ກູບາປະຕິບັດແຜນເສດຖະກິດໃໝ່ ເພື່ອຟື້ນຟູເສດຖະກິດ

ຂ່າວສານຊີອາໄອລາຍງານ ເມື່ອບໍ່ດົນມານີ້, ກູບາໄດ້ປະຕິບັດແຜນການຮັກສາຄວາມໝັ້ນທ່ຽງຂອງເສດຖະກິດມະຫາພາກສະບັບໜຶ່ງໂດຍລະບຸຸວ່າ ນັບແຕ່ວັນທີ 1 ມັງກອນປີນີ້ເປັນຕົ້ນໄປ ເພື່ອຊຸກຍູ້ການຟື້ນຟູເສດຖະກິດ ແລະ ແກ້ໄຂບັນຫາໃນຂົງເຂດເງິນຕາ ແລະ ການທະນາຄານຕ່າງໆ.
ເວັບໄຊພັກກອມມູນິດກູບາ ແລະ ເວັບໄຊລັດຖະບານກູບາໄດ້ແຈ້ງໃຫ້ຮູ້ວ່າ: ແຜນການດັ່ງກ່າວມີຈຸດປະສົງ ເພື່ອຊຸກຍູ້ການຟື້ນຟູ ແລະ ການເຕີບໂຕຂອງເສດຖະກິດ ດ້ວຍນະໂຍບາຍເງິນຕາ, ອັດຕາແລກປ່ຽນ, ການທະນາຄານ ແລະ ການເງິນທີ່ດຸນດ່ຽງ ເພື່ອປັບປຸງຄວາມສາມາດການແລກປ່ຽນເງິນຕາກູບາໃຫ້ດີຂຶ້ນ ແລະ ຫຼຸດອັດຕາເງິນເຟີ້ໃຫ້ຕ່ຳລົງ. ໂຕເລກຂໍ້ມູນທີ່ລັດຖະບານກູບາເຜີຍແຜ່ໃນຫວ່າງມໍ່ໆມານີ້ສະແດງໃຫ້ເຫັນວ່າປີ 2023, ຂະແໜງການທ່ອງທ່ຽວ ທີ່ເປັນຂະແໜງການສ້າງລາຍຮັບເປັນເງິນຕາຕ່າງປະເທດຕົ້ນຕໍຂອງກູບາ ໄດ້ຕ້ອນຮັບນັກທ່ອງທ່ຽວສາກົນປະມານ 2,45 ລ້ານເທື່ອຄົນ ຊຶ່ງຕ່ຳກວ່າເປົ້າໝາຍ ທີ່ໄດ້ກຳນົດໄວ້ 3,5 ລ້ານເທື່ອຄົນ. ໃນຂະນະດຽວກັນ, ນັບມາຮອດກາງເດືອນທັນວາປີ 2023, ຍອດມູນຄ່າສົ່ງອອກໃນປີ 2023 ຂອງກູບາມີເຖິງ 9,07 ຕື້ໂດລາຕ່ຳກວ່າເປົ້າໝາຍທີ່ຄາດໄວ້ລ່ວງໜ້າ.