ວັນທີ 7 ທັນວາຜ່ານມາ, ກອງປະຊຸມເວທີປຶກສາຫາລືການຮ່ວມມືລາວ-ຈີນ “ໜຶ່ງແລວໜຶ່ງເສັ້ນທາງ” ຄັ້ງທີ 2 ໄດ້ຈັດຂຶ້ນຢູ່ນະຄອນຫຼວງວຽງຈັນແຫ່ງ ສປປ ລາວ ໂດຍໄດ້ເຜີຍແຜ່ຜົນການຮ່ວມມືໃນຫຼາຍຂົງເຂດລະຫວ່າງສອງຝ່າຍ ແລະ ເປັນສັກຂີພິຍານໃຫ້ແກ່ການເຊັນສັນຍາການຮ່ວມມືຫຼາຍສະບັບ ຊຶ່ງໄດ້ຊຸກຍູ້ການຮ່ວມມືຕົວຈິງລະຫວ່າງລາວ-ຈີນຢ່າງແຂງແຮງ.
ເດືອນຕຸລາປີນີ້, ຜູ້ນຳສອງປະເທດລາວ ແລະ ຈີນ ໄດ້ລົງນາມໃນ “ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ ລະຫວ່າງພັກປະຊາຊົນປະຕິວັດລາວກັບພັກກອມມູນິດຈີນ (ປີ 2024-2028)” ຊຶ່ງໄດ້ເພີ່ມເນື້ອໃນໃໝ່ເຂົ້າໃນການພົວພັນລະຫວ່າງສອງພັກກໍຄືສອງປະເທດ. ໃນຖານະເປັນເວທີ ແລະ ກົນໄກສຳຄັນໃນການຈັດຕັ້ງປະຕິບັດແຜນແມ່ບົດດັ່ງກ່າວ, ກອງປະຊຸມເວທີປຶກສາຫາລືຄັ້ງນີ້ໄດ້ເນັ້ນຫົວຂໍ້ “ຄູ່ຮ່ວມຊາຕາກຳລາວ-ຈີນ: ຍຸກໃໝ່, ກາລະໂອກາດໃໝ່ ແລະ ການສາທິດໃໝ່”.
ໃນກອງປະຊຸມປຶກສາຫາລືຄັ້ງນີ້, ໄດ້ຈັດງານໂຄສະນາເຜີຍແຜ່ຫົວຂໍ້ສະເພາະໂຄງການສຳຄັນໃນປີທ່ອງທ່ຽວລາວ 2024, ກອງປະຊຸມສຳມະນາຫົວຂໍ້ສະເພາະການຮ່ວມມືດ້ານກະສິກຳ ແລະ ການຫຼຸດຜ່ອນຄວາມທຸກຍາກຢ່າງຖືກຈຸດຖືກເປົ້າໝາຍຂອງລາວ ແລະ ມີຫຼາຍກິດຈະກຳ. ແຂກຜູ້ມີກຽດທີ່ເຂົ້າຮ່ວມກອງປະຊຸມໄດ້ຮ່ວມກັນຊົມງານວາງສະແດງຮູບພາບ “ຜົນສຳເລັດໃນການສ້າງຄູ່ຮ່ວມຊາຕາກຳລາວ-ຈີນ”. ສຳນັກຂ່າວຂໍ້ມູນຂ່າວສານເສດຖະກິດຈີນຂອງສຳນັກຂ່າວສານຊິນຮວາໄດ້ເຜີຍແຜ່ບົດລາຍງານ“ໂອກາດໃໝ່ແຫ່ງການຮ່ວມມືດ້ານເສດຖະກິດການຄ້າລາວ-ຈີນໃນຍຸກໃໝ່” ສະບັບພາສາຈີນ ແລະ ພາສາອັງກິດ.
ແຫຼ່ງຂ່າວ: ສໍານັກຂ່າວສານຊິນຮວາ ບັນນາທິການ: Yang Chunmei
ຄໍາເຫັນ