜ່ານມາ ສະເໜີໂດຍ ສະຫາຍ ສຸວຽງທອງ ສຸຂະວົງ ຮອງເລຂາຄະນະບໍລິຫານງານຊາວໜຸ່ມແຂວງ ຊຶ່ງໄດ້ຍົກໃຫ້ເຫັນຂະບວນການທີ່ພົ້ນເດັ່ນແມ່ນການສຶກສາອົບຮົມການເມືອງແນວຄິດ, ການປັບປຸງການຈັດຕັ້ງ ພ້ອມທັງສ້າງເສດຖະກິດ ປັບປຸງແບບແຜນວິຖີຊີວິດຂອງຊາວໜຸ່ມ ພ້ອມທັງໄດ້ສຸມໃສ່ການສ້າງວຽກເຮັດງານທໍາ. ກອງປະຊຸມໄດ້ຮັບຟັງການຕີລາຄາການຈັດຕັ້ງຜັນຂະຫຍາຍແຜນພັດທະນາວຽກງານຊາວໜຸ່ມ ສະເໜີໂດຍ ສະຫາຍ ສຸລິສັກ ໄຊປະເສີດ ຮອງເລຂາຄະນະບໍລິຫານງານຊາວໜຸ່ມແຂວງ ຊຶ່ງໄດ້ຕີລາຄາການປະຕິບັດແຜນພັດທະນາເຫັນວ່າທຸກວຽກງານຂອງຄະນະຊາວໜຸ່ມແຂວງ ໄດ້ຖືກປະຕິບັດ ຄຽງຄູ່ກັບແຜນພັດທະນາຂອງຄະນະພັກແຂວງວາງອອກ. ໃນນັ້ນ, ສິ່ງສໍາຄັນແມ່ນເຮັດໃຫ້ຊາວໜຸ່ມໄດ້ມີການພັດທະນາຕົນເອງ, ໃຫ້ມີແບບແຜນວິທີເຮັດວຽກ, ການແກ້ໄຂສິ່ງຫຍໍ້ທໍ້ໃນຂົງເຂດຊາວໜຸ່ມ ສາມາດເຮັດໃຫ້ຊາວໜຸ່ມເຂົ້າເຖິງວຽກເຮັດງານທໍາ ເພື່ອພັດທະນາເສດຖະກິດຄອບຄົວໃຫ້ມີຢູ່ມີກິນ ພ້ອມທັງເຂົ້າຮ່ວມທຸກຂະບວນການຂອງພັກ-ລັດຕາມການມອບໝາຍ. ກອງປະຊຸມໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະບໍລິຫານງານຊາວໜຸ່ມຈໍານວນ 31 ສະຫາຍ. ກອງປະຊຸມຄັ້ງປະຖົມມະລຶກ ເລືອກເອົາ ສະຫາຍ ຈັນທະວອນ ດ້ວງປັນຍາ ເປັນເລຂາຄະນະບໍລິຫານງານຊາວໜຸ່ມແຂວງ, ສະຫາຍ ສຸລິສັກ ໄຊຍະເສີດ, ສະຫາຍ ນາງ ນິ້ງ ທໍາມະວົງສາ ແລະ ສະຫາຍ ໂສພາ ຈັນທະວົງ ເປັນຮອງຄະນະບໍລິຫານງານຊາວໜຸ່ມແຂວງ ສະໄໝທີ VIII.
(ຂ່າວ: ສ. ຜາຊ້າງ)
ຄໍາເຫັນ