ທ່ານ ນາງ ດາລາວອນ ກິດຕິພັນ ກ່າວຕື່ມວ່າ: ຕະຫຼອດໄລຍະຜ່ານມາ, ສື່ມວນຊົນໄດ້ປະກອບ ສ່ວນທີ່ສຳຄັນໃຫ້ພັກ-ລັດ, ເປັນເຄື່ອງມືໜຶ່ງຊ່ວຍໃນການໂຄສະນາວຽກງານຮອບດ້ານ, ການເຄື່ອນໄຫວຂອງພັກ, ຂອງລັດ. ສໍາລັບໃນວຽກງານ ສສກ ກໍເຫັນວ່າວຽກງານສື່ມວນຊົນ ກໍໄດ້ມີການປະກອບສ່ວນຫຼາຍດ້ານ ໂດຍສະເພາະການໂຄສະນາວຽກງານການສຶກສາ ໃຫ້ເຂົ້າເຖິງທົ່ວສັງຄົມຕັ້ງແຕ່ສູນກາງລົງຮອດທ້ອງຖິ່ນ ເຮັດໃຫ້ສັງຄົມມີຄວາມເຂົ້າໃຈໃນພາລະກິດພັດທະນາການສຶກສາຂອງພວກເຮົາ. ກອງປະຊຸມໃນຄັ້ງນີ້, ຊຶ່ງເປັນຄັ້ງທໍາອິດ ມີເປັນບົດບາດ ແລະ ເປັນບາດລ້ຽວອັນສຳຄັນທີ່ສຸດຂອງສື່ມວນຊົນລາວ, ຈະເພີ່ມຄວາມເຂັ້ມແຂງ ຍົກສູງບົດບາດຂອງສື່ມວນຊົນໃຫ້ສູງຂຶ້ນເລື້ອຍໆ. ພ້ອມນັ້ນ, ໃນຍຸກປັດຈຸບັນ ສື່ມວນຊົນໄດ້ມີການພັດທະນາທາງດ້ານວິທະຍາສາດເຕັກໂນໂລຊີ, ປັນຍາປະດິດ (AI), ຈໍາເປັນຕ້ອງໄດ້ມີການປັບຕົວໃຫ້ເຂົ້າທັນກັບຍຸກທັນສະໄໝ ຄືກອງປະຊຸມໃນມື້ນີ້, ຜ່ານການເຊື່ອມຊຶມເອກະສານດັ່ງກ່າວ ບາງເທື່ອທັກສະທີ່ພວກເຮົາມີໃນປັດຈຸບັນອາດຍັງບໍ່ສອດຄ່ອງ. ສະນັ້ນ, ຈະຕ້ອງໄດ້ເປີດກວ້າງ, ຮໍ່າຮຽນເອົາທັກສະອັນໃໝ່ ບໍ່ວ່າຈະເປັນການຂຽນເນື້ອຫາຂ່າວ ຫຼື ທັກສະຕ່າງໆ ເຮັດແນວໃດໃຫ້ພວກເຮົາສື່ມວນຊົນສະໜອງຂ່າວທີ່ມີຄວາມໜ້າເຊື່ອຖື, ໄວ້ວາງໃຈ ແລະ ວ່ອງໄວທັນເຫດການ.
ຄໍາເຫັນ