 |
ກອງປະຊຸມຄັ້ງນີ້ຈັດຂຶ້ນພາຍໃຕ້ການເປັນປະທານຮ່ວມຂອງ ທ່ານ ສຸລິວັດ ສຸວັນນະຈູມຄຳ ຮອງລັດຖະມົນຕີກະຊວງການເງິນ ແລະ ທ່ານ ບັກທີຢໍ ຄາດິໂຣຟ ຜູ້ຕາງໜ້າອົງການ UNFPA ປະຈຳ ສປປ ລາວ. ຈຸດປະສົງຂອງກອງປະຊຸມຄັ້ງນີ້ແມ່ນທົບທວນຄືນຜົນສຳເລັດ ໃນການຈັດຕັ້ງປະຕິ ບັດບັນດາຄາດໝາຍຕ່າງໆໃນໄລຍະປີ 2025 ທີ່ຜ່ານມາ; ພ້ອມທັງເນັ້ນໜັກເຖິງບົດບາດຂອງການ ເປັນຄູ່ຮ່ວມງານ ທີ່ເຂັ້ມແຂງໃນການຊຸກຍູ້ການພັດທະນາແບບມີສ່ວນຮ່ວມ ແລະ ຍືນຍົງຢູ່ ສປປ ລາວ.
ນອກຈາກນີ້, ກອງປະຊຸມຄັ້ງນີ້ຍັງໄດ້ປຶກສາຫາລືກຳນົດທິດທາງຍຸດທະສາດຂອງການຮ່ວມມືລະ ຫວ່າງອົງການ UNFPA ແລະ ລັດຖະບານໃນປີ 2026 ຊຶ່ງເປັນປີມ້ວນທ້າຍຂອງແຜນງານ ສະບັບປັດ ຈຸບັນ. ອັນພົ້ນເດັ່ນ, ກອງປະຊຸມຄັ້ງນີ້ ໄດ້ປຶກສາຫາລືຮ່ວມອົງການລັດທີ່ກ່ຽວຂ້ອງເພື່ອຮ່ວມກັນ ກຳນົດແຜນດຳເນີນງານ ແລະ ໜ້າວຽກບຸລິມະສິດໃນແຜນການຮ່ວມມືຄັ້ງທີ 8 ແຕ່ປີ 2027 ຫາ 2031.
ກອງປະຊຸມຄັ້ງນີ້, ມີຜູ້ເຂົ້າຮ່ວມຈາກບັນດາຄູ່ຮ່ວມງານພາກລັດຖະບານຕາງໜ້າໃຫ້ ກະຊວງການ ເງິນ, ກະຊວງສາທາລະນະສຸກ; ກະຊວງສຶກສາທິການ ແລະ ກິລາ; ກະຊວງການຕ່າງປະເທດ; ກະຊວງ ແຮງງານ ແລະ ສະຫວັດດີການສັງຄົມ; ພ້ອມທັງສູນສະຖິຕິແຫ່ງຊາດ, ສູນກາງສະຫະພັນແມ່ຍິງລາວ ແລະ ສູນກາງຊາວໜຸ່ມປະຊາຊົນປະຕິວັດລາວ; ໃນກອງປະຊຸມ, ທ່ານສຸລິວັດ ສຸວັນນະຈູມຄຳ ໄດ້ສະ ແດງຄວາມຊົມເຊີຍຕໍ່ການຮ່ວມມືທີ່ຍາດມາໄດ້ໃນໄລຍະຜ່ານມາ, ພ້ອມທັງຍົກໃຫ້ເຫັນຄວາມຄືບໜ້າໃນ ການປັບປຸງການເຂົ້າເຖິງການບໍລິການສຸຂະພາບຈະເລີນພັນ ແລະ ສຸຂະພາບທາງເພດ, ການຊ່ວຍເຫຼືອ ຜູ້ຖືກເຄາະຮ້າຍຈາກຄວາມຮຸນແຮງບົນພື້ນຖານທາງເພດ, ການແກ້ໄຂບັນດາຮີດຄອງປະເພນີທີ່ບໍ່ສອດ ຄ່ອງ, ຜົນສຳເລັດໃນການຈັດຕັ້ງປະຕິບັດຂະບວນການລົງເກັບກຳຂໍ້ມູນພາກສະໜາມຂອງການສຳຫຼວດ ພົນລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ປີ 2025.
“ການປຶກສາຫາລືໃນມື້ນີ້ ຈະຊ່ວຍຊຸກຍູ້ການຜັນຂະຫຍາຍຂໍ້ມູນ-ຫຼັກຖານ, ປະສົບການ ແລະ ບົດຮຽນ ທີ່ຖອດຖອນໄດ້ ໃຫ້ກາຍເປັນວຽກງານບຸລິມະສິດໃນຕໍ່ໜ້າເພື່ອເຮັດໃຫ້ ສປປລາວມີລະບົບການດຳເນີນ ງານທີ່ເຂັ້ມແຂງສາມາດຊຸກຍູ້ການພັດທະນາແບບມີສ່ວນຮ່ວມໃຫ້ດີຂຶ້ນເທື່ອລະກ້າວ,”
ທ່ານ ບັກທີຢໍ ຄາດິໂຣຟ ກ່າວວ່າ: ພາຍໃຕ້ການນຳພາຂອງລັດຖະບານ, ການຮ່ວມມືລະຫວ່າງອົງການ UNFPA ແລະ ບັນດາຄູ່ຮ່ວມງານພາກລັດສາມາດບັນລຸຄາດໝາຍທີ່ສຳຄັນຫຼາຍດ້ານ, ໃນນັ້ນລວມເຖິງ ການຮັບຮອງເອົາຂໍ້ຮຽກຮ້ອງເພື່ອຊຸກຍູ້ການຈັດຕັ້ງປະຕິບັດບັນດາໜ້າວຽກຕ່າງໆ ແລະ ການສ້າງຕັ້ງກົນ ໄກການປະສານງານລະດັບຊາດເພື່ອຊຸກຍູ້ການຈັດຕັ້ງປະຕິບັດນະໂຍບາຍແຫ່ງຊາດດ້ານປະຊາກອນ ແລະ ການພັດທະນາ.
 |
ໃນຂົງເຂດວຽກງານສຸຂະພາບຈະເລີນພັນ, ສຸຂະພາບທາງເພດ ແລະ ສິດທິ, ອົງການ UNFPA ໄດ້ໃຫ້ການຊ່ວຍເຫຼືອດ້ານ ວິຊາການແກ່ບັນດາຄູ່ຮ່ວມງານພາກລັດໃນການຂະຫຍາຍການບໍລິການວາງ ແຜນຄອບຄົວ, ການບໍລິການສຸຂະພາບທີ່ເປັນມິດກັບໄວໜຸ່ມ ແລະ ເພດສຶກສາ, ຊຶ່ງຊ່ວຍໃຫ້ແມ່ຍິງ ແລະ ໄວໜຸ່ມຈຳນວນຫຼາຍຂຶ້ນສາມາດຕັດສິນໃຈກ່ຽວກັບສຸຂະພາບ ແລະ ອະນາຄົດຂອງເຂົາເຈົ້າໂດຍມີຂໍ້ມູນ ທີ່ຄົບຖ້ວນ.
ທ່ານ ບັກທີຢໍ ຄາດິໂຣຟ ຍັງໄດ້ກ່າວຕື່ມວ່າ: ອົງການ UNFPA ພ້ອມດ້ວຍບັນດາອົງການລັດຖະ ບານ ແລະ ພາກສ່ວນກ່ຽວຂ້ອງໄດ້ຮ່ວມກັນສ້າງຄວາມເຂັ້ມແຂງໃຫ້ແກ່ການປ້ອງກັນ ແລະ ການຕອບໂຕ້ ຄວາມ/ຮຸນແຮງບົນພຶ້ນຖານທາງເພດ ແລະ ຮີດຄອງປະເພນີ ທີ່ບໍ່ສອດຄອງຜ່ານການໂຄສະນາເຜີຍແຜ່ ຂໍ້ມູນຂ່າວສານ, ການສະໜອງບໍລິການ ແລະ ການມີສ່ວນຮ່ວມຂອງຊຸມຊົນ ຊຶ່ງໄດ້ປະກອບສ່ວນເຂົ້າ ໃນການສ້າງສະພາບແວດລ້ອມທີ່ປອດໄພ ແລະ ເອື້ອອຳນວຍໃຫ້ແກ່ແມ່ຍິງ ແລະ ເດັກຍິງຢູ່ທົ່ວ ສປປ ລາວ.
ໜຶ່ງໃນຜົນສຳເລັດທີ່ພົ້ນເດັ່ນແມ່ນຜົນສຳເລັດຂອງການຈັດຕັ້ງປະຕິບັດຂະບວນການສຳຫຼວດພົນ ລະເມືອງ ແລະ ທີ່ຢູ່ອາໄສທົ່ວປະເທດຄັ້ງທີ 5 ປີ 2025 ຊຶ່ງຜົນການສຳຫຼວດດັ່ງກ່າວຄາດວ່າຈະຖືກເຜີຍ ແຜ່ໃນທ້າຍປີນີ້ ແລະ ຈະສະໜອງຂໍ້ມູນທີ່ມີຄຸນນະພາບສູງເພື່ອເປັນບ່ອນອີງໃນການວາງແຜນ ແລະ ການຕັດສິນໃຈຂອງລັດຖະບານ, ຄູ່ຮ່ວມພັດທະນາ, ອົງການຈັດຕັ້ງທາງສັງຄົມ ແລະ ພາກເອກະຊົນ ຊຶ່ງຈະເປັນການສ້າງຄວາມເຂັ້ມແຂງໃຫ້ແກ່ການສ້າງ ແລະ ຈັດຕັ້ງປະຕິບັດນະໂຍບາຍທີ່ອີງໃສ່ຫຼັກຖານ ຕົວຈິງ ແລະ ຮັບປະກັນວ່າຈະບໍ່ມີໃຜຖືກປ່ອຍປະໄວ້ທາງຫຼັງ.
ໃນກອງປະຊຸມຍັງມີການປຶກສາຫາລືຮ່າງບຸລິມະສິດຂອງແຜນງານຮ່ວມມືລະຫວ່າງອົງການ UNFPA ແລະ ລັດຖະບານຄັ້ງທີ 8 (2027-2031) ຊຶ່ງປະກອບມີ: ການສ້າງຄວາມເຂັ້ມ ແຂງໃຫ້ ແກ່ລະບົບຂໍ້ມູນດ້ານປະຊາກອນ, ການປັບປຸງຄຸນນະພາບຂອງການບໍລິການດ້ານສາທາລະນະສຸກ, ການ ປ້ອງກັນຄວາມຮຸນແຮງບົນພື້ນຖານທາງເພດ, ແລະ ການລົງທຶນໃສ່ຊາວໜຸ່ມເພື່ອຂຸດຄົ້ນ ແລະ ນຳໃຊ້ ຜົນປະໂຫຍດດ້ານປະຊາກອນ.
ເປັນເວລາຫຼາຍກວ່າ 50 ປີ ແລ້ວ ທີ່ອົງການ UNFPA ໄດ້ເປັນຄູ່ຮ່ວມງານທີ່ໄດ້ຮັບ ຄວາມໄວ້ວາງໃຈຈາກລັດຖະບານແຫ່ງ ສປປ ລາວ. ເມື່ອພວກເຮົາເບິ່ງໄປໃນຕໍ່ໜ້າ, ພວກເຮົາຍັງຄົງມີ ຄວາມມຸ່ງໝັ້ນທີ່ຈະໃຫ້ການສະໜັບສະໜູນຊ່ວຍເຫຼືອປະເທດລາວໃນການລົງທຶນໃສ່ແມ່ຍິງ ແລະ ໄວໜຸ່ມ ເພື່ອເປັນກຳລັງຂັບເຄື່ອນຊຸກຍູ້ ການພັດທະນາແບບມີສ່ວນຮ່ວມ ແລະ ແບບຍືນຍົງ, ໂດຍສະເພາະໃນ ຂະນະທີ່ ສປປ ລາວ ກຳລັງໄດ້ຮັບໂອກາດທາງດ້ານປະຊາກອນ ຊຶ່ງມີໄລຍະເວລາທີ່ຈຳກັດ.
(ຂ່າວ: UNFPA)
ຄໍາເຫັນ