ບັນດາຄະນະປະຈໍາ, ຄະນະພັກ-ຄະນະນໍາ ບັນດາກົມ, ຄະນະບໍລິຫານງານກໍາມະບານ, ສະຫະພັນແມ່ຍິງ ແລະ ສະມາຊິກຊາວໜຸ່ມປະຊາຊົນປະຕິວັດລາວທີ່ຢູ່ພາຍໃນ ອກສລ ເຂົ້າຮ່ວມຢ່າງພ້ອມພຽງ.
ພາຍຫຼັງທີ່ ສະຫາຍ ແສງເພັດ ສີຫາວົງ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ ທັງເປັນເລຂາຄະນະບໍລິຫານງານຊາວໜຸ່ມ ອກສລ ຂຶ້ນກ່າວເປີດກອງປະຊຸມ; ສະຫາຍ ເຮັ່ງ ຂັນທະວີໄຊ ຮອງເລຂາຄະນະບໍລິຫານງານຊາວໜຸ່ມ ອກສລ ກໍໄດ້ຂຶ້ນຜ່ານຮ່າງບົດລາຍງານການເມືອງ ຊຶ່ງໃຫ້ຮູ້ວ່າ: ຕະຫຼອດໄລຍະ 5 ປີ ທີ່ຜ່ານມາ, ຄະນະບໍລິຫານງານຊາວໜຸ່ມ ອກສລ ໄດ້ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ II ຂອງຕົນ ຕິດພັນກັບການຜັນຂະຫຍາຍ ມະຕິກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VIII ພາຍໃຕ້ສະພາບແວດລ້ອມ ສາກົນແລະ ພາກພື້ນ ມີການຜັນແປຢ່າງໄວວາ ແລະ ສະຫຼັບສັບຊ້ອນ ຊຶ່ງສົ່ງຜົນກະທົບຕໍ່ປະເທດເຮົາ; ເຖິງຢ່າງໃດກໍຕາມ, ການນຳພາຈັດຕັ້ງປະຕິບັດຕາມພາລະບົດບາດ, ຂອບເຂດສິດ ແລະ ໜ້າທີ່ ຕາມກົດໝາຍ ແລະ ກົດລະບຽບຂອງຄະນະຊາວໜຸ່ມປະຊາຊົນ ປະຕິວັດລາວ ໃນເງື່ອນໄຂສະພາບແວດລ້ອມ ທີ່ເປັນທັງກາລະໂອກາດ ແລະ ສິ່ງທ້າທາຍທີ່ກ່າວມານັ້ນ ກໍມີຜົນສຳເລັດຫຼາຍດ້ານທີ່ພົ້ນເດັ່ນ ຊຶ່ງນອກຈາກຂະບວນການ 4 ບຸກ ກໍມີການເຂົ້າຮ່ວມຂະບວນການສຶກສາອົບຮົມທີ່ການຈັດຕັ້ງພາຍໃນ ແລະ ພາຍນອກຈັດຂຶ້ນໃນແຕ່ລະໄລຍະ ເມື່ອທຽບໃສ່ຄາດໝາຍສູ້ຊົນທີ່ກຳນົດໄວ້ໃນມະຕິກອງປະຊຸມໃຫຍ່ ຄັ້ງທີ II ແມ່ນລື່ນຄາດໝາຍ 12%; ກໍ່ສ້າງສະມາຊິກຊາວໜຸ່ມ ໃຫ້ກາຍເປັນສະມາຊິກພັກ ທຽບໃສ່ຄາດ ໝາຍ ທີ່ໄດ້ກໍານົດໄວ້ໃນມະຕິກອງປະຊຸມໃຫຍ່ ຄັ້ງທີ II ແມ່ນປະຕິບັດໄດ້ 86.25% ຊຶ່ງບັນດາສະຫາຍດັ່ງກ່າວ ໄດ້ກາຍເປັນກໍາລັງແຮງ ແລະ ເປັນພະນັກງານສືບທອດການນໍາຂັ້ນຕ່າງໆ ພາຍໃນ ອກສລ ຖືກຕາມທິດຊີ້ນໍາຂອງຂັ້ນເທິງໃນການຫັນເປັນໜຸ່ມ, ສະແດງອອກຄື: ຄະນະບໍລິຫານງານຊາວໜຸ່ມ ເປັນກຳມະການຄະນະພັກ 1 ສະຫາຍ, ເປັນເລຂາໜ່ວຍພັກ 3 ສະຫາຍ, ເປັນຄະນະໜ່ວຍພັກ 22 ສະຫາຍ ທຽບໃສ່ເມື່ອກ່ອນເຫັນວ່າ ເພີ່ມຂຶ້ນ 40%.
ກອງປະຊຸມຄັ້ງນີ້, ຍັງໄດ້ຮັບຮອງເອົາບົດລາຍງານການເມືອງຂອງຄະນະບໍລິຫານງານຊາວໜຸ່ມ ອກສລ ໃນໄລຍະ 5 ປີຜ່ານມາ ແລະ ກໍານົດທິດທາງ, ແຜນການໃນການດຳເນີນວຽກງານໃນ 5 ປີ ຕໍ່ໜ້າ (2025-2030); ພ້ອມນີ້, ກໍໄດ້ເປັນເອກະພາບຕໍ່ບົດສຳຫຼວດການນໍາພາຂອງຄະນະບໍລິຫານງານຊາວໜຸ່ມ ອກສລ ໃນໄລຍະ 5 ປີຜ່ານມາ. ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະບໍລິຫານງານຊາວໜຸ່ມ ອກສລ ຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕທັງຖືກຕ້ອງ ແລະ ສອດຄ່ອງກັບມາດຖານເງື່ອນໄຂທີ່ກຳນົດໄວ້ ຊຶ່ງມີຜູ້ສະໝັດຮັບເລືອກຕັ້ງ 13 ສະຫາຍ ຍິງ 3 ສະຫາຍ ຊຶ່ງໃຫ້ເລືອກເອົາ 9 ສະຫາຍ; ຜ່ານປ່ອນບັດຄັດເລືອກ, ສາມາດເລືອກໄດ້ ຄະນະທີ່ເປັນເພດຊາຍ 6 ສະຫາຍ ແລະ ຍິງ 3 ສະຫາຍ; ກອງປະຊຸມຄັ້ງປະຖົມມະລືກຂອງ ຄະນະບໍລິຫານງານຊ່າວໜຸ່ມ ຊຸດທີ III ໄດ້ເປັນເອກະສັນເລືອກເອົາ ສະຫາຍ ວິໄລວັນ ແກ້ວແກ່ນຈັນ ເປັນເລຂາ, ສະຫາຍ ທອງຈັນ ຊະນະໄຊ ເປັນຮອງເລຂາ ທັງເປັນປະທານກວດກາ, ສະຫາຍ ຄໍາໝັ້ນ ໄຊສັນຍາ ເປັນຮອງເລຂາ.
ກອງປະຊຸມຍັງໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຈາກ ສະຫາຍ ວຽງທະວີສອນ ເທບພະຈັນ ແລະ ສະຫາຍ ທອງລີ ສີສຸລິດ ເພື່ອໃຫ້ນໍາໄປຄົ້ນຄວ້າເຊື່ອມຊຶມ ຈັດຕັ້ງປະຕິບັດໃຫ້ເກີດໝາກເກີດຜົນຕົວຈິງ ແລະ ນໍາເອົາຜົນປະໂຫຍດສູງສຸດມາໃຫ້ຄະນະບໍລິຫານງານຊາວໜຸ່ມ ອກສ. ພ້ອມນີ້, ກອງປະຊຸມກໍຍັງໄດ້ຮຽກຮ້ອງໃຫ້ຄະນະບໍລິຫານງານ, ຄະນະໜ່ວຍ, ສະມາຊິກຊາວໜຸ່ມທົ່ວ ອກສລ ຈົ່ງເພີ່ມທະວີຄວາມສາມັກຄີ, ເຊື່ອໝັ້ນຕໍ່ການນໍາພາຂອງພັກ, ສ້າງຄວາມເປັນເອກະພາບສູງພາຍໃຕ້ການນໍາພາຂອງພັກ, ພ້ອມກັນບຸກບືນກ້າວໜ້າຂຶ້ນຢ່າງໜັກແໜ້ນ, ສຸມສະຕິປັນຍາທຸກກຳລັງແຮງຂອງຕົນ ເຂົ້າໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງພັກ, ມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວປະເທດ ແລະ ມະຕິກອງປະຊຸມໃຫຍ່ ຄັ້ງທີ IIIຂອງຕົນ ໃຫ້ປະກົດຜົນເປັນຈິງ.
(ຂ່າວ-ພາບ: ສຸກສະຫວັນ)
ຄໍາເຫັນ