 |
ທ່ານ ພົງປະເສີດ ຄໍາລືຊາ ຫົວໜ້າພະແນກຫ້ອງການບໍລິຫານ ທພບ ໄດ້ຜ່ານຮ່າງສະຫຼຸບການເຄື່ອນໄຫວຮອບດ້ານ ປະຈໍາປີ 2025 ແລະ ທິດທາງແຜນການ ປະຈໍາປີ 2026 ຂອງ ທພບ ມີຜົນສຳເລັດໃນແຕ່ລະດ້ານ ໂດຍສະເພາະຄະນະພັກຮາກຖານ-ຄະນະອໍານວຍການ ໄດ້ຖືເອົາການສຶກສາອົບຮົມການເມືອງນຳພາແນວຄິດໃຫ້ພະນັກງານເປັນບັນຫາສຳຄັນ ແລະ ເປັນປົກກະຕິດ້ວຍຫຼາຍຮູບການທີ່ເໝາະສົມເຮັດໃຫ້ພະນັກງານມີຄວາມຮັບຮູ້, ເຊື່ອມຊຶມ ແລະ ເຂົ້າໃຈຕໍ່ແນວທາງນະໂຍບາຍຂອງພັກ-ລະບຽບກົດໝາຍຂອງລັດ, ເຊື່ອໝັ້ນຕໍ່ການຊີ້ນຳ-ນຳພາຂອງຂັ້ນເທິງ.
ໃນໜຶ່ງປີຜ່ານມາ, ຄະນະພັກ-ຄະນະອໍານວຍການ ໄດ້ນໍາພາ-ຊີ້ນໍາວຽກງານວິຊາສະເພາະ ໃນການສະໜອງສິນເຊື່ອໂດຍປ່ອຍໄດ້ທັງໝົດ 576.51 ຕື້ກີບ ເທົ່າກັບ 49.46% ຂອງແຜນການປີ, ເກັບຕົ້ນທຶນຄືນໄດ້ທັງໝົດ 520.90 ຕື້ກີບ ເທົ່າກັບ 49% ຂອງແຜນການປີ ທຽບໃສ່ປີຜ່ານມາ ເພີ່ມຂຶ້ນ 31.35 ຕື້ກີບ, ຍອດສິນເຊື່ອທ້າຍປີ 2025 ທັງໝົດ 3,017 ຕື້ກີບ ເທົ່າກັບ 99% ຂອງແຜນການປີ ທຽບໃສ່ປີຜ່ານມາ ມີຍອດສິນເຊື່ອເພີ່ມຂຶ້ນ 1.35%. ໃນນີ້, ຂົງເຂດໃນເມືອງເປົ້າໝາຍ ຈຳນວນ 1,737.38 ຕື້ກີບ ເທົ່າກັບ 56%, ຂົງເຂດຈຸດສຸມລັດຖະບານ-ທ້ອງຖິ່ນຈໍານວນ 383.49 ຕື້ກີບ ເທົ່າກັບ 13%, ບ້ານ 3 ສ້າງຈຳນວນ 525,27 ຕື້ກີບ ເທົ່າກັບ 17% ຂອງຍອດສິນເຊື່ອ ແລະ ຂົງເຂດນອກເມືອງເປົ້າໝາຍຈຳນວນໜື່ງ. ສິນເຊື່ອເຂົ້າເຖິງກວມເອົາ 17 ແຂວງ, 1 ນະຄອນຫຼວງ, 140 ເມືອງ, 78 ຈຸດສຸມ 5,262 ບ້ານ, ບ້ານທຸກ 1,513 ບ້ານ, ຈັດຕັ້ງກຸ່ມກູ້ຢືມໄດ້ 77,147 ກຸ່ມ, ປະຊາຊົນ ເຂົ້າເຖິງແຫຼ່ງທຶນ 287,500 ຄອບຄົວ, ເປັນຄອບຄົວຍັງບໍ່ທັນພົ້ນທຸກ 43,592 ຄອບຄົວ. ຜ່ານການຈັດຕັ້ງປະຕິບັດການສະໜອງສິນເຊື່ອໃນໄລຍະ 1 ປີຜ່ານມາສາມາດສ້າງໄດ້ໂຄງການພົ້ນເດັ່ນ ແລະ ຄອບຄົວຕົວແບບໄດ້ທັງໝົດ 325 ໂຄງການ, ມີຄອບຄົວຕົວແບບ 557 ຄອບຄົວ. ໃນນີ້, ປະກອບມີໂຄງການປູກຝັງ 40 ໂຄງການ, 79 ຄອບຄົວ. ໂຄງການລ້ຽງສັດ 265 ໂຄງການ, 443 ຄອບຄົວ. ໂຄງການຫັດຖະກໍາ 9 ໂຄງການ, 19 ຄອບຄົວ. ໂຄງການອຸດສາຫະກໍາ 8 ໂຄງການ, 13 ຄອບຄົວ ແລະ ໂຄງການບໍລິການ 3 ໂຄງການ, 3 ຄອບຄົວ;
ສໍາລັບທິດທາງ-ແຜນການປະຈຳປີ 2026 ຈະປ່ອຍສິນເຊື່ອໃຫ້ໄດ້ຈໍານວນ 1,693.17 ຕື້ກີບ, ເພື່ອສະໜອງສິນເຊື່ອໃນການແກ້ໄຂຄວາມທຸກຍາກ. ໃນນີ້, ປ່ອຍເຂົ້າເມືອງເປົ້າໝາຍ 565.21 ຕື້ກີບ, ຈຸດສຸມລັດຖະບານ-ທ້ອງຖິ່ນ 265.97 ຕື້ກີບ, ບ້ານ 3 ສ້າງ 191.73 ຕື້ກີບ, ສິນເຊື່ອພັດທະນາຊົນນະບົດ 235.46 ຕື້ກີບ ແລະ ຂົງເຂດທຸລະກິດທົ່ວໄປທີ່ມີການໄລ່ລຽງ 553 ຕື້ກີບ ໃຫ້ໄດ້ຕາມຄາດໝາຍ; ສືບຕໍ່ເພີ່ມທະວີການລົງເຜີຍແຜ່ນິຕິກຳ, ຂັ້ນຕອນ ແລະ ລະບຽບການທີ່ກ່ຽວຂ້ອງໃຫ້ສະມາຊິກອົງການຈັດຕັ້ງການເມືອງ-ສັງຄົມ ແລະ ກອງທຶນບ້ານ (ອກສກ) ແລະ ອົງການປົກຄອງທ້ອງຖິ່ນທີ່ມີສ່ວນຮ່ວມໃຫ້ເຂົ້າໃຈຢ່າງເລິກເຊິ່ງ, ພ້ອມດຽວກັນນັ້ນສືບຕໍ່ສະໜອງສິນເຊື່ອຜ່ານ ອົງການຈັດຕັ້ງການເມືອງ-ສັງຄົມ ແລະ ກອງທຶນບ້ານ (ອກສກ) ທົ່ວລະບົບໃຫ້ໄດ້ມີທ່າອ່ຽງເພີ່ມຂຶ້ນ.
ສືບຕໍ່ສ້າງແຜນຝຶກອົບຮົມ, ສຳມະນາ, ແລກປ່ຽນບົດຮຽນດ້ານເຕັກໂນໂລຊີຂໍ້ມູນຂ່າວສານກັບພາກສ່ວນພາຍໃນ ທພບ ແລະ ພາຍນອກເພື່ອເສີມຂະຫຍາຍດ້ານຄວາມຮູ້-ຄວາມສາມາດໃຫ້ພະນັກງານ; ຄົ້ນຄວ້າພັດທະນາດ້ານໂຄງສ້າງພື້ນຖານເຕັກໂນໂລຊີຂໍ້ມູນຂ່າວສານ, ລະບົບຫ້ອງບັນຈຸຖານຂໍ້ມູນ (ສູນຂໍ້ມູນຂ່າວສານ) ລະບົບທັນສະໄໝ IT (ລະບົບ: Core Banking, Core ATM, Core Mobile, ພັດທະນາແອັບມືຖື, ພັດທະນາລະບົບການປະເມີນຜົນພະນັກງານ ແລະ ອື່ນໆ) ໃຫ້ສາມາດບໍລິການຫຼາກຫຼາຍ ແລະ ເຊື່ອມໂຍງກັບບັນດາທະນາຄານທຸລະກິດທັງພາຍໃນ ແລະ ຕ່າງປະເທດສາມາດຮອງຮັບການພັດທະນາລະບົບຕ່າງໆໃນຕໍ່ໜ້າໄດ້ຢ່າງໝັ້ນຄົງ.
ທ່ານ ສຸພັກ ຖິ່ນໄຊພອນ ໄດ້ມີຄໍາເຫັນ ທີ່ສໍາຄັນຫຼາຍດ້ານ ຕໍ່ກອງປະຊຸມ ເປັນຕົ້ນ: ສ້າງ ທພບ ໃຫ້ເປັນທະນາຄານແຖວໜ້າທີ່ໃຫ້ການບໍລິການທາງດ້ານການເງິນ ແລະ ສະໜັບສະໜູນການພັດທະນາຊົນນະບົດແບບທົ່ວເຖິງ ຊໍຶ່ງເປັນຮາກຖານໃນລະບົບເສດຖະກິດຂອງປະເທດໃຫ້ມີຄວາມຍືນຍົງ (ດັ່ງຄຳຂວັນທີ່ວ່າ: ພ້ອມກັນພັດທະນາ ເພື່ອຄວາມໝັ້ນຄົງ ແລະ ຍືນຍົງ) ຊຶ່ງ ທພບ ມີ 7 ພາລະກິດທີ່ສໍາຄັນຄື:
1. ດ້ານໂຄງສ້າງ (Structure):ດ້ານໂຄງສ້າງມີຄວາມສຳຄັນຫຼາຍຈະຕ້ອງໄດ້ກຳນົດບົດບາດ, ໜ້າທີ່, ຄວາມສຳພັນຂອງບຸກຄະລະກອນ ໃນອົງກອນ ແລະ ສ້າງລະບົບທີ່ມີລະບຽບຄຸ້ມຄອງ ຂອງພະແນກຕ່າງຢູ່ພາຍໃນ ໃຫ້ມີຄວາມຊັດເຈນ;
2. ດ້ານຍຸດທະສາດ (Strategy):ໄລຍະແຕ່ 2025-2030 ເປົ້າໝາຍໃຫຍ່ຄືສູ້ຊົນໃຫ້ກາຍເປັນສູນກາງທາງການເງິນຄົບວົງຈອນ ແລະ ທັນສະໄໝ ແກ່ລູກຄ້າເຂດຊົນນະບົດ ແລະ ວາງເປົ້າໝາຍຜົນຕອບແທນການດຳເນີນທຸລະກິດໄວ້ຄື: Return on assets (ROA) ຈະຕ້ອງບັນລຸ 1% ຂຶ້ນໄປ Return on equity (ROE) ຈະຕ້ອງບັນລຸຫຼາຍກ່ວາ 10% ເຊິ່ງເປັນຄາດໝາຍສູ້ຊົນໄວ້ສູງ;
3.ດ້ານຮູບແບບການບໍລິຫານ (Style): ເນັ້ນສ້າງນະໂຍບາຍແລະລະບົບການບໍລິຫານທີ່ດີ (CorporateGovernance)ໂດຍຄຳນຶງເຖິງຄວາມສຳຄັນຂອງຂະບວນການບໍລິຫານດ້ານຄວາມສ່ຽງ,ມີຄວາມຕໍ່ເນື່ອງທາງທຸລະກິດ ເພື່ອສ້າງຄວາມເຊື່ອໝັ້ນ ແລະ ຄວາມເພິ່ງພໍໃຈຜູ້ໃຊ້ບໍລິການ; ເນັ້ນສ້າງວັດທະນະທຳການເຮັດວຽກພາຍໃນ ທພບ ໃຫ້ກາຍເປັນພຶດຕິກຳ, ເປັນທັດສະນະຄະຕິ ຂອງຜູ້ບໍລິຫານທຸກໆລະດັບ ແລະ ພະນັກງານທົ່ວລະບົບ;
4. ພະນັກງານ ( Staff ): ພະນັກງານ ເປັນຊັບພະຍາກອນ ທີ່ສຳຄັນ ແລະ ລໍ້າຄ່າທີ່ສຸດເພື່ອຂັບເຄື່ອນອົງກອນໃຫ້ເຕີບໂຕ ແລະ ກ້າວໄປເຖິງວິໃສທັດ ທີ່ກຳນົດໄວ້. ສະນັ້ນ ການບໍລິຫານບຸກຄະລະກອນ ຈະຕ້ອງມີຂະບວນການທີ່ດີ ແລະ ມີຄວາມເຂັ້ມງວດ ເລີ່ມຈາກຂັ້ນຕອນການຄັດເລືອກ, ການນຳໃຊ້, ການບຳລຸງສ້າງ ແລະ ການພັດທະນາໃຫ້ມີຄວາມສາມາດ ທັງມີປະສິດທິພາບ;
5. ລະບົບການປະຕິບັດວຽກງານ(System): ເລັ່ງດຳເນີນການປັບປຸງບັນດາອົງປະກອບ, ລະບົບຂະບວນການ, ຂັ້ນຕອນການເຮັດວຽກໃຫ້ເຊື່ອມໂຍງກັນ, ການເຮັດວຽກຮ່ວມກັນ, ພ້ອມກັນນັ້ນກໍ່ຄົ້ນຄ້ວາເອົາລະບົບໂປແກຣມຕ່າງໆ ມານຳໃຊ້ໃນຂະບວນການເຮັດວຽກໃຫ້ສອດຄ່ອງກັບຄວາມຕ້ອງການ ແລະ ໂຄງສ້າງຂອງກອນ ເພື່ອຊ່ວຍໜູນໃຫ້ພະນັກງານເພີ່ມປະສິດທິພາບການເຮັດວຽກ ແລະ ບັນລຸເປົ້າໝາຍ;
6. ຄ່ານິຍົມຮ່ວມ (Shared values): ກຳນົດຄ່ານິຍົມຮ່ວມກັນໃນ ທພບ ເພື່ອເປັນແນວທາງ ຫຼື ລະບົບຄວາມຄິດ ທີ່ຈະດຳເນີນການຮ່ວມກັນ, ຜູ້ບໍລິຫານທຸກໆລະດັບຕະຫຼອດຮອດພະນັກງານຕ້ອງຮັບຮູ້, ເຂົ້າໃຈຢ່າງເລິກເຊິ່ງ ແລະ ຍຶດຖືປະຕິບັດຮ່ວມກັນ. ຄ່ານິຍົມຮ່ວມ ເປັນສິ່ງທີ່ ທພບ ຖືເປັນຄວາມສຳຄັນ ທີ່ຈະເສີມສ້າງຄວາມເປັນປຶກແຜ່ນ ແລະ ຄວາມສາມັກຄີເປັນອັນໜຶ່ງອັນດຽວກັນ;
7. ທັກສະ ຄວາມຮູ້ ຄວາມສາມາດ(Skill): ທພບ ຖືບຸກຄະລະກອນເປັນໃຈກາງ ແລະ ຄວາມສຳຄັນອັນດັບຫນຶ່ງ ທີ່ນຳເອົາ ທພບ ໃຫ້ມີການພັດທະນາ, ມີຄວາມເຕີບໂຕ ທີ່ມີຄວາມໝັ້ນຄົງ ແລະ ຍືນຍົງ. ສະນັ້ນ, ຈະສ້າງບົບການຄຸ້ມຄອງບໍລິຫານບຸກຄະລະກອນໃຫ້ມີຄວາມທັນສະໄໝ ຄັດເລືອກຜູ້ມີຄວາມຮູ້, ຄວາມສາມາດ ແລະ ມີທັກສະ. ສ້າງໃຫ້ລະບົບການບຳລຸງສ້າງ, ການນຳໃຊ້ ແລະ ລະບົບປະເມີນຜົນ ທີ່ມີຕົວຊີ້ວັດເຖິງຜົນສຳເລັດ ຢ່າງມີວິທະຍາສາດ.
(ຂ່າວ: ຣັດສະໝີ ດວງສັດຈະ)
ຄໍາເຫັນ