 |
ທ່ານ ພາສິດ ຫຼ້າສິດທິພອນ ປະທານສະມາຄົມນັກທຸລະກິດໜຸ່ມແຂວງ ກ່າວວ່າ: ໃນໄລຍະຜ່ານມາ, ຄະນະບໍລິຫານງານສະມາຄົມນັກທຸລະກິດໜຸ່ມແຂວງ ໄດ້ເອົາໃຈໃສ່ປະຕິບັດຕາມພາລະບົດບາດ, ສິດໜ້າທີ່ຂອງຕົນ ຕິດພັນກັບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນຊາວໜຸ່ມແຂວງ ແລະ ແຜນພັດທະນາເສດຖະກິດ-ສັງຄົມຂອງແຂວງ, ພາຍໃຕ້ການນໍາພາ-ຊີ້ນໍາຢ່າງໃກ້ຊິດຕິດແທດ ແລະ ການອຳນວຍຄວາມສະດວກ ຈາກຄະນະນໍາແຂວງ ຄະນະບໍລິຫານງານຊາວໜຸ່ມແຂວງ ກໍຄືການຈັດຕັ້ງທີ່ກ່ຽວຂ້ອງ ເຮັດໃຫ້ສະມາຄົມນັກທຸລະກິດໜຸ່ມແຂວງ ສາມາດເຄື່ອນໄຫວໄດ້ຢ່າງແຂງແຮງ, ມີການລົງທຶນຮ່ວມກັນ 14 ໂຄງການ, ມີມູນຄ່າຫຼາຍຕື້ກີບ. ນອກນີ້, ຍັງໄດ້ສົ່ງເສີມທຸລະກິດໃນຫຼາຍຂະແໜງການ ໂດຍສະເພາະ ຂະແໜງກະສິກຳ, ອຸດສະຫະກຳ, ການສຶກສາ ແລະ ໄອທີ, ໄດ້ຮ່ວມກັບອົງການຈັດຕັ້ງພັກ-ລັດ ດຳເນີນກິດຈະກຳທີ່ເປັນການສົ່ງເສີມຜູ້ປະກອບການຂະໜາດນ້ອຍ ແລະ ຂະໜາດກາງ ແລະ ມີການຮ່ວມມືກັບບັນດານັກທຸລະກິດໜຸ່ມທັງພາຍໃນ ແລະ ຕ່າງປະເທດ. ຈາກນັ້ນ, ໄດ້ຜ່ານຂໍ້ຕົກລົງຂອງຄະ ນະປະທານສະມາຄົມນັກທຸລະກິດໜຸ່ມສູນກາງ ວ່າດ້ວຍການຮັບຮອງເອົາຄະນະບໍລິຫານງານສະມາຄົມທຸລະກິດໜຸ່ມແຂວງຈຳນວນ 11 ທ່ານ, ໃນນີ້ໄດ້ຮັບຮອງເອົາທ່ານ ພາສິດ ຫຼ້າສິດທິພອນ ເປັນປະທານສະມາຄົມນັກທຸລະກິດໜຸ່ມແຂວງ, ທ່ານ ຖາວອນ ໜຸ່ມປະດິດ ແລະ ທ່ານ ຄຳຫຼ້າ ວົງພະຈັນ ເປັນຮອງປະທານ ແລະ ຮັບຮອງເອົາຄະນະກວດກາ 3 ທ່ານ.
 |
ໂອກາດນີ້, ທ່ານ ສາກົນ ພອນປະເສີດ ກ່າວວ່າ: ສະມາຄົມນັກທຸລະກິດໜຸ່ມແຂວງ ໄດ້ປະກອບສ່ວນຢ່າງແຂງແຮງ ໃນການພັດທະນາເສດຖະກິດ-ສັງຄົມຂອງແຂວງ, ຍູ້ແຮງການຈັດຕັ້ງປະຕິບັດການສ້າງເສດຖະກິດເອກະ ລາດເປັນເຈົ້າຕົນເອງ ຕາມທິດຂອງລັດຖະບານວາງອອກ. ທັງນີ້, ຂໍໃຫ້ຄະນະສະມາຄົມແບ່ງງານ ແບ່ງຄວາມຮັບ ຜິດຊອບຢ່າງຈະແຈ້ງ ເພື່ອຂັບເຄື່ອນວຽກງານໃຫ້ມີຄວາມຖືກຕ້ອງ ແລະ ວ່ອງໄວ, ຮີບຮ້ອນຜັນຂະຫຍາຍແຜນງານຕ່າງໆ ເພື່ອເປັນຈຸດສຸມໃນການພັດທະນາ ຕາມແຜນຍຸດທະສາດການພັດທະເສດຖະກິດ-ສັງຄົມແຫ່ງຊາດ, ຊຸກຍູ້ການປະກອບສ່ວນຢ່າງແຂງແຮງໃນການລົງທຶນໃຫ້ໄປສູ່ຄຸນນະພາບ ແລະ ຖືກຕ້ອງຕາມລະບຽບກົດໝາຍ ຕິດພັນກັບການສ້າງໜໍ່ແໜງໃໝ່ຂອງຊາວໜຸ່ມໄວໜຸ່ມ ໃຫ້ມີທ່າແຮງຂະຫຍາຍຕົວດີຂຶ້ນກວ່າເກົ່າ; ພ້ອມນີ້, ຄະນະສະມາຄົມ 4 ແຂວງພາກໃຕ້, ນະຄອນຫຼວງວຽງຈັນ ຍັງໄດ້ຮ່ວມລົງນາມເຊັນບົດບັນທຶກ ສືບຕໍ່ເພື່ອພົວພັນຮ່ວມມືຮອບດ້ານນຳກັນຕື່ມອີກ.
 |
ຂ່າວ: ອັດສະວິນ
ຄໍາເຫັນ