 |
ສະຫາຍ ພັນເອກ ບຸນກ່ຳ ພິມພົງພັນ ຫົວໜ້າຫ້ອງພະລາທິການ ກອງພົນທີ 2 ກ່າວວ່າ: ໃນໄລຍະຜ່ານມາ, ພັກ ແລະ ລັດຖະບານ ສປປ ລາວ ເຫັນໄດ້ຄວາມສຳຄັນ ແລະ ຄຸນປະໂຫຍດຢ່າງຫຼວງຫຼາຍຂອງປ່າໄມ້ທີ່ຕິດພັນກັບຊີວິດການເປັນຢູ່ຂອງປະຊາຊົນບັນດາເຜົ່າ, ພັກ ແລະ ລັດຖະບານ ສປປ ລາວ ຈຶ່ງໄດ້ກຳນົດເອົາວັນທີ 1 ມິຖຸນາຂອງທຸກໆປີ ຊຶ່ງກົງກັບວັນເດັກນ້ອຍສາກົນ ເປັນວັນປູກຕົ້ນໄມ້ແຫ່ງຊາດ ໂດຍທຸກປີ ພະນັກງານທະຫານ, ຕຳຫຼວດ, ນັກຮຽນຮູ້ປັນຍາຊົນ ແລະ ຊັ້ນຄົນຕ່າງໆ ຢູ່ຂັ້ນສູນກາງ ແລະ ທ້ອງຖິ່ນໃນຂອບເຂດທົ່ວປະເທດໄດ້ພາກັນຈັດກິດຈະກຳຢ່າງເປັນຂະບວນຟົດຟື້ນ ເພື່ອປູກຕົ້ນໄມ້ໃຫ້ເປັນປ່າ ແນໃສ່ເຮັດໃຫ້ເນື້ອທີ່ປ່າຂຽວສົດງົດງາມ ທັງເປັນການປູກຈິດສຳນືກໃຫ້ທຸກຄົນຮູ້ຈັກຄຸ້ມຄອງປົກປັກຮັກສາຊັບພະຍາກອນ ທຳມະຊາດ ແລະ ສິ່ງແວດລ້ອມໃຫ້ມີຄວາມອຸດົມສົມບູນ ເປັນຕົ້ນແມ່ນພູຜາປ່າດົງໃຫ້ຄົງຢູ່ກັບ ສປປ ລາວ ກໍຄືປະຊາຊົນລາວ ແລະ ລູກຫຼານລາວຕະຫຼອດໄປ.
 |
ຊຶ່ງໃນນັ້ນກອງພົນທີ 2 ໄດ້ຈັດຕັ້ງພິທີປູກຕົ້ນໄມ້ເປັນປະຈຳທຸກໆປີ ໂດຍຈັດຕັ້ງປູກໃສ່ຂອບເຂດອົງການ, ກົມກອງທີ່ເຫັນວ່າມີເງື່ອນໄຂ ແລະ ຄວາມເໝາະສົມ ເພື່ອເປັນການປະກອບສ່ວນໃນການສ້າງຄວາມສົມດູນໃຫ້ທຳມະຊາດ. ດັ່ງນັ້ນ, ກອງພົນທີ 2 ຈຶ່ງໄດ້ຕົກລົງຈັດພິທີປູກຕົ້ນໄມ້ແຫ່ງຊາດປະຈຳປີ 2026 ຢູ່ບໍລິເວນກອງຮ້ອຍ 27 ໃນເນື້ອທີ່ 2 ເຮັກຕາ, ມີຕົ້ນຢາງພາລາຈຳນວນ 1,200 ຕົ້ນ ຊຶ່ງເປັນການປະກອບສ່ວນສ້າງໃຫ້ພື້ນທີ່ຂອບເຂດກອງຮ້ອຍ 27 ມີພື້ນທີ່ສີຂຽວເພີ່ມຂຶ້ນ ເວົ້າລວມ, ເວົ້າສະເພາະ ແມ່ນການສ້າງເສດຖະກິດຈາກການປູກຕົ້ນໄມ້ອຸດສາຫະກຳໃນອະນາຄົດ.
ຂ່າວ: ອານຸສັກ ອຳພັນວິໄລ
ຄໍາເຫັນ