 |
ຊຶ່ງໄດ້ຈັດຂຶ້ນໃນຂອບສະພາເສດຖະກິດ-ສັງຄົມ ອົງການ ສປຊ ພາຍໃຕ້ຫົວຂໍ້: “ກ້າວໜ້າຕາມວິທີທາງແກ້ໄຂບັນຫາທີ່ຍືນຍົງ, ກວມລວມ ແລະ ອີງໃສ່ພື້ນຖານທາງດ້ານວິທະຍາສາດ ແລະ ຫຼັກຖານ ເປັນຫຼັກ ໃນການຈັດຕັ້ງປະຕິບັດ ວາລະ 2030 ແລະ ເປົ້າໝາຍການພັດທະນາແບບຍືນຍົງ (ປພຍ ຫຼື SDGs) ເພື່ອໃຫ້ທຸກຄົນພ້ອມກັນກ້າວໄປ” (Advancing sustainable, inclusive, science- and evidence-based solutions for the 2030 Agenda and its SDGs for leaving no one behind). ກອງປະຊຸມ ໄດ້ພ້ອມກັນພິຈາລະນາ ແລະ ທົບທວນຄືນການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງ ກໍຄືບັນດາ 17 ປພຍ ຊຶ່ງໃນປີນີ້ ແມ່ນສຸມໃສ່5 ປພຍ ຄື: ປພຍ 3 ມີສຸຂະພາບ ແລະ ຊີວິດການເປັນຢູ່ທີ່ດີ, ປພຍ 5 ມີຄວາມສະເໝີພາບລະຫວ່າງຍິງ-ຊາຍ, ປພຍ 8ມີວຽກເຮັດງານທຳທີ່ມີກຽດ ແລະ ເສດຖະກິດມີການຂະຫຍາຍຕົວ, ປພຍ 14 ອະນຸລັກ ແລະ ນໍາໃຊ້ສິ່ງທີ່ມີຊີວິດໃນນໍ້າ ແບບຍືນຍົງ ແລະ ປພຍ 17 ການເປັນຄູ່ຮ່ວມມືເພື່ອຈັດຕັ້ງປະຕິບັດ ປພຍ. ໃນປີນີ້ ໄດ້ມີ 37 ປະເທດສະມາຊິກ ສປຊ ຜັດປ່ຽນໝູນວຽນກັນນໍາສະເໜີບົດລາຍງານແຫ່ງຊາດແບບສະໝັກໃຈ ກ່ຽວກັບການຈັດຕັ້ງປະຕິບັດ ປພຍ ໃນລະດັບປະເທດ ຂອງຕົນ.
ສໍາລັບກອງປະຊຸມລະດັບລັດຖະມົນຕີຈັດຂຶ້ນໃນວັນທີ 21 – 23 ກໍລະກົດ ຜ່ານມາ ພາຍໃຕ້ຫົວຂໍ້: "ອົງການ ສປຊ 80 ປີ: ກະຕຸກຊຸກຍູ້ ການປ່ຽນແປງ ເພື່ອການພັດທະນາແບບຍືນຍົງ" (UN@80: Catalyzing Change for Sustainable Development) ຊຶ່ງໃນພິທີເປີດ, ປະທານ ສະພາເສດຖະກິດ-ສັງຄົມ ອົງການ ສປຊ, ປະທານ ກອງປະຊຸມ ໄດ້ກ່າວເປີດ ໂດຍໄດ້ຍົກໃຫ້ເຫັນ ສິ່ງທ້າທາຍ ທີ່ສາກົນກຳລັງປະເຊີນຢູ່ ແລະ ສະເໜີຕໍ່ກອງປະຊຸມ ໃຫ້ພ້ອມກັນເພີ່ມທະວີຄວາມພະຍາຍາມເປັນສອງທົບ, ເພີ່ມທະວີຄວາມມີປະສິດທິຜົນຂອງລະບົບອົງການ ສປຊ ແລະ ການຮ່ວມມືແບບຫຼາຍຝ່າຍ ກໍຄືການປະຕິບັດຕາມກົດບັດອົງການ ສປຊ. ຈາກນັ້ນ, ທ່ານເລຂາທິການໃຫຍ່ ອົງການ ສປຊ ໄດ້ສະແດງຄວາມເປັນຫ່ວງຕໍ່ກັບການຈັດຕັ້ງປະຕິບັດ ປພຍ ໃນທົ່ວໂລກ ຊຶ່ງມາເຖິງປີ 2025 ພາຍຫຼັງ 10 ປີ ທີ່ ປພຍ ໄດ້ຮັບການຮັບຮອງເອົາ ໃນປີ 2015, ສາກົນ ສາມາດປະຕິບັດຕາມຕົວຊີ້ບອກ ປພຍ ໄດ້ພຽງແຕ່ 35% ຍ້ອນຂາດທຶນຮອນເພື່ອມາຈັດຕັ້ງປະຕິບັດມູນຄ່າ 4 ຕື້ໂດລາຕໍ່ປີ ແລະ ລັດຖະບານຂອງຫຼາຍປະເທດ ເປັນຕົ້ນປະເທດກໍາລັງພັດທະນາກຳລັງປະເຊີນກັບບັນຫາໜີ້ສິນທີ່ເພີ່ມສູງຂຶ້ນ. ສ່ວນປະທານສະມັດຊາໃຫຍ່ສປຊ ສະໄໝທີ 79 ກໍໄດ້ ສະເໜີຕໍ່ກອງປະຊຸມໃຫ້ພ້ອມກັນ ຈັດຕັ້ງປະຕິບັດ ເອກະສານ ຄວາມໝາຍໝັ້ນ ເຊວີລ ທີ່ໄດ້ຖືກຮັບຮອງເອົາໃນກອງປະຊຸມສາກົນວ່າດ້ວຍການສະໜອງທຶນເພື່ອການພັດທະນາຄັ້ງທີ 4 ຈັດຂຶ້ນໃນຕົ້ນເດືອນກໍລະກົດ ທີ່ຜ່ານມາ ທີ່ ແອັດສະປາຍ ເພື່ອສະໜັບສະໜູນການຈັດຕັ້ງປະຕິບັດ ປພຍ ກໍຄືການພັດທະນາຂອງສາກົນ.
ໃນກອງປະຊຸມລະດັບລັດຖະມົນຕີວັນທີ 21 ກໍລະກົດ 2025, ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ ຫົວໜ້າຄະນະຜູ້ແທນ ສປປ ລາວ ກໍໄດ້ກ່າວປາໄສໃນພາກອະພິປາຍທົ່ວໄປ, ໂດຍໄດ້ສະເໜີຕໍ່ກອງປະຊຸມ ພ້ອມກັນເພີ່ມທະວີຄວາມພະຍາຍາມຂອງຕົນ ເພື່ອຜັນຂະຫຍາຍ ເອກະສານຄວາມໝາຍໝັ້ນ ເຊວີລ ໃຫ້ປະກົດຜົນເປັນຈິງ ໂດຍຜ່ານການຮ່ວມມືແບບຫຼາຍຝ່າຍ ທີ່ມີອົງການ ສປຊ ເປັນແກນກາງ. ນອກຈາກນີ້, ສປປ ລາວ ໄດ້ແຈ້ງໃຫ້ສາກົນຊາບກ່ຽວກັບຄວາມພະຍາຍາມຂອງຕົນ ໃນການໝູນໃຊ້ ແນວຄວາມຄິດເສດຖະກິດເອກະລາດ ເປັນເຈົ້າຕົນເອງ (ສອຈ) ແນໃສ່ການພັດທະນາປະເທດ ແລະ ການກະກຽມ ຫຼຸດພົ້ນອອກຈາກສະຖານະພາບ ດ້ອຍພັດທະນາ ພາຍໃນປີ 2026. ທ້າຍສຸດ, ທ່ານ ຮອງລັດຖະມົນຕີ ໄດ້ຮຽກຮ້ອງມາຍັງສາກົນ, ຄູ່ຮ່ວມພັດທະນາ ແລະ ລະບົບອົງການ ສປຊ ສືບຕໍ່ໃຫ້ການສະໜັບສະໜູນ ຄວາມພະຍາຍາມຂອງ ສປປ ລາວ ໃນການພັດທະນາປະເທດ ແລະ ການຈັດຕັ້ງປະຕິບັດ ປພຍ ຢ່າງມີປະສິດທິຜົນ.
ຂ່າວ: ກະຊວງການຕ່າງປະເທດ
ຄໍາເຫັນ