ກຕທ ຈັດກິດຈະກຳສະຫຼອງວັນເດັກສາກົນ ແລະ ວັນສົນທິສັນຍາ ວ່າດ້ວຍສິດທິເດັກ

ກິດຈະກຳໃນຄັ້ງນີ້ ເພື່ອເປັນການໂຄສະນາເຜີຍແຜ່ຢ່າງກວ້າງຂວາງ ຕາມແນວທາງນະໂຍບາຍຂອງພັກ-ລັດ ຜ່ານສື່ສັງຄົມຕ່າງໆ ກໍຄືການສ້າງຂະບວນການໃຫ້ມີຫຼາຍຮູບຫຼາຍສີ ເພື່ອປູກຈິດສຳນຶກໃຫ້ຫຼານນ້ອຍຮຸ່ນໃໝ່ ຮູ້ຮັກສາສິ່ງແວດລ້ອມ ໃຫ້ທຸກຄົນໃນສັງຄົມຕ່າງໆ ໂດຍສະເພາະແມ່ນຫຼານນ້ອຍ, ອະນຸຊົນ, ເຍົາວະຊົນ ໄດ້ເຫັນເຖິງຄວາມສຳຄັນ ແລະ ເອົາໃຈໃສ່ປົກປ້ອງ, ເບິ່ງແຍງຮັກສາເດັກນ້ອຍ ຊຶ່ງເປັນໜໍ່ແໜງ ແລະ ເປັນອະນາຄົດຂອງຊາດ. ນອກຈາກນີ້, ກໍຍັງໄດ້ເຜີຍແຜ່ສານ ຂອງທ່ານ ນາຍົກລັດ ຖະມົນຕີແຫ່ງ ສປປ ລາວ ຕໍ່ວັນເດັກນ້ອຍສາກົນ ຊຶ່ງເປັນວັນທີ່ມີຄວາມສຳຄັນ ໃນການສົ່ງເສີມ ແລະ ປົກປ້ອງ ສິດທິເດັກ, ສົ່ງເສີມດ້ານສຸຂະພາບ, ໂພສະນາການ, ການສຶກສາ ແລະ ຄວາມສະເໝີພາບເດັກຍິງ-ເດັກຊາຍ, ສົ່ງເສີມການນຳໃຊ້ເຕັກໂນໂລຊີແບບສ້າງສັນ ແລະ ລຶບລ້າງຄວາມຮຸນແຮງຕໍ່ເດັກ, ຄຽງຄູ່ກັບການສົ່ງເສີມການປູກຕົ້ນໄມ້ ໃນວັນປູກຕົ້ນໄມ້ແຫ່ງຊາດ ເພື່ອຮັກສາສິ່ງແວດລ້ອມ ແລະ ຫຼຸດຜ່ອນບັນຫາການປ່ຽນແປງດິນຟ້າອາກາດ.

ພິທີດັ່ງກ່າວໄດ້ດໍາເນີນໄປດ້ວຍບັນຍາກາດທີ່ເບີກບານມ່ວນຊື່ນ ຊຶ່ງບັນດາຜູ້ເຂົ້າຮ່ວມຍັງໄດ້ມອບເຄື່ອງນຸ່ງ ຈຳນວນ 3 ແກັດ, ປຶ້ມແບບຮຽນຊັ້ນປະຖົມ ປ1-ປ5 ຈໍານວນ 265 ຫົວ, ໂຖກອງນ້ຳດື່ມຈຳນວນ 8 ໜ່ວຍ ພ້ອມກັບປູກຕົ້ນໄມ້, ຊົມກິດຈະກຳ ຫຼີ້ນເກມ ແລະ ຕອບຄໍາຖາມຄວາມຮູ້ຮອບຕົວຂອງຫຼານນ້ອຍນັກຮຽນ ແລະ ມອບຂອງຂວັນເປັນກໍາລັງໃຈໃຫ້ຫຼານນ້ອຍໃນຄັ້ງນີ້.

(ຂ່າວ: ກຕທ)