ອີງຕາມການລາຍງານຂອງສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ ໄດ້ໃຫ້ຮູ້ວ່າ: ມູນຄ່າການນໍາ ເຂົ້າ ແລະ ສົ່ງອອກສິນຄ້າ (ບໍ່ລວມໄຟຟ້າ) ນັບແຕ່ເດືອນກຸມພາ 2025 ມານີ້, ສປປ ລາວ ເກີນດຸນການຄ້າ ເປັນເດືອນທີ 3 ຕິດຕໍ່ກັນ ດ້ວຍມູນຄ່າເກີນດຸນປະມານ 526 ລ້ານໂດລາ ຫຼັງຈາກເດືອນທໍາອິດຂອງປີ ຂາດດຸນການຄ້າ ປະມານ 56 ລ້ານໂດລາ.
ໃນເດືອນມັງກອນປີ 2025, ມູນຄ່າການນໍາເຂົ້າ ແລະ ສົ່ງອອກ ສິນຄ້າ (ບໍ່ລວມໄຟຟ້າ) ປະຕິບັດໄດ້ປະມານ 1,356 ລ້ານໂດລາ ຊຶ່ງສົ່ງອອກສິນຄ້າ ປະມານ 650 ລ້ານໂດລາ ແລະ ນໍາເຂົ້າສິນຄ້າ ປະມານ 706 ລ້ານໂດລາ, ຂາດດຸນປະມານ 56 ລ້ານໂດລາ ກ່ອນຈະມາເກີນດຸນການຄ້າໃນເດືອນກຸມພາ ດ້ວຍມູນຄ່າການຄ້າ ບັນລຸໄດ້ປະມານ 1,540 ລ້ານໂດລາ ຊຶ່ງສົ່ງອອກສິນຄ້າ ປະມານ 925 ລ້ານໂດລາ ແລະ ນໍາເຂົ້າສິນຄ້າ ປະມານ 615 ລ້ານໂດລາ, ເກີນດຸນປະມານ 310 ລ້ານໂດລາ. ຈາກນັ້ນ, ມູນຄ່າການນໍາເຂົ້າ ແລະ ສົ່ງອອກສິນຄ້າ (ບໍ່ລວມໄຟຟ້າ) ກໍເກີນດຸນການຄ້າເປັນເດືອນທີ 2 ໃນເດືອນມີນາ ດ້ວຍມູນຄ່າການຄ້າ ປະມານ 1,730 ລ້ານໂດລາ ຊຶ່ງສົ່ງອອກສິນຄ້າ ປະມານ 945 ລ້ານໂດລາ ແລະ ນໍາເຂົ້າສິນຄ້າ ປະມານ 785 ລ້ານໂດລາ, ເກີນດຸນປະມານ 160 ລ້ານໂດລາ.
ສຳລັບ, ມູນຄ່າການນໍາເຂົ້າ ແລະ ສົ່ງອອກ ສິນຄ້າ (ບໍ່ລວມໄຟຟ້າ) ຂອງ ສປປ ລາວ ໃນເດືອນເມສາປີນີ້ ບັນລຸໄດ້ປະມານ 1,570 ລ້ານໂດລາ ຊຶ່ງໄດ້ສົ່ງອອກສິນຄ້າ ປະມານ 813 ລ້ານໂດລາ ແລະ ນໍາເຂົ້າສິນຄ້າ ປະມານ 757 ລ້ານໂດລາ, ເກີນດຸນການຄ້າ 56 ລ້ານໂດລາ. ການເກີນດຸນການຄ້າດັ່ງກ່າວ, ເຮັດໃຫ້ ສປປ ລາວ ເກີນດຸນການຄ້າເປັນເດືອນທີ 3 ຕິດຕໍ່ກັນ ດ້ວຍມູນຄ່າເກີນດຸນລວມ 3 ເດືອນ ຢູ່ທີ່ປະມານ 831 ລ້ານໂດລາ.
ເມື່ອສັງເກດການເກີນດຸນການຄ້າຂອງ ສປປ ລາວ ໃນ 3 ເດືອນຕິດຕໍ່ກັນນັ້ນ ເຫັນວ່າການສົ່ງອອກສິນຄ້າ ມີລັກສະນະຫຼຸດລົງ; ເຖິງວ່າການສົ່ງອອກສິນຄ້າໃນເດືອນກຸມພາ ເພີ່ມຂຶ້ນ 42.3% ທຽບໃສ່ເດືອນມັງກອນ, ແຕ່ໃນເດືອນມີນາ ກໍຫຼຸດລົງຈາກເດືອນກຸມພາ 2% ແລະ ເດືອນເມສາ ຫຼຸດລົງຈາກເດືອນມີນາ 14%. ຂະນະທີ່ ການນໍາເຂົ້າສິນຄ້າ ໃນ 3 ເດືອນທີ່ ສປປ ລາວ ເກີນດຸນການຄ້າ ຍັງສືບຕໍ່ເພີ່ມຂຶ້ນ, ໃນເດືອນກຸມພາ ນໍາເຂົ້າສິນຄ້າ ເພີ່ມຂຶ້ນຈາກເດືອນມັງກອນ 12.9%, ເດືອນມີນາ ເພີ່ມຂຶ້ນຈາກເດືອນກຸມພາ 28% ແລະ ເດືອນເມສາ ເພີ່ມຂຶ້ນຈາກເດືອນມີນາ 4%.
(ຂ່າວ: ຫົງລຶດີ ສາຍສໍາພັນ)
ຄໍາເຫັນ