ກອງປະຊຸມສະຫຼຸບວຽກງານກໍ່ສ້າງພັກ, ພະນັກງານແລະປັບປຸງກົງຈັກການຈັດຕັ້ງທົ່ວປະເທດ  ປະຈຳປີ2023

ກອງປະຊຸມສະຫຼຸບວຽກງານຈັດຕັ້ງກໍ່ສ້າງພັກ,ພະນັກງານ ແລະ ວຽກງານປັບປຸງກົງຈັກການຈັດຕັ້ງທົ່ວປະເທດປະຈໍາປີ 2023 ໄດ້ຈັດຂຶ້ນໃນຕອນເຊົ້າວັນທີ23 ມັງກອນນີ້ທີ່ສະໂມສອນຄະນະຈັດຕັ້ງສູນກາງພັກ ໂດຍພາຍໃຕ້ການເປັນປະທານຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ຊຶ່ງມີບັນດາສະຫາຍ ຮອງເລຂາຄະນະພັກ, ຄະນະປະຈໍາພັກ ຜູ້ຊີ້ນໍາວຽກງານກໍ່ສ້າງພັກ-ພະນັກງານ ທັງແມ່ນຫົວໜ້າຄະນະຈັດຕັ້ງແຂວງ, ບັນດາສະຫາຍຫົວໜ້າຄະນະຈັດຕັ້ງແຂວງ-ນະຄອນຫຼວງ, ຫົວໜ້າກົມຈັດຕັ້ງຂອງກະຊວງ-ອົງການພ້ອມດ້ວຍບັນດາສະຫາຍຕາງໜ້າຄະນະຈັດຕັ້ງແຂວງ-ນະຄອນຫຼວງ, ກົມຈັດຕັ້ງຂອງກະຊວງ-ອົງການ, ບັນດາສະຫາຍຄະນະພັກ, ຄະນະກົມຂອງຄະນະຈັດຕັ້ງສູນກາງພັກເຂົ້າຮ່ວມ

ສະຫາຍ ນາງ ສີໃສ ລືເດດມູນສອນໄດ້ກ່າວວ່າ:ກອງປະຊຸມຈະໄດ້ຮັບຟັງການສະຫຼຸບຕີລາຄາການເຄື່ອນໄຫວວຽກງານຈັດຕັ້ງກໍ່ສ້າງພັກ,ພະນັກງານ ແລະ ວຽກງານປັບປຸງກົງຈັກການຈັດຕັ້ງ ໃນໄລຍະ 1 ປີຜ່ານມາ ເປັນຕົ້ນແມ່ນ: ການເຊື່ອມຊຶມ,ຜັນຂະຫຍາຍ,ການຈັດຕັ້ງປະຕິບັດບັນດາມະຕິ,ຄໍາສັ່ງ ແລະ ຂໍ້ກໍານົດຕ່າງໆ ກ່ຽວກັບວຽກງານກໍ່ສ້າງພັກ-ພະນັກງານ ແລະ ວຽກງານປັບປຸງກົງຈັກການຈັດຕັ້ງໃນໄລຍະຜ່ານມາ ຊຶ່ງໃນນັ້ນ,ພວກເຮົາຕ້ອງຊອກໃຫ້ເຫັນໄດ້ທັງຜົນສໍາເລັດ,ບັນຫາຂໍ້ຄົງຄ້າງ,ສາເຫດ ເພື່ອກ້າວໄປເຖິງການກໍານົດທິດທາງໜ້າທີ່ຈຸດສຸມຂອງວຽກງານໃນປີ2024 ແນໃສ່ສືບຕໍ່ກໍ່ສ້າງສະມາຊິກພັກ-ພະນັກງານ ແລະ ກົງຈັກການຈັດຕັ້ງ ໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ.ຮັບຟັງການປະກອບຄໍາເຫັນ ຂອງຕາງໜ້າຄະນະຈັດຕັ້ງແຂວງ,ກົມຈັດຕັ້ງຂອງກະຊວງ-ອົງການຈໍານວນໜຶ່ງຕາມຫົວຂໍ້ຕ່າງໆທີ່ໄດ້ມອບໝາຍແລະການປະກອບຄໍາເຫັນຂອງພາກສ່ວນອື່ນກ່ຽວກັບວຽກງານກໍ່ສ້າງພັກ, ພະນັກງານແລະປັບປຸງກົງຈັກການຈັດຕັ້ງຂອງພາກສ່ວນຕົນແລະສະພາບລວມຂອງວຽກງານດັ່ງກ່າວ, ຮັບຟັງການອະທິບາຍເພີ່ມເຕີມໃນບັນຫາທີ່ກອງປະຊຸມຕັ້ງຂຶ້ນຂອງບັນດາທ່ານຮອງຫົວໜ້າຄະນະຈັດຕັ້ງສູນກາງພັກແລະຕາງໜ້າກົມວິຊາການຂອງຄະນະຈັດຕັ້ງສູນກາງພັກ, ຮັບຟັງການເຜີຍແຜ່ຄໍາແນະນໍາກ່ຽວກັບການປະຕິບັດມະຕິຂອງກົມການເມືອງສູນກາງພັກວ່າດ້ວຍການເລືອກເຟັ້ນແຕ່ງຕັ້ງ, ສັບປ່ຽນໜ້າທີ່ຂອງພະນັກງານນໍາພາ-ຄຸ້ມຄອງແລະມະຕິວ່າດ້ວຍການຕີລາຄາພະນັກງານ,ຮັບຟັງແລະປະກອບຄໍາເຫັນໃສ່ຮ່າງຄໍາແນະນໍາເພີ່ມເຕີມກ່ຽວກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນຊຶ່ງຄໍາເຫັນຂອງບັນດາສະຫາຍຈະເປັນຂໍ້ມູນໃຫ້ກົມວິຊາການສືບຕໍ່ນໍາໄປປັບປຸງນິຕິກໍາດັ່ງກ່າວໃຫ້ມີເນື້ອໃນຊັດເຈນກວ່າເກົ່າ, ຮັບປະກັນໃຫ້ຂັ້ນຕອນ, ວິທີການສ້າງແລະປະເມີນໜ່ວຍພັກປອດໃສ, ເຂັ້ມແຂງ, ໜັກແໜ້ນມີຄຸນນະພາບ.
ຂ່າວ-ພາບ:ພູວຽງຄຳ