 |
ໃນໂອກາດກ່າວໄຂກອງປະຊຸມ ທ່ານ ບຸນມີ ພິມມະສອນ ໄດ້ກ່າວວ່າ: ການດໍາເນີນກອງປະຊຸມສະໄໝວິສາມັນ ເທື່ອທີ 2 ຂອງສະພາປະຊາຊົນແຂວງຄໍາມ່ວນ ຊຸຸດທີ IV ດ້ານໜຶ່ງກໍເປັນການປະຕິບັດພາລະບົດບາດ, ສິດ ແລະ ໜ້າທີ່ ຂອງສະພາປະຊາຊົນຂັ້ນແຂວງ ຕາມທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ວ່າດ້ວຍສະພາປະຊາຊົນຂັ້ນແຂວງ ແລະ ອີກດ້ານໜຶ່ງ ກໍ່ເພື່ອຈັດຕັ້ງຜັນຂະຫຍາຍມະຕິ ຂອງສູນກາງພັກ, ຄະນະປະຈໍາສະພາແຫ່ງຊາດ, ຄະນະປະຈໍາພັກແຂວງ, ຄະນະປະຈຳ ສະພາປະຊາຊົນຂັ້ນແຂວງ ໃນການຮັບຮອງວຽກງານສ້າງ, ການປະເມີນ ແລະ ປັບປຸງນິຕິກໍາຂັ້ນທ້ອງຖິ່ນ. ເຊິ່ງຈະໄດ້ພ້ອມກັນສຸມໃສ່ຄົ້ນຄວ້າ, ພິຈາລະນາ ບັນຫາທີ່ຈໍາເປັນ ແລະ ຮີບດ່ວນ ຂອງແຂວງ ປະກອບມີ:
1. ພິຈາລະນາຮັບຮອງເອົາ ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ນໍາໃຊ້ທີ່ດິນຜັງເມືອງທ່າແຂກ.
2. ພິຈາລະນາຮັບຮອງເອົາ ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ນໍາໃຊ້ທີ່ດິນກະສິກໍາຢູ່ແຂວງຄໍາມ່ວນ.
3. ພິຈາລະນາຮັບຮອງເອົາ ບົດລາຍງານຂອງຄະນະກໍາມະການປົກຄອງເມືອງທ່າແຂກ ກ່ຽວກັບການປະເມີນຜົນ ການຈັດຕັ້ງປະຕິບັດຂໍ້ຕົກລົງ ວ່າດ້ວຍການຄຸ້ມຄອງ ແລະ ຈັດສັນຄວາມເປັນລະບຽບຮຽບຮ້ອຍ ຂອງເມືອງທ່າແຂກ.
 |
ພິເສດໃນວາລະກອງປະຊຸມໃນຄັ້ງນີ້ ຍັງຈະໄດ້ຈັດພິທີມອບຫຼຽນກາລະນຶກ 50 ປີ ສະພາແຫ່ງຊາດ ແລະ ຫຼຽນກາລະນຶກ 5 ປີ ສະພາປະຊາຊົນຂັ້ນແຂວງ ໃຫ້ແກ່ການນໍາຂອງແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12, ສະມາຊິກສະພາປະຊາຊົນຂັ້ນແຂວງ ຊຸດທີ IV ແລະ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12, ສະມາຊິກສະພາປະຊາຊົນຂັ້ນແຂວງ ບໍານານ ໃນຊຸດຜ່ານມາ.
ເພື່ອເຮັດໃຫ້ການພິຈາລະນາຮັບຮອງເອົາວຽກງານການສ້າງ, ການປະເມີນ ແລະ ປັບປຸງນິຕິກໍາຂອງແຂວງ ໃຫ້ມີຄຸນນະພາບ, ປະສິດທິຜົນ ແລະ ບັນລຸຜົນຕາມແຜນການທີ່ວາງໄວ້, ປະທານກອງປະຊຸມ ໄດ້ຮຽກຮ້ອງມາຍັງບັນດາທ່ານສະມາຊິກສະພາປະຊາຊົນຂັ້ນແຂວງ ຈົ່ງໄດ້ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ, ສຸມທຸກສະຕິປັນຍາ, ຄວາມຮູ້ - ຄວາມສາມາດ ຂອງຕົນເຂົ້າໃນການຄົ້ນຄວ້າ, ພິຈາລະນາ ແລະ ປະກອບຄໍາຄິດ - ຄໍາເຫັນຢ່າງມີປະຊາທິປະໄຕ, ເລິກເຊິ່ງ, ມີຈຸດສຸມ, ເຈາະຈົງ, ພາວະວິໄສ, ມີເຫດຜົນຕົວຈິງ ແລະ ຮັບປະກັນຄວາມສອດຄ່ອງກັບນະໂຍບາຍ ຂອງພັກ, ຖືກຕ້ອງຕາມລັດຖະທໍາມະນູນ, ກົດໝາຍ, ສະພາບຈຸດພິເສດຕົວຈິງ ຂອງແຂວງຄຳມ່ວນໃນປະຈຸບັນ.
ຂ່າວ:ກອງຄໍາ
ຄໍາເຫັນ