ກອງປະຊຸມສ່ອງແສງຄະນະກວດກາແຕ່ລະຂັ້ນ ອົງຄະນະພັກ ຄອສພ

ສະຫາຍປະທານກອງປະຊຸມໄດ້ກ່າວວ່າ: ຄະນະກວດກາພັກ ຄອສພ ປະກອບມີ 5 ສະຫາຍ ຊຶ່ງໄດ້ຮັບຄວາມເຊື້ອໝັ້ນ ໄວ້ວາງໃຈ ຈາກສະມາຊິກພັກທົ່ວອົງຄະນະພັກ ຄອສພ ໂດຍຜ່ານການທາບທາມ ຕາມລະບຽບການ ແລະ ໄດ້ຮັບການຕີລາຄາຮັບຮອງຈາກຄະນະພັກ ຄອສພ (ໂດຍສະເພາະແມ່ນສະຫາຍເລຂາ ແລະ ຮອງເລຂາຄະນະພັກ), ສະ ເໜີຜ່ານຄະນະຈັດຕັ້ງສູນກາງພັກ ແລະ ລາຍງານຜ່ານກອງປະຊຸມ ຄລສພ ພິຈາລະນາຕົກລົງ. ກອງປະຊຸມຄັ້ງປະຖົມມະລືກ ຂອງຄະນະບໍລິຫານງານພັກ ຄອສພ ໄດ້ເປັນເອກະສັນຮັບຮອງເອົາປະທານ ແລະ ຮອງປະທານຄະນະກວດກາ ຄອສພ ຢ່າງເປັນທາງການ.

ບັນດາສະຫາຍປະທານກວດກາໜ່ວຍພັກ, ປະທານກວດກາຂອງຄະນະພັກຮາກຖານ, ຂອງບັນດາອົງການຈັດຕັ້ງມະຫາຊົນ ກໍເຊັ່ນດຽວກັນ ໄດ້ຮັບການຄັດເລືອກ, ໄດ້ຮັບຄວາມເຊື່ອໝັ້ນ ຈາກການຈັດຕັ້ງ ແລະ ຝາກຄວາມຫວັງໄວ້ກັບບັນດາສະຫາຍ ໃນການເຮັດໜ້າທີ່ສໍາຄັນ ຂອງຄະນະພັກ, ຄະນະບໍລິຫານງານອົງການຈັດຕັ້ງມະຫາຊົນ ຊຶ່ງມີຄວາມສໍາຄັນຂາດບໍ່ໄດ້. ສະນັ້ນ ພວກເຮົາຕ້ອງໄດ້ປະຕິບັດບົດບາດ, ໜ້າທີ່, ສິດ ຂອງຄະນະກວດກາຢ່າງເຕັມສ່ວນ ແລະ ມີປະສິດທິຜົນ, ເປັນກໍາລັງແຮງສໍາຄັນໃຫ້ແກ່ຄະນະພັກແຕ່ລະຂັ້ນ. ວຽກງານກວດກາ ແມ່ນໜຶ່ງໃນພາລະບົດບາດ, ເປັນເຄື່ອງມືອັນແຫຼມຄົມ ແລະ ເປັນຫຼັກການພື້ນຖານຂອງພັກ. ພັກເຮົາໄດ້ຢືນຢັນສະເໝີວ່າ: "ບ່ອນໃດບໍ່ມີການກວດກາ, ບ່ອນນັ້ນບໍ່ມີການນໍາພາ" ຫຼື ມີການກວດກາ ແຕ່ບໍ່ເຂັ້ມແຂງ ບໍ່ທັນເຮັດຕາມພາລະບົດບາດຢ່າງເຕັມປ່ຽມ ກໍສະແດງວ່າການນໍາພາ ຂອງຄະນະພັກຍັງບໍ່ທັນເຂັ້ມແຂງເທົ່າທີ່ຄວນ. ສໍາລັບຄະນະໂຄສະນາອົບຮົມສູນກາງພັກ, ວຽກງານກວດກາ ຍິ່ງມີຄວາມສໍາຄັນເປັນທະວີຄູນ ເພາະພວກເຮົາແມ່ນເສນາທິການໃຫ້ແກ່ສູນກາງພັກໃນວຽກງານແນວຄິດ, ການເມືອງ ແລະ ທິດສະດີຂອງພັກ. ການກວດກາທີ່ດີ ຈະຊ່ວຍປົກປ້ອງຄວາມບໍລິສຸດໂປ່ງໃສພາຍໃນພັກ, ປ້ອງກັນການເສື່ອມຖອຍດ້ານຄຸນທາດການເມືອງ, ຄຸນສົມບັດສິນທຳປະຕິວັດ ແລະ ຮັບປະກັນໃຫ້ທຸກການເຄື່ອນໄຫວໂຄສະນາອົບຮົມ ເປັນໄປຕາມແນວທາງຂອງພັກຢ່າງຖືກຕ້ອງ. ຄວາມຈໍາເປັນທີ່ຕ້ອງມີຄະນະກວດກາຄື: ເປັນເຄື່ອງມືໃນການນຳພາ: ດັ່ງຄຳເວົ້າທີ່ວ່າ "ບ່ອນໃດບໍ່ມີການກວດກາ, ບ່ອນນັ້ນບໍ່ມີການນຳພາ". ການກວດກາຊ່ວຍໃຫ້ຄະນະພັກ-ຄະນະນຳ ຮູ້ໄດ້ວ່າ ມະຕິ, ຄຳສັ່ງ ຫຼື ແຜນການທີ່ວາງອອກນັ້ນ ຖືກຈັດຕັ້ງປະຕິບັດແທ້ບໍ່ ຫຼື ເປັນພຽງແຕ່ເອກະສານ; ເພື່ອຮັກສາຄວາມປອດໃສບໍລິສຸດ: ສະກັດກັ້ນບໍ່ໃຫ້ສະມາຊິກພັກ ຫຼື ພະນັກງານ ຫັນເຫອອກຈາກແນວທາງ, ປ້ອງກັນການເສື່ອມຖອຍດ້ານຄຸນສົມບັດ ແລະ ການສວຍໃຊ້ໜ້າທີ່ຕຳແໜ່ງເພື່ອຜົນປະໂຫຍດສ່ວນຕົວ; ປົກປ້ອງຊັບສິນຂອງລັດ ແລະ ປະຊາຊົນເພື່ອຮັບປະກັນວ່າ ງົບປະມານ ແລະ ຊັບສິນຂອງສ່ວນລວມ ຖືກນຳໃຊ້ຢ່າງກຸ້ມຄ່າ, ໂປ່ງໃສ ແລະ ເກີດປະໂຫຍດສູງສຸດ; ສ້າງຄວາມເຊື່ອໝັ້ນ ເຮັດໃຫ້ມະຫາຊົນ ແລະ ປະຊາຊົນ ມີຄວາມເຊື່ອໝັ້ນຕໍ່ການນຳພາຂອງພັກ ແລະ ການບໍລິຫານຂອງລັດ.

ໃນກອງປະຊຸມ ສະຫາຍ ນາງ ຫຼ້າຊ້ອຍ ກອງແກ້ວມະນີວົງ ຮອງປະທານກວດກາພັກ ຄອສພ ຂຶ້ນລາຍງານຕີລາຄາສະພາບວຽກງານກວດກາ ໃນສະໄໝທີ 5 ຜ່ານມາ ເປັນຕົ້ນ (ມີດ້ານຕັ້ງໜ້າ-ອັນດີ, ອັນຄົງຄ້າງ, ສາເຫດ, ບົດຮຽນທີ່ຖອດຖອນໄດ້ ແລະ ທິດທາງຕໍ່ໜ້າ).

ພ້ອມນີ້ ປະທານກອງປະຊຸມຍັງໄດ້ໃຫ້ທິດທາງເພື່ອເປັນການຈັດຕັ້ງເຄື່ອນໄຫວວຽກງານ ຂອງຄະນະກວດກາແຕ່ລະຂັ້ນ ກໍຄີືວຽກງານກວດກາສະໄໝທີ VI ມີການຫັນປ່ຽນຢ່າງຕັ້ງໜ້າ ແລະ ແຂງແຮງ, ເນັ້ນໜັກ 3 ວຽກຈຸດສຸມ ດັ່ງນີ້:

ໜຶ່ງ, ເພີ່ມທະວີການກວດກາປ້ອງກັນ ແລະ ສະກັດກັ້ນເປັນສໍາຄັນ ແລະ ຕົ້ນຕໍ (ກວດກາປົກກະຕິ): ຕ້ອງຫັນປ່ຽນວິທີເຮັດວຽກ ຈາກການ "ລໍຖ້າໃຫ້ເກີດບັນຫາແລ້ວຈຶ່ງກວດກາ" ມາເປັນ "ການຕິດຕາມ, ຊຸກຍູ້, ເຕືອນໄພ ແລະ ສະກັດກັ້ນ" ບໍ່ໃຫ້ເກີດປະກົດການຫຍໍ້ທໍ້. ຕ້ອງເພີ່ມທະວີການກວດກາການຈັດຕັ້ງປະຕິບັດກົດລະບຽບຂອງພັກ, ກົດໝາຍຂອງລັດ ແລະ ຂໍ້ຫ້າມຂອງສະມາຊິກພັກ ຢ່າງເຂັ້ມງວດປະສານສົມທົບໃນການຄົ້ນຄວ້າສ້າງນິຕິກໍາ ຫຼື ລະບອບລະບຽບທີ່ຈໍາເປັນ (ການຜັນຂະຫຍາຍເປັນອັນສະເພາະພາຍໃນ ຄອສພ). ຍັງຂາດບ່ອນອີງອັນໃດ. ສ້າງຄວາມຮັບຮູ້ເຂົ້າໃຈເອກະພາບແຕ່ຫົວທີ່ ກັບຄະນະກວດກາໜ່ວຍພັກ, ຄະນະໜ່ວຍພັກ ໃນການປະຕິບັດລະບອບ, ລະບຽບ, ແບບແຜນການເຄື່ອນໄຫວວຽກງານ. (ຕົວຢ່າງ: ການສ້າງໜ່ວຍພັກ ປຂໝ, ການປະເມີນສະມາຊິກພັກ, ປະເມີນພະນັກງານ).

ສອງ, ຍົກສູງຄຸນນະພາບດ້ານວິຊາສະເພາະ ແລະ ຄຸນສົມບັດ ຂອງພະນັກງານກວດກາ: ພະນັກງານກວດກາ ຄະນະໂຄສະນາອົບຮົມສູນກາງພັກ ຕ້ອງເປັນຜູ້ທີ່ມີຄວາມຮູ້ຄວາມສາມາດດ້ານທິດສະດີ ແລະ ວິຊາສະເພາະທີ່ແນ່ນອນ, ແຕ່ສິ່ງສຳຄັນທີ່ສຸດແມ່ນ "ຕ້ອງມີຄຸນສົມບັດສິນທຳປະຕິວັດ, ມີຄວາມຊື່ສັດບໍລິສຸດ, ທ່ຽງທຳ ແລະ ກ້າເວົ້າກ້າເຮັດ". ຖ້າຜູ້ໄປກວດກາບໍ່ສະອາດ, ຈະບໍ່ສາມາດໄປກວດກາ ແລະ ດັດສ້າງຜູ້ອື່ນໄດ້. (ຍົກສູງຄວາມສາມາດ ແລະ ຄວາມເປັນແບບຢ່າງ ຂອງຜູ້ເຮັດວຽກງານກວດກາ: ຈັດຕັ້ງຝຶກອົບຮົມ, ເຜີຍແຜ່ນິຕິກໍາ ທີ່ກ່ຽວຂ້ອງ).

ສາມ, ຈັດຕັ້ງປະຕິບັດຫຼັກການ ແລະ ແບບແຜນວິທີເຮັດວຽກຢ່າງເຂັ້ມງວດ:

(ເນື້ອໃນຕາມມາດຕາ 7 - ໜ້າທີ 4 ຂອງມະຕິຕົກລົງ 18/ຄບພ.ຄອສພ ລົງວັນທີ 12/02/2025) ທຸກສະຫາຍຕ້ອງລາຍງານຄວາມຄືບໜ້າຂອງວຽກງານທີ່ຕົນຮັບຜິດຊອບ ໃຫ້ຄະນະກວດກາຊາບຢ່າງເປັນປະຈຳ. ທັງປົກກະຕິ ແລະ ເປັນແຕ່ລະວຽກງານສະເພາະ (ລວມທັງການຕາງໜ້າໄປຮ່ວມປະຊຸມ ແຕ່ລະຄັ້ງ ຕ້ອງສັງລວມລາຍງານໃຫ້ໝູ່ຄະນະຊາບ ເພື່ອເປັນຂໍ້ມູນ ແລະ ຄວາມຕໍ່ເນື່ອງ ຂອງວຽກງານ).

(ຂ່າວ:ຕຸໄລເພັດ)