 |
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອເຜີຍແຜ່ກ່ຽວກັບການເຄື່ອນໄຫວວຽກງານການຕ່າງປະເທດຂອງ ສປປ ລາວ ໃນຂົງເຂດຕ່າງໆ, ໂດຍສະເພາະໃນຂອບອາຊຽນໂດຍມີບັນດານັກວິທະຍາກອນຈາກກະຊວງການຕ່າງປະເທດ, ກະຊວງອຸດສາຫະກໍາ ແລະ ການຄ້າ ແລະ ກະຊວງວັດທະນະທຳ ແລະ ທ່ອງທ່ຽວ ຂຶ້ນນຳສະເໜີ ແລະ ແລກປ່ຽນບົດຮຽນໃນກອງປະຊຸມ.
 |
ໃນພິທີເປີດກອງປະຊຸມ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ໄດ້ເຜີຍແຜ່ກ່ຽວກັບການເຄື່ອນໄຫວວຽກງານການຕ່າງປະເທດຂອງ ສປປ ລາວ ແລະ ສະພາບການພາກພື້ນ ແລະ ສາກົນໃນປັດຈຸບັນ. ພ້ອມນີ້, ທ່ານລັດຖະມົນຕີ ຍັງໄດ້ໃຫ້ທິດຊີ້ນຳແກ່ຜູ້ເຂົ້າຮ່ວມກອງປະຊຸມ ທັງຈາກບັນດາກະຊວງ ແລະ ຂັ້ນແຂວງ ເປັນຕົ້ນແມ່ນໃຫ້ກຳແໜ້ນ ແລະ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນປະຕິວັດລາວ, ແນວທາງການຕ່າງປະເທດຂອງ ສປປ ລາວ, ທັດສະນະຂອງ ສປປ ລາວ ຕໍ່ສະພາບການພາກພື້ນ ແລະ ສາກົນ, ສືບຕໍ່ຊຸກຍູ້ການພົວພັນຮ່ວມມືທາງດ້ານເສດຖະກິດ ກັບບັນດາແຂວງຊາຍແດນ ໂດຍໝູນໃຊ້ທ່າແຮງລວມຂອງການເຊື່ອມໂຍງ-ເຊື່ອມຈອດພາກພື້ນ.
 |
ກອງປະຊຸມໄດ້ຮັບຟັງການເຜີຍແຜ່ ແລະ ແລກປ່ຽນຄຳເຫັນ ກ່ຽວກັບການເຄື່ອນໄຫວວຽກງານການຕ່າງປະເທດຂອງ ສປປ ລາວ ເປັນຕົ້ນແມ່ນວຽກງານອາຊຽນ ແລະ ໝາກຜົນຂອງການເປັນປະທານອາຊຽນຂອງ ສປປ ລາວ ໃນປີ 2024, ການຮ່ວມມືໃນຂອບສອງຝ່າຍ, ວຽກງານຊາຍແດນ, ວຽກງານກົງສູນ, ການທູດເສດຖະກິດ, ວຽກງານການອອກຈາກສະພາບດ້ອຍພັດທະນາຂອງ ສປປ ລາວ ແລະ ວຽກການພົວພັນຄົນເຊື້ອຊາດລາວຢູ່ຕ່າງປະເທດໃນໄລຍະຜ່ານມາ ຊຶ່ງເປັນວຽກທີ່ຕິດພັນກັບການປະສານງານ ລະຫວ່າງສູນກາງ ແລະ ທ້ອງຖິ່ນ. ບັນດາຫົວຂໍ້ດັ່ງກ່າວ ແມ່ນໄດ້ຮັບຄວາມສົນໃຈຈາກບັນດາຜູ້ເຂົ້າຮ່ວມ ຈາກພະແນການຕ່າງໆ ຂອງບັນດາແຂວງພາກກາງ ແລະ ພາກເໜືອ ແລະ ມີການປະກອບຄໍາຄິດເຫັນຢ່າງມີເນື້ອໃນ ແລະ ກົງໄປກົງມາ ພ້ອມທັງແລກປ່ຽນ ຂໍ້ສະດວກ, ຂໍ້ຫຍຸ້ງຍາກ ແລະ ບັນດາຂໍ້ສະເໜີໃນການເຄື່ອນໄຫວວຽກງານການຕ່າງປະເທດຂອງແຕ່ລະແຂວງທີ່ເຂົ້າຮ່ວມ.
ຂ່າວ: ກະຊວງການຕ່າງປະເທດ
ຄໍາເຫັນ