 |
ທ່ານ ນາງ ບຸນທະວີ ຈຸລະມະນີ ອໍານວຍການບໍລິສັດ ເກືອເວີນຄໍາ ຈຳກັດຜູ້ດຽວ ໄດ້ປະກອບຄໍາເຫັນໃນກອງປະຊຸມໃຫ່ຍຜູ້ແທນ ອົງຄະນະພັກນະຄອນຫຼວງວຽງຈັນ ຄັ້ງທີ VIII ທີ່ຫໍປະຊຸມແຫ່ງຊາດ ໃນຫົວຂໍ້: “ຕົວແບບໃນການຜະລິດເກືອຄຸນນະພາບ ໄດ້ມາດຕະຖານສາກົນ ເພື່ອການສົ່ງອອກ” ຊຶ່ງໄດ້ລາຍງານວ່າ: ບໍລິສັດເກືອເວີນຄໍາ ຈຳກັດຜູ້ດຽວ ສ້າງຕັ້ງຂຶ້ນໃນປີ 1996 ມີໂຮງງານຕັ້ງຢູ່ ບ້ານສາມສະອາດ ເມືອງໄຊທານີ ນະຄອນຫຼວງວຽງຈັນ, ມີພະນັກງານ-ກຳມະກອນທັງໝົດ ຈໍານວນ 108 ຄົນ, ໃນເບື້ອງຕົ້ນການຜະລິດເກືອແມ່ນໄດ້ນໍາໃຊ້ນໍ້າເຄັມຈາກຊັ້ນໃຕ້ດິນ ໂດຍການເຈາະສ້າງບາດານໃນຄວາມເລິກປະມານ 150 ແມັດ, ນໍ້າເຄັມຖືກດູດຂຶ້ນມາ ເພື່ອຕົ້ມ ແລະ ຕາກແດດ, ການຕົ້ມເກືອແມ່ນໃຊ້ວິທີແບບປະຖົມປະຖານດັ່ງເດີມ, ໂດຍນໍາໃຊ້ຖ່ານຫີນເປັນເຊື້ອເພີງ, ຊຶ່ງມີຜະລິດຕະພັນ 3 ປະເພດ ຄື: ເກືອຕົ້ມ, ເກືອຕາກແດດ ແລະ ເກືອສະໝຸນໄພ, ພາຍໃຕ້ເຄື່ອງໝາຍການຄ້າ “ກາກວຽນ" ຫຼັງຈາກນັ້ນ ກໍໄດ້ມີການປັບປຸງຄຸນນະພາບຢ່າງຕໍ່ເນື່ອງ ເປັນຕົ້ນໄດ້ສ້າງລະບົບເຮືອນຮົ່ມທີ່ໃຊ້ຄວາມຮ້ອນ ດ້ວຍພະລັງງານແສງຕາເວັນ ເພື່ອຕາກເກືອ ແລະ ອົບເມັດເກືອໃຫ້ແຫ້ງໄວຂຶ້ນ, ນໍາໃຊ້ເຕັກໂນໂລຊີທີ່ທັນສະໄໝ ແຕ່ຍັງຄົງຮັກສາການຜະລິດແບບດັ່ງເດີມ ໃຫ້ໄດ້ຄຸນນະພາບ ແລະ ມາດຕະຖານສາກົນ ຊຶ່ງໄດ້ຮັບການຢັ້ງຢືນ GMP, ISO 9001:2015 ແລະ ສົ່ງອອກໄປຈຳໜ່າຍຢູ່ຫຼາຍປະເທດ ເຊັ່ນ: ຍີ່ປຸ່ນ, ໃຕ້ຫວັນ, ສ ເກົາຫຼີ, ຫວຽດນາມ ແລະ ໄທ. ທ່ານ ນາງ ບຸນທະວີ ຈຸລະມະນີ ລາຍງານຕື່ມວ່າ: ໃນທ້າຍປີນີ້ ຈະໄດ້ຮັບການຢັ້ງຢືນ ມາດຕະຖານອາຫານຮາລາລ (Halal) ໃນໂຄງການສ້າງຄວາມເຂັ້ມແຂງດ້ານຜະລິດຕະພາບ ຊຶ່ງຈະສ້າງມາດຕະ ຖານໃໝ່ໃຫ້ແກ່ເກືອລາວ ເພື່ອກ້າວເຂົ້າສູ່ຕະຫຼາດໂລກ ເຂົ້າເຖິງພົນລະເມືອງຊາວມຸສະລິມ ທີ່ກວມເອົາປະມານ 1/3 ຂອງພົນລະເມືອງໂລກ. ປັດຈຸບັນບໍລິສັດ ສາມາດຜະລິດເກືອໄດ້ປະມານ 2,600-3,000 ໂຕນຕໍ່ປີ, ສ້າງ ລາຍຮັບ ແລະ ມອບພັນທະໃຫ້ແກ່ລັດໃນແຕ່ລະປີ.
 |
ບໍລິສັດ ເກືອເວີນຄໍາ ໄດ້ປະສົບຜົນສໍາເລັດ ດ້ວຍປັດໄຈຫຼັກ 2 ປະການ ຄື: ມີວັດທະນະທໍາອົງກອນທີ່ ສອດຄ່ອງ ແລະ ເຂັ້ມແຂງ, ເປັນອົງກອນທີ່ຮຽນຮູ້ ແລະ ພັດທະນາຢ່າງຕໍ່ເນື່ອງ (5S, Kaizen, PDCA ...) ການດໍາເນີນທຸລະກິດ ຂອງບໍລິສັດ ມາຮອດມື້ນີ້ໄດ້ ຍ້ອນມີແນວທາງນະໂຍບາຍທີ່ຖືກຕ້ອງ ແລະ ສອດຄ່ອງ ຂອງພັກ-ລັດ ໂດຍສະເພາະຕໍ່ກັບຂະແໜງສົ່ງເສີມການຜະລິດພາຍໃນ ແລະ ສົ່ງອອກ, ໄດ້ຮັບການສະໜັບສະໜູນ, ຊຸກຍູ້ສົ່ງເສີມ ການຈັດຕັ້ງສັງຄົມທຸກພາກສ່ວນ ພິເສດແມ່ນໄດ້ຮັບການນໍາພາ-ຊີ້ນໍາຈາກອົງຄະນະພັກ, ອົງການ ປົກຄອງນະຄອນຫຼວງວຽງຈັນ ສະໄໝທີ VII ດ້ວຍດີຕະຫຼອດມາ.
ໃນຕໍ່ໜ້າ ເພື່ອເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກນະຄອນຫຼວງວຽງຈັນ, ບໍລິສັດເກືອເວີນຄໍາ ຈະໄດ້ສືບຕໍ່ສົ່ງເສີມ ການຜະລິດພາຍໃນໃຫ້ເປັນສິນຄ້າ, ໃຫ້ປະຊາຊົນລາວໄດ້ບໍລິໂພກເກືອທີ່ມີຄຸນນະພາບ, ມີຄວາມປອດໄພ, ມີຄຸນຄ່າທາງດ້ານໂພຊະນາການ, ເປັນທີ່ຍອມຮັບຂອງສັງຄົມ ແລະ ສາມາດກ້າວເຂົ້າໄປໃນຕະຫຼາດໂລກ, ສ້າງຊື່ສຽງໃຫ້ແກ່ປະເທດຊາດ.
 |
ຄໍາເຫັນ