ໂດຍການເປັນປະທານຮ່ວມ ຂອງທ່ານ ເພັດ ພົມພິພັກລັດຖະມົນຕີ ກະຊວງ ແຜນການ ແລະ ການລົງທຶນ, ທ່ານ ໂຄອິຊຶມິ ຊື່ໂຕະມຸ (KOIZUMI Tsutomu) ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ທ່ານ ກາເນະມີຊຶ ທາກາໂນບຸ (KANEMITSU Takanobu) ປະທານສາພາການຄ້າ ແລະ ອຸດສາຫະກຳ ຍີ່ປຸ່ນ ປະຈໍາ ລາວ, ບັນດາທ່ານຜູ້ຕາງໜ້າຈາກຂະແໜງການກ່ຽວຂ້ອງຂອງພາກລັດ ແລະ ພາກເອກະຊົນ ລາວ-ຍີ່ປຸ່ນ.
ທ່ານ ເພັດ ພົມພິພັກ ກ່າວວ່າ: ຈຸດປະສົງຂອງກອງປະຊຸມ ເພື່ອປຶກສາຫາລື ແລະ ແລກປ່ຽນຄໍາຄິດເຫັນ, ຂໍ້ສະເໜີບັນຫາຕ່າງໆ ທີ່ຕິດພັນກັບການດໍາເນີນທຸລະກິດ, ກໍຄືການລົງທຶນ ຂອງວິສາຫະກິດຍີ່ປຸ່ນ ທີ່ກໍາລັງດໍາເນີນທຸລະກິດຢູ່ ສປປ ລາວ. ເພື່ອສ່ອງແສງໃຫ້ເຫັນບັນຫາ, ລະບຽບການຂອງພາກລັດ ທີ່ຍັງບໍ່ທັນຈະແຈ້ງ ຫຼື ບັນຫາຂໍ້ຫຍຸ້ງຍາກຕ່າງໆ ທີ່ເກີດຂຶ້ນໃນການດໍາເນີນທຸລະກິດຕົວຈິງ ເພື່ອຍົກຂຶ້ນມາແລກປ່ຽນ ຮ່ວມກັນກັບພາກລັດ. ເຮັດໃຫ້ສອງຝ່າຍມີຄວາມເຂົ້າໃຈກັນຫຼາຍຂຶ້ນ ແລະ ຊອກຫາວິທີທາງໃນການປັບປຸງແກ້ໄຂບັນຫາໃນຕໍ່ໜ້າ ແລະ ທັງກຳນົດທິດທາງ ແລະ ບຸລິມະສິດຢ່າງມີຈຸດສຸມໃຫ້ຫຼາຍຂຶ້ນ.
ໃນດ້ານວຽກງານການສົ່ງເສີມ ແລະ ຄຸ້ມຄອງການລົງທຶນ: ລັດຖະບານ ໄດ້ຖືບົດບາດສໍາຄັນຕໍ່ການລົງທຶນພາກເອກະຊົນທັງພາຍໃນ ແລະ ຕ່າງປະເທດ ແລະ ໄດ້ອອກບັນດານິຕິກຳ ແລະ ນະໂຍບາຍ ເພື່ອສົ່ງເສີມ ແລະ ຄຸ້ມຄອງການລົງທຶນຂອງພາກເອກະຊົນ ພ້ອມທັງມີຄວາມຕັ້ງໃຈຢ່າງເດັດຂາດໃນການປັບປຸງພື້ນຖານໂຄງລ່າງ ແລະ ສະພາບແວດລ້ອມໃນການດໍາເນີນທຸລະກິດ ແລະ ການລົງທຶນຢູ່ໃນປະເທດໃຫ້ມີຄວາມສະດວກ, ວ່ອງໄວ, ໂປ່ງໃສ ຊຶ່ງມາຮອດທ້າຍປີນີ້, ກົດໝາຍສົ່ງເສີມການລົງທຶນ ສະບັບປັບປຸງຫຼ້າສຸດໃນປີ 2024 ນີ້ກໍໄດ້ຖືກຮັບຮອງ ແລະ ປະກາດໃຊ້ຢ່າງເປັນທາງການ. ພ້ອມນີ້, ຈະໄດ້ສືບຕໍ່ໃນການແປເປັນພາສາຕ່າງປະເທດ ແລະ ເຜີຍແຜ່ໃຫ້ຂະແໜງການກ່ຽວຂ້ອງ, ພາກເອກະຊົນ ໄດ້ຮັບຊາບກັນຢ່າງທົ່ວເຖິງ.
ການລົງທຶນຂອງປະເທດຍີ່ປຸ່ນ ໃນກິດຈະການຄວບຄຸມ ແລະ ສຳປະທານ ແມ່ນຍັງຢູ່ໃນຈັງຫວະຄົງທີ່ ມີຈໍານວນ 91 ໂຄງການ ມີມູນຄ່າການລົງທຶນທັງໝົດ 134 ລ້ານກວ່າໂດລາ, ໃນນັ້ນ ກວມເອົາຂະແໜງກະສິກຳ, ການບໍລິການ, ການສຶກສາ, ອຸດສາຫະກຳ ແລະ ຫັດຖະກຳ ຊຶ່ງຈັດຢູ່ອັນດັບ 14 ຂອງການລົງທຶນຕ່າງປະເທດທີ່ມາລົງທຶນຢູ່ ສປປ ລາວ. ການລົງທຶນໃນເຂດເສດຖະກິດພິເສດ ມີຈໍານວນທັງໝົດ 57 ບໍລິສັດ (ບໍລິສັດຍີ່ປຸ່ນ 100% ມີ 41ບໍລິສັດ. ບໍລິສັດຍີ່ປຸ່ນ ຮ່ວມກັບບໍລິສັດລາວ ມີ 16 ບໍລິສັດ, ມີທຶນທັງໝົດ 183 ລ້ານໂດລາ. ການລົງທຶນໃນກິດຈະການທົ່ວໄປ ເຫັນວ່າມີໂຕເລກການຂໍຈົດທະບຽນວິສາຫະກິດເພີ່ມຂຶ້ນ, ໃນປີ 2023-2024 ມີໂຕເລກການຈົດທະບຽນເຖິງ 69 ບໍລິສັດ ໃນມູນຄ່າການລົງທຶນ 138 ລ້ານໂດລາ, ກວມເອົາກິດຈະການ ກະສິກຳ, ການຜະລິດ, ຂາຍຍົກ-ຂາຍຍ່ອຍ, ບໍລິການ, ການເງິນ ແລະ ອື່ນໆ.
ກອງປະຊຸມປຶກສາຫາລື ລະຫວ່າງ ພາກລັດ ແລະ ເອກະຊົນ ໃນແຕ່ລະປີ ຝ່າຍຍີ່ປຸ່ນກໍໄດ້ນໍາສະເໜີຫົວຂໍ້ ທີ່ສໍາຄັນ ທີ່ເປັນອຸປະສັກໃນການດໍາເນີນທຸລະກິດຢູ່ໃນລາວ ແລະ ໃນແຕ່ລະຄັ້ງພາກລັດຂອງລາວ ກໍສາມາດປັບປຸງແກ້ໄຂຊຶ່ງບາງບັນຫາກໍສາມາດແກ້ໄຂໄດ້ຢ່າງຂາດຕົວ ແລະ ບາງບັນຫາກໍເປັນຂໍ້ມູນທີ່ດີ ເພື່ອໃຫ້ສືບຕໍ່ປຶກສາຫາລື ຫາທາງອອກຮ່ວມກັນ. ໂອກາດດັ່ງກ່າວ ທ່ານ ເພັດ ພົມພິພັກຕີລາຄາສູງຕໍ່ການເຂົ້າຮ່ວມ, ການເຈາະຈີ້ມບັນຫາຂອງບັນດານັກທຸລະກິດຍີ່ປຸ່ນ ແລະ ການຊີ້ແຈງບັນຫາ ລວມທັງວິທີການແກ້ໄຂໃນຕໍ່ໜ້າ ຂອງຂະແໜງການພາກລັດຊຶ່ງເຮັດໃຫ້ກອງປະຊຸມເຕັມໄປດ້ວຍເນື້ອໃນທີ່ໜັກແໜ້ນ, ສາມາດສ່ອງແສງໃຫ້ເຫັນເຖິງບັນຫາທີ່ພົ້ນເດັ່ນ ເພື່ອສືບຕໍ່ປຶກສາຫາລືກັນ ຄົ້ນຄວ້າຫາວິທີແກ້ໄຂໃນຕໍ່ໜ້າ, ພ້ອມທັງເຮັດໃຫ້ບັນດາຜູ້ເຂົ້າຮ່ວມມີຄວາມເຂົ້າໃຈຊຶ່ງກັນ ແລະ ກັນຫຼາຍຂຶ້ນ. ກອງປະຊຸມດັ່ງກ່າວ, ໄດ້ຮັບການສະໜັບສະໜູນຈາກຫຼາຍພາກສ່ວນ ຄື: ຈາກອົງການ JETRO, ສະພາການຄ້າ ແລະ ອຸດສາຫະກຳຍີ່ປຸ່ນ, ອົງການ JICA, JBIC.
(ຂ່າວ-ພາບ: ແສງຈັນ)
ຄໍາເຫັນ