 |
ພິທີເປີດໂຄງການ ແລະ ກອງປະຊຸມສຳມະນາຄັ້ງນີ້ໄດ້ຮັບກຽດກ່າວເປີດໂດຍທ່ານໄມທອງທຳມະວົງສາ, ຮອງລັດຖະມົນຕີກະຊວງການຕ່າງປະເທດ, ຮ່ວມກັບ ທ່ານ ສີວຽງໄຊ ອໍລະບູນ, ຫົວໜ້າຫ້ອງວ່າການແຂວງວຽງຈັນ ກ່າວຕ້ອນຮັບ ແລະທ່ານເຕິ້ງ ຫຼີ່ສຽງ, ທີ່ປຶກສາປະຈໍາສະຖານເອກອັກຄະລັດຖະທູດແຫ່ງ ສປຈີນປະຈໍາສປປລາວ ກ່າວມີຄຳເຫັນ.
ຈຸດປະສົງຂອງໂຄງການ ແມ່ນເພື່ອສ້າງເວທີໃຫ້ ເຈົ້າໜ້າທີ່ຈາກບັນດາຂະແໜງການກ່ຽວຂ້ອງ ຈາກສູນກາງ, ທ້ອງຖິ່ນ ລວມທັງຊ່ຽວຊານຈາກບັນດາປະເທດສະມາຊິກແມ່ນ້ຳຂອງ-ແມ່ນ້ຳລ້ານຊ້າງ ໄດ້ມາແລກປ່ຽນຄຳຄິດຄຳເຫັນ ແລະ ບົດຮຽນ ກ່ຽວກັບ ການຫຼຸດຜ່ອນຜົນກະທົບດ້ານສິ່ງແວດລ້ອມຈາກການດຳເນີນກະສິກຳແບບຖາງປ່າ-ເຮັດໄຮ່ ເພື່ອຫັນໄປສູ່ກະສິກຳແບບທັນສະໄໝ, ຍືນຍົງ, ຫຼຸດຜ່ອນມົນລະພິດທາງອາກາດ, ປົກປັກຮັກສາລະບົບນິເວດ, ແລະ ຊຸກຍູ້ຄວາມຍືນຍົງຂອງສິ່ງແວດລ້ອມ,ເຊິ່ງມີຜູ້ເຂົ້າຮ່ວມຈາກບັນດາປະເທດສະມາຊິກແມ່ນ້ຳຂອງ-ແມ່ນ້ຳລ້ານຊ້າງ (ກຳປູເຈຍ, ລາວ, ມຽນມາ, ໄທ, ຫວຽດນາມ ແລະ ສປ ຈີນ), ບັນດາກະຊວງຂະແໜງການຈາກສູນກາງແລະບັນດາຂະແໜງການຕ່າງໆຈາກ 4 ແຂວງພາກເໜືອ (ຫຼວງພະບາງ, ໄຊຍະບູລີ, ອຸດົມໄຊ, ບໍ່ແກ້ວ)
ກອງປະຊຸມສຳມະນາ ໄດ້ດຳເນີນພາຍໃຕ້ການເປັນປະທານຂອງທ່ານອິນທະສອນ ທິຣະກຸນ, ຮອງຫົວໜ້າກົມເສດຖະກິດ, ກະຊວງການຕ່າງປະເທດ, ຫົວໜ້າກອງເລຂາແມ່ນ້ຳຂອງ-ແມ່ນ້ຳລ້ານຊ້າງ ແຫ່ງຊາດລາວ, ເຊິ່ງໃນກອງປະຊຸມແມ່ນມີບັນຍາກາດທີ່ດີ, ມີການແລກປ່ຽນຄໍາຄິດຄຳເຫັນ, ຂໍ້ມູນຂ່າວສານແບບກົງໄປກົງມາແລະມີຄວາມອຸດົມສົມບູນທາງດ້ານເນື້ອໃນໂດຍສະເພາະໄດ້ປຶກສາຫາລືແລະລະດົມແນວຄວາມຄິດໃນຫົວຂໍ້ຕ່າງໆເຊັ່ນ: ການຟື້ນຟູປ່າ ແລະ ການຄຸ້ມຄອງປ່າໄມ້ແບບຍືນຍົງ, ການກວດກາ ແລະ ຕິດຕາມມົນລະພິດຈາກຄວັນໄຟປ່າ, ຜົນກະທົບຈາກການຖາງປ່າເຮັດໄຮ່ຂອງ 4 ແຂວງ ພາກເໜືອ, ບັນຫາແລະສິ່ງທີ່ທ້າທາຍຂອງການເຮັດກະສິກຳໃນຮູບແບບ“ການຖາງປ່າເຮັດໄຮ່່”ໃນພາກພື້ນແມ່ນໍ້າຂອງ-ແມ່ນໍ້າລ້ານຊ້າງ, ການສົ່ງເສີມທາງເລືອກ ກະສິກຳແບບຍືນຍົງ ແລະ ເພີ່ມທະວີການຮ່ວມມືການຫຼຸດຜ່ອນມົນລະຜິດທາງອາດໃນພາກພື້ນແມ່ນ້ຳຂອງ.
ພ້ອມດຽວກັນ, ໃນໂອກາດເປີດໂຄງການ ແລະ ກອງປະຊຸມສຳມະນາຄັ້ງນີ້, ທ່ານ ອິນທະສອນ ທິຣະກຸນ, ຮອງຫົວໜ້າກົມເສດຖະກິດ ໃນນາມເຈົ້າຂອງໂຄງການ ໂດຍການເປັນສັກຂີພິຍານ ຂອງ ທ່ານ ໄມທອງ ທຳມະວົງສາ, ຮອງລັດຖະມົນຕີກະຊວງການຕ່າງປະເທດ, ທ່ານ ສີວຽງໄຊ ອໍລະບູນ, ຫົວໜ້າຫ້ອງວ່າການແຂວງວຽງຈັນ, ທ່ານເຕິ້ງ ຫຼີ່ສຽງ, ທີ່ປຶກສາປະຈໍາສະຖານເອກອັກຄະລັດຖະທູດແຫ່ງ ສປຈີນປະຈໍາສປປລາວ ແລະ ບັນດາຜູ້ແທນທີ່ເຂົ້າຮ່ວມກອງປະຊຸມ ກໍ່ໄດ້ມອບໂດຮນ ແລະ ເຄື່ອງກວດຄຸນນະພາບອາກາດໃຫ້ບັນດາ 4 ແຂວງພາກເໜືອ ເພື່ອເປັນເຄື່ອງມືໃນການຈັດຕັ້ງປະຕິບັດການຫຼຸດຜົນມົນລະຜິດອາກາດພາຍໃນແຂວງຂອງຕົນ.
ຂ່າວ:ກົມເສດຖະກິດກະຊວງການຕ່າງປະເທດ
ຄໍາເຫັນ