ພາຍໃຕ້ການເປັນປະທານຂອງສະຫາຍ ວົງຄຳ ແສນສະທິດ ຮັກສາການເລຂາຄະນະບໍລິຫານງານຊາວໜຸ່ມ ຄຕພ ແລະ ໃຫ້ກຽດເຂົ້າຮ່ວມມີສະຫາຍ ບຸນເຫຼືອ ພັນດານຸວົງ ຮັກສາການເລຂາຄະນະບໍລິຫານງານພັກ ຮັກສາການຫົວໜ້າ ຄຕພ; ສະຫາຍ ທອງລີ ສີສຸລິດ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ. ພ້ອມນັ້ນ, ຍັງມີບັນດາສະຫາຍເລຂາໜ່ວຍພັກ, ບັນດາສະຫາຍຕາງໜ້າອົງການຈັດຕັ້ງມະຫາຊົນ, ຄະນະບໍລິຫານງານຊາວໜຸ່ມ, ສະມາຊິກຊາວໜຸ່ມ ຄຕພແລະແຂກຖືກເຊີນຈາກອົງການຈັດຕັ້ງຊາວໜຸ່ມອ້ອມຂ້າງສູນກາງ ແລະ ກະຊວງການຕ່າງປະເທດເຂົ້າຮ່ວມ.
ສະຫາຍວົງຄຳ ແສນສະທິດ ໄດ້ຂຶ້ນຜ່ານບົດລາຍງານການເມືອງ ໂດຍໄດ້ຕີລາຄາຮອບດ້ານຕໍ່ຜົນສໍາເລັດໃນການຊີ້ນໍາ-ນໍາພາ ຂອງຄະນະບໍລິຫານງານຊາວໜຸ່ມ ຄຕພ ຕະຫຼອດໄລຍະ 4 ປີກວ່າຜ່ານມາ (2020-2024) ຊຶ່ງຜົນສໍາເລັດອັນພົ້ນເດັ່ນແມ່ນຄະນະຊາວໜຸ່ມ ຄຕພ ສາມາດຮັກສານາມມະຍົດຊາວໜຸ່ມ 4 ບຸກ ແລະ ໄດ້ຮັບທຸງໄຊນໍາໜ້າຂະບວນການແຂ່ງຂັນ 4 ບຸກ ຈາກສູນກາງຊາວໜຸ່ມປະຊາຊົນປະຕິວັດລາວ. ພ້ອມນັ້ນ, ຍັງໄດ້ຕີລາຄາຈຸດດີ, ຈຸດອ່ອນແລະຂໍ້ຄົງຄ້າງ, ບົດຮຽນທີ່ຖອດຖອນໄດ້ເພື່ອປັບປຸງແກ້ໄຂໃນຕໍ່ໜ້າ ເພື່ອເຮັດໃຫ້ການຊີ້ນໍາ-ນໍາພາ ການເຄື່ອນໄຫວ ໃນຕໍ່ໜ້າໃຫ້ມີທ່ວງທ່າທີ່ຕັ້ງໜ້າ ແລະ ມີຜົນສໍາເລັດຫຼາຍກວ່າເກົ່າ.
ກອງປະຊຸມຍັງໄດ້ເປັນເອກະພາບໃນການວາງທິດທາງ, ຄາດໝາຍສູ້ຊົນ ໃນຊຸມປີຕໍ່ໜ້າ (2025-2029); ພ້ອມດຽວກັນ, ຜູ້ແທນກອງປະຊຸມ ກໍໄດ້ພ້ອມກັນໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມຄະນະພົວພັນຕ່າງປະເທດສູນກາງພັກຊຸດໃໝ່ຈໍານວນ 9ສະຫາຍຍິງ 2 ສະຫາຍ. ຈາກນັ້ນ, ກອງປະຊຸມຄັ້ງປະຖົມມະລືກ ຂອງຄະນະບໍລິຫານງານຊາວໜຸ່ມ ຄຕພ ໄດ້ເຫັນດີເປັນເອກະສັນເລືອກເອົາສະຫາຍວົງຄຳ ແສນສະທິດເປັນເລຂາຄະນະບໍລິຫານງານຊາວໜຸ່ມ ຄຕພ; ສະຫາຍ ອາເລັກວິໄລ ສຸກຈະເລີນ ເປັນຮອງເລຂາ (ຜູ້ທີ 1)ທັງເປັນປະທານກວດກາ, ສະຫາຍ ນາງ ອ້ອຍ ໄຊຍະສິດ ເປັນຮອງເລຂາ (ຜູ້ທີ2) ແລະ ສະຫາຍ ອິດສິລິຍະພອນ ໄຊຍະວົງ ເປັນຮອງປະທານກວດກາ.
ກອງປະຊຸມໃຫຍ່ໄດ້ຮັບຟັງການໂອ້ລົມຂອງ ສະຫາຍ ບຸນເຫຼືອ ພັນດານຸວົງ ແລະ ສະຫາຍ ທອງລີ ສີສຸລິດ ຊຶ່ງໂດຍລວມແມ່ນໄດ້ຕີລາຄາສູງ ແລະ ຊົມເຊີຍບັນດາຜົນສຳເລັດ, ຜົນງານຂອງຄະນະບໍລິຫານງານຊາວໜຸ່ມ ຄຕພ ທີ່ຍາດມາໄດ້ ໃນໄລຍະຜ່ານມາ ແລະ ໃຫ້ທິດຊີ້ນຳໃນການເຄື່ອນໄຫວວຽກງານໃນຊຸມປີຕໍ່ໜ້າ ເພື່ອເປັນເຂັມຊີ້ທິດເຍືອງທາງ ແລະ ເປັນບ່ອນອີງສຳຄັນໃຫ້ແກ່ຄະນະບໍລິຫານງານຊາວໜຸ່ມ ຄຕພ ຊຸດໃໝ່ນຳໄປຄົ້ນຄວ້າ ແລະ ຜັນຂະຫຍາຍ ເຂົ້າໃນການນຳພາ-ຊີ້ນຳວຽກງານຊາວໜຸ່ມຂອງ ຄຕພ ໃນຕໍ່ໜ້າໃຫ້ມີຜົນສຳເລັດຫຼາຍກວ່າເກົ່າ.
(ຂ່າວ: ຄຕພ, ພາບ: ສຸກສະຫວັນ)
ຄໍາເຫັນ