ສະຖາບັນເລືອດແຫ່ງຊາດ ອົງການກາແດງແຫ່ງຊາດລາວ ໄດ້ຈັດກອງປະຊຸມສະຫຼຸບວຽກງານປຸກລະດົມຂົນຂວາຍບໍລິຈາກເລືອດປີ 2023 ແລະ ວາງແຜນແບບມີສ່ວນຮ່ວມປີ 2024 ຂຶ້ນ ໃນວັນທີ 7 ພຶດສະພານີ້ ທີ່ສະຖາບັນເລືອດແຫ່ງຊາດ, ໂດຍການເປັນປະທານ ຂອງທ່ານ ຈັນທະລາ ສຸກສາຄອນ ຫົວໜ້າສະຖາບັນເລືອດແຫ່ງຊາດ, ມີບັນດາຜູ້ຕາງໜ້າຈາກກະຊວງ, ອົງການ, ສະຖາບັນ ອ້ອມຂ້າງສູນກາງ.
ໃນພິທີ, ທ່ານ ຈັນທະລາ ສຸກສາຄອນ ກ່າວວ່າ: ກອງປະຊຸມມື້ນີ້, ເພື່ອປຶກສາຫາລື ວຽກງານ ແລະ ຖອດຖອນບົດຮຽນ ກ່ຽວກັບ ການບໍລິຈາກເລືອດ ສະໜອງເລືອດໃຫ້ປອດໄພ ຊຶ່ງຈຸດປະສົງ ກໍເພື່ອສະຫຼຸບຕີລາຄາຄືນ ການຈັດຕັ້ງປະຕິບັດວຽກງານປຸກລະດົມຂົນຂວາຍ ບໍລິຈາກເລືອດໄລຍະທີ່ຜ່ານມາ ແລະ ພ້ອມກັນວາງທິດທາງໃນຕໍ່ໜ້າ. ເລືອດຂອງມະນຸດ ຍັງບໍ່ທັນມີໂຮງງານໃດທີ່ສາມາດຜະລິດໄດ້ ມີແຕ່ໄດ້ຈາກການບໍລິຈາກເລືອດ ຈາກເພື່ອນມະນຸດດ້ວຍກັນ. ສະນັ້ນ, ຈຶ່ງມີຄວາມຈໍາເປັນທີ່ສຸດ ທີ່ບັນດາປະເທດຕ່າງໆ ຈະຕ້ອງໄດ້ມີການປຸກລະດົມບໍລິຈາກເລືອດ ຜູ້ທີ່ມີເງື່ອນໄຂໃນປະຊາກອນຂອງຕົນ ເພື່ອໃຫ້ກັບຄົນເຈັບໃນປະຊາກອນຕົນ ຊຶ່ງມັນແມ່ນພັນທະຂອງທຸກໆຄົນ. ອົງການອະນາໄມໂລກ ໄດ້ຕັ້ງເປົ້າໝາຍໃຫ້ແຕ່ລະປະເທດວ່າ ຢ່າງຕໍ່າຕ້ອງໄດ້ບໍລິຈາກເລືອດໃຫ້ໄດ້ 1% ຕໍ່ປະຊາກອນຕໍ່ປີ.
ໂອກາດດັ່ງກ່າວ, ທ່ານ ຈັນທະລາ ສຸກສາຄອນ ໄດ້ກ່າວສະແດງຄວາມຊົມເຊີຍມາຍັງບັນດາກະຊວງ, ອົງການຈັດຕັ້ງຕ່າງໆທີ່ໄດ້ບໍລິຈາກເລືອດດ້ວຍຄວາມເອົາໃຈໃສ່ ແລະ ລື່ນຄາດໝາຍໃນໄລຍະທີ່ຜ່ານມາ. ສໍາລັບສະຖາບັນເລືອດແຫ່ງຊາດ ໃນແຕ່ລະມື້ ແມ່ນສະໜອງເລືອດ 150-200 ຖົງ.
(ຂ່າວ-ພາບ: ແສງຈັນ)
ຄໍາເຫັນ